Улоў #17

MIA выкочвае трэк з візуалам а-ля Gustav Goodstuff, дражэ Skittles ахвяруюць колерам у гонар ЛГБТ+, Queens Of The Stone Age напрапалую лгуць паліграфу, а гэтаму гораду зноў патрэбны герой/гераіня – Асмалоўку топяць у цябе на вачах.

 

 

Пагроза тыдня:

 

 

З Асмалоўкі хочуць зрабіць поўны фарш – са шматпавярховікамі, гандлёвай вуліцай і бізнэс-цэнтрам. Чыноўнікі не слухаюць ні архітэктараў, ні гісторыкаў, ні эколагаў, ні жыхароў раёна. Здаецца, бабло перамагае ўсё. Каб потым не было пакутліва сорамна, прыходзь 26-га чэрвеня ў 18:30 да будынка адміністрацыі Цэнтральнага раёна на абмеркаванне праекта забудовы самага душэўнага раёнчыка Менска.

 

 

 

Тызер тыдня:

 

 

Галоўныя праваднікі жанру стоўнер у масы Queens Of The Stone Age даўно трымаюць фанаў у тамленні: апошні альбом …Like Clockwork выйшаў яшчэ ў 2013-м. І вось нарэшце сталі з'яўляцца добрыя вестачкі. Вядомы ў музычных колах хлопец Лаям Лінч зняў для рокераў незвычайны тызер. Па сюжэце «рыжы Элвіс» Джош Хом здае тэст на дэтэктары хлусні. На блакітным воку музыка ўцірае, што новы альбом будзе называцца не Villains, песня Feet Don’t Fail Me нічога яму не нагадвае, а яшчэ Джош нібыта ні сном ні духам не чуў пра мегапрадзюсара Марка Ронсана, які працаваў з Адэль, Лэдзі Гагай, Эмі Уайнхаўс ды Бруна Марсам.

 

 

 

 

Відос тыдня:

 

 

MIA выклала стэрэарэпорт-прысвячэнне «хардкорным» фанам, падзякаваўшы ім за адданасць і падтрымку. Стылёвыя гіфкі Хаймэ Марцінэза будуць транслявацца на дысплеі Southbank Center у Лондане напярэдадні канцэрта спявачкі. Нічога не нагадвае?

 

 

 

 

Плытка тыдня:

 

 

Культавы электроншчык DJ Krush святкуе 25-годдзе творчай дзейнасці эксперыментальным рэлізам. У якасці feat'оў на плытцы Kiseki фігуруюць круцейшыя прадстаўнікі японскага хіп-хоп андэграўнду. Тэрмінова кідай у плэер!

 

 

 

Фуд-дызайн тыдня:

 

 

«Не кісні – на вясёлцы завісні!» – гэты дакучлівы слоган Skittles страціў актуальнасць у сувязі з LGBT Pride Month у Вялікабрытаніі. Вытворца выпусціў абмежаваную серыю бескаляровых дражэ ў бясколернай упакоўцы. Усё з той нагоды, што «падчас прайду толькі адна вясёлка мае значэнне».

 

 

 

 

Файт тыдня:

 

 

Па YouTube ходзіць адзіны відэазапіс рэальнага бою з удзелам легендарнага байца чорна-белых кінаэкранаў – Бруса Лі. «Бацька ММА» біўся са сваім вучнем Тэдам Вонгам па правілах змяшаных адзінаборстваў у школе «Джыт Кун Да», якую заснаваў сам Лі. Згодна з тагачаснымі правіламі, супернікам прыйшлося карыстацца ахоўнай амуніцыяй.

 

 

 

 

Звальненне тыдня:

 

 

У чальца рады дырэктараў Uber Дэвіда Бандэрмана ўсяліўся Руслан Белы, не інакш: спадар Бандэрман заявіў, што большая колькасць жанчын у праўленні прывядзе да большай колькасці балбатні. Няўдалы жарт каштаваў Бандэрману пасады. А вось жыві ён у Беларусі, мог бы спакойна ўціраць нават пра самцоў, самак, непрыгожы памер грудзей і «галоўнае, каб жанчына дарыла радасць мужчыне».

 

 

 

Госць тыдня:

 

 

На Тураўскім лузе ўпершыню вывеліся птушаняты шыладзюбкі (ты толькі глянь, якія мілахі!). Сёлета велічна разлітая Прыпяць падалася залётнай птушцы лепей за балтыйскае ўзбярэжжа і львоўскія кар'еры. Чаму гэта паўнавартасная нагода падняць келіх пеністага – даведаешся па спасылцы. Заадно чытні наш рэпорт з прыпяцкага раю.

 

 

 

Геатэг тыдня:

 

 

Глядзі, у што ператвараецца зялёная даліна пад націскам адкідаў горназдабыўчай вытворчасці. Пад рудой вадою ўжо схаваліся вясковыя могілкі і царква, а ўсё, што яшчэ маячыць над роўняддзю таксічнага возера, намагнічвае прафесійных фатографаў і непрафесійных інстаграмераў. RIP, Джамана.

 

 

Улоў збіралі Zamandarin, Sheeborshee і Manaxrom