Анансаваная праграма тыдня супраць расізму

«Думаеш, што ў Беларусі няма расізму, бо няма генацыду, прамой сегрэгацыі і сучасных гета? У нас для цябе дзве навіны. Дрэнная – расізм ёсць. <...> Добрая – мы распавядзем табе аб гэтым больш падрабязна і прапануем сумесныя дзеянні для вырашэння гэтых праблем», – паведамляецца ў анонсе мерапрыемства.

Падчас асветніцкага тыдня можна будзе даведацца пра шмат чаго новага, пазнаёміцца з неабыякавымі людзьмі, салідарызавацца з тымі, хто сустракаецца з дыскрымінацыяй, і падтрымаць іх. Удзел ва ўсіх паказах, дыскусіях, лекцыях, канцэртах бясплатны.

 Расклад тыдня такі: 

 16.03  – вялікі адукацыйна-забаўляльны ўік-энд «Розныя-Роўныя». Адбудзецца лекцыя-дыскусія «Як супрацьстаяць расізму і ксенафобіі ў эпоху постмадэрну?», Жывая Бібліятэка, канцэрт з удзелам гуртоў «Тлушч» і «ксілема». На мерапрыемстве будзе працаваць дзіцячая пляцоўка. Месца: Менск, Lo-Fi Customs (вул. Кастрычніцкая, 16/3). Час: з 13:00 па 22:00.

 19.03  – дыскусія па тэме дыскрымінацыі ад моладзевага клуба «ДысКут». Месца: Менск, культ. цэнтр «КОРПУС» (пр. Машэрава, 9/8). Час: з 18:30.

 20.03  – унікальны па змесце ўводны семінар у канцэпцыю гуманітарнага антыфашызму. Месца: Менск, «Другі паверх» (пр. Машэрава, 9/8). Час: з 19: 00.

 21.03  – лекцыя пра ісламскае вымярэнне Менска ў рамках выставы «Моваланд», а таксама постдыскусія. Месца: Менск, галерэя «Ў» (вул. Кастрычніцкая, 19). Час: з 19:00.

 22.03  – прагляд дакументалкі «Гуляе як дзяўчынка» пра гендарную дыскрымінацыю ў спорце. Прадугледжана абмеркаванне ўбачанага з удзелам рэжысёра. Месца: Менск, «Другі паверх» (пр. Машэрава, 9/8). Час: з 19: 00.

 23.03  – майстар-клас па коміксах ад праекта Mainbooks. Прагляд кіно і дыскусія. Месца: Берасце, «Прастора КХ». Час: з 15:00.

Апдэйты і падрабязнасці па змесце з’яўляюцца тут і тут.

Валдзіс Фугаш

праваабаронца, сузаснавальнік Human Constanta:

«Як заўважаюць BBC i Bloomberg, пагроза з боку людзей і палітыкаў, якія лічаць дапушчальнымі і нават неабходнымі дыскрымінацыю і гвалт у дачыненні “іншых”, ужо набывае масавы характар. І тут Беларусь таксама не ў “бурбалцы”: з праблемамі рознага ўзроўню (ад абразлівых жартаў да абмежаванняў на ўзроўні законаў ды прамога фізічнага гвалту) сутыкаюцца жанчыны, мужчыны, людзі з інваліднасцю, прадстаўнікі і прадстаўніцы розных этнічных ды рэлігійных груп, людзі-ЛГБТК+ і іншыя.

Мы ведаем, што гэта не норма жыцця. Важна ўмець папярэджваць, заўважаць і рэагаваць на такія выпадкі, каб нашае асабістае жыццё, жыццё грамадства, краіны і свету было лепшым.

Мы хочам жыць у Беларусі і свеце, дзе кожны і кожная могуць карыстацца сваімі правамі, шукаць сваё шчасце і мець магчымасць самарэалізацыі без якой-небудзь дыскрымінацыі, незалежна ад гендару, паходжання, стаўлення да рэлігіі і веравызнання, грамадзянства, сэксуальнасці і любых іншых прыкметаў.

Мы верым у тое, што веды і нават мінімальныя салідарныя дзеянні могуць змяняць грамадства да лепшага».

Дадзены тэкст падрыхтаваны ў рамках кампаніі #Stophateby.