Пераможцы RADA Awards 2017: хто ўсе гэтыя людзі?

 Намінацыя: 

«Моладзевая ініцыятыва/праект у сферы мастацтва»

 Праект «Ідэальная вулічная прастора» 

Праект «Ідэальная вулічная прастора» ад майстэрні «ШЦ architects» – ідэал, які маладыя архітэктары ўвасобілі ў публічнай прасторы. «Ідэальны хмарачос» з’явіўся на лужку ў канцы Кастрычніцкай у межах фестывалю Vulica Brasil. Вядома, ён не ідэальны і не хмарачос – гэта, хутчэй, такая самаіронія архітэктараў. У драўляным каворкінгу на адкрытым паветры ёсць невялікі гародзік, барная стойка і паліцы для буккросінгу. Ад сонечных батарэй тут можна падзарадзіць гаджэты: ёсць нават спецыяльныя раздымы. Ну што, хіба гэта не ідэальная вулічная прастора?

 Намінацыя: 

«Адукацыйная моладзевая ініцыятыва/праект»

 Праграма Youth Work Pool ад «Фіяльты» 

«Пул моладзевай працы» – гэта курс, распрацаваны «Фіяльтай» для актывістаў і актывістак, якія працуюць з моладдзю і хочуць коўчыць моладзевыя ініцыятывы далей і лепей. Трэнеркі – Марына Корж, Юлія Станкевіч, Ганна Агеева, Святлана Зінкевіч і Вольга Аполька. Выпускны вечар курса прайшоў без бальных сукенак і вальсаў – у сапраўдным басейне. Ты ўжо заўважыў(-ла) гульню словаў? Pool – гэта «басейн» па-англійску. Праўда, кажуць, што даведка ў басейн такі была патрэбная.

 Намінацыя: 

«Рэгіянальная моладзевая ініцыятыва/праект»

 Жывая Бібліятэка ў Віцебску 

Жывая Бібліятэка ў Віцебску – гэта дачка вялікага праекта Жывая Бібліятэка, пра які не чуў(-ла) толькі той(тая), хто зусім у танку. Тут няма кніг у традыцыйным разуменні гэтага слова. Замест іх самі людзі дзеляцца ўласнымі гісторыямі і досведам, які можа змяніць чыйсьці мікракосм. Праект пазбаўляе ад пекла забабонаў у адносінах да Іншага і вучыць эмпатыі.

Ініцыятыву ў Віцебску падхапілі Вольга Яфрэмава і Юлія Буевіч. Мерапрыемствы рэгулярна праходзяць у бітлз-клубе «Чердачок» з перыядычнасцю раз на паўтара месяца. Над івэнтам працуе каманда з 10 чалавек, які наведвае ў сярэднім каля 80 чалавек.

 Намінацыя: 

«Экалагічная моладзевая ініцыятыва/праект»

 Кампанія «My cup, please!» 

Кампанія супраць аднаразовых кубачкаў «My cup, please!» разгарнулася гэтым летам. Распачалі яе выпускніцы моладзевага адукацыйнага цэнтра «Экастарт» пры падтрымцы Цэнтра экалагічных рашэнняў і таварыства «Зялёная сетка». Стварылі нават адмысловую мапу з пазнакамі, дзе дакладна наліюць напой у твой кубак, бо санітарныя нормы гэтага не забараняюць.

Забіраючы ўзнагароду, арганізатаркі папрасілі прабачэння ва ўсіх, каму дакаралі ўвесь апошні час. «І помніце: папяровыя кубачкі немагчыма або складана перапрацаваць, і для эколагаў гэта сапраўдная катастрофа», – заўважыла Анора Лангар, экаактывістка і адна з ініцыятарак кампаніі. Ну а мы зрабілі глыток з крыштальнага фужэра.

 Намінацыя: 

«Моладзевая ініцыятыва/праект у сферы правоў чалавека»

 Community Centre для падтрымкі ЛГБТК+ ды іх блізкіх 

Community Centre дапамагае ЛГБТК+ людзям і іх блізкім. Тут могуць аказаць юрыдычную і псіхалагічную падтрымку. Каманда ладзіць выставы, адукацыйныя івэнты, гульнятэкі Queerspace, семінары, трэнінгі і квір-фестываль DOTYK. Па прыз на сцэну ад ініцыятывы выйшла менеджарка Community Centre, гендарная даследчыца, стваральніца форум-тэатра для анкалагічных пацыентаў і майстрыца на ўсе рукі Алена Агарэлышава.

 Намінацыя: 

«Прыз глядацкіх сімпатый»

 Культурны цэнтр «Корпус» 

У гэтай намінацыі прыз дастаўся «Корпусу», бо хто яшчэ любіць цябе, цябе і цябе – словам, усіх? «Корпус» ладзіць крутыя выставы, канцэрты на любы густ, барахолкі, калядныя маркеты і нават коўзанку зрабіў – усё знойдзеш тут!

«Калі б мы не атрымалі гэты прыз, то мы ўсё адно яго б атрымалі», – cказаў заснавальнік «Корпуса» Саша Багданаў падчас уручэння ўзнагароды і прадэманстраваў ключы ад будынка.

 Намінацыя: 

«Моладзевая ініцыятыва/праект у сферы сацыяльнага прадпрымальніцтва»

 Сацыяльнае прадпрыемства «Лабараторыя друку» 

Невялічкая прыватная фірма аказвае паслугі ксеракопіі, сканавання і друку фотаздымкаў на дакументы. Сярод сотні падобных кантор гэтую вылучае тое, што здымаюць, скануюць дакументы і робяць фотаздымкі тут людзі з інваліднасцю. Гэта сумесны праект прадпрыемства «Каштоўны капітал» і тэрытарыяльнага цэнтра сацыяльнага абслугоўвання насельніцтва Маскоўскага раёна.

Зміцер Клімковіч, дырэктар «Каштоўнага капіталу», кажа, што загарэўся ідэяй стварыць працоўныя месцы для людзей з інваліднасцю, каб яны маглі без праблем сацыялізавацца і адаптавацца. Кошты на паслугі тут вельмі даступныя, бо на арэнду памяшкання дзяржава дае льготы. Карацей, рабяты няхіла ўплываюць на баланс белага і плануюць не спыняцца далей.