Што рабіць, калі тваіх блізкіх затрымалі?

Па якой прычыне затрымліваюць?

Закон не адпавядае міжнародным стандартам і сфармуляваны настолькі некарэктна, што парушыць яго можна, калі проста пляскаць у далоні ці разам з сябрамі займацца спортам у парку. Нават на дазволеных акцыях міліцыя можа проста не ўпадабаць твой плакат. Дастаткова апынуцца не ў тым месцы і не ў той час. Часцей за ўсё затрыманыя падчас акцый пратэсту праходзяць па арт. 23.34. КоАП «Парушэнне парадку арганізацыі або правядзення масавых мерапрыемстваў» і па арт. 23.4. КоАП «Непадпарадкаванне законнаму распараджэнню ці патрабаванню службовай асобы пры выкананні ёй службовых паўнамоцтваў».

Дзе шукаць затрыманых?

Адразу шукай праз СМІ і сайт «Вясны» інфу пра тое, у якім РУУС могуць быць затрыманыя. Тэлефанаваць у Бюро рэгістрацыі няшчасных выпадкаў ГУУС Менгарвыканкама – даволі бесталкова, але чым чорт не жартуе. Калі што, тэлефонныя нумары шукай тут.

Калі праз шмат гадзін чалавек не выходзіць на сувязь, тэлефануй адразу ў ЦІП. Адрасы і тэлефоны ЦІП, ІЧУ, РУУС і судоў Менска знойдзеш тут.

Першая дапамога

Адразу бі трывогу ў праваабарончы цэнтр «Вясна», калі даведаешся пра затрыманне знаёмых. Звярніся ў цэнтр па дапамогу і кансультацыю.

Калі дакладна вядома, што чалавек затрыманы і знаходзіцца ў ЦІПе, можна знайсці адваката самастойна ці з дапамогай «Вясны». Праўда, у РУУС яго не пусцяць, хоць і можна па кодэксу. Натуральна, адвакат не бог, але прынамсі ён/яна будзе мець доступ да матэрыялаў справы і наглядна адлюструе той самы кафкіянскі бок працэсу.

Важна даведацца праз ЦІП ці праваабаронцаў, у якім РУУСе знаходзіўся затрыманы(-ая), каб потым чакаць яго/яе у тым жа судзе.

Суд

Як правіла, судовы працэс адбываецца на наступны дзень пасля затрымання. Да 9-10 раніцы ў суд прывозяць затрыманых гуртам з Акрэсціна на аўтазаку, але бывае па-рознаму. У судзе разбіраюцца, каго да якога/якой суддзі накіраваць і ў колькі. Пасля на стэнды вывешваюць спісы з інфармацыяй. Гэты працэс можа цягнуцца ўвесь дзень.

Калі інфармацыі на стэндах няма, смела ідзі ў кабінет старшыні суда і запытвайся, каму з суддзяў ён размеркаваў справу твайго(-ёй) знаёмага(-ай). Патрабуй, каб інфармацыя з’явілася на стэндах, якія звычайна знаходзяцца ля ўваходу.

Пасяджэнне ў судзе адкрытае для ўсіх. Гуказапіс працэсу можна весці без папярэджання, а для фота і відэа патрэбны дазвол суддзі.

Арышт

Ёсць тры месцы, куды адпраўляюць адміністратыўна арыштаваных:

– Цэнтр ізаляцыі правапарушальнікаў на Акрэсціна (г. Менск, 1-ы завулак Акрэсціна, 36). Там жа знаходзіцца і ІЧУ (г. Менск, 1-ы завулак Акрэсціна, 36а);
– Цэнтр ізаляцыі Менскага РУУС (г. Менск, вул. Ф.Скарыны, 20);
– Жодзінскі РУУС (г. Жодзіна, вул. Сухаградская, 1).

У ІЧУ трымаюць арыштаваных па крымінальных справах, у ЦІПе – па адміністрацыйных. Калі ЦІП забіты, частку адміністратыўна арыштаваных садзяць у ІЧУ. Калі месцаў у Менску няма, адпраўляюць у Жодзіна.

У цябе не будзе аніякай сувязі з затрыманым(-ай) на тэрмін арышту. Сустрэчы і тэлефонная сувязь з арыштаванымі на суткі забароненыя. Лісты ад іх не прыходзяць таксама. Падрыхтуйся да інфармацыйнага вакууму.

 Калі тэрмінова трэба звязацца з арыштаваным(-ай), пабачыць яго/яе можа толькі адвакат.

Хто можа перадаваць перадачы?

Каб затрыманы(-ая) на «суткі» атрымаў(-ла) тваю перадачу, неабходна выканаць шэраг фармальнасцяў. Проста прыйсці на Акрэсціна з мехам смакоцця і перадаць яго кудысьці ў акенца не атрымаецца.

Прымаюць перадачы толькі ад блізкіх сваякоў: маці, бацькі, сястры, брата, жонкі, мужа, дзяцей, бабулі, дзядулі. У цябе абавязкова спытаюць пашпарт. У некаторых выпадках могуць запатрабаваць яшчэ і пасведчанне аб нараджэнні.

Грамадзянскія жонкі маюць шанец прарвацца з перадачай, прад'явіўшы пашпарт агульнага дзіцяці.

Можна паспрабаваць прадставіцца зводным братам або сястрой. Кажуць, спрацоўвае часцей у тым выпадку, калі імя па бацьку ў вас супадае. Але лепш усё ж кааперавацца і аддаваць перадачы са сваякамі.

Калі ты чалавеку на «сутках» не сваяк(-чка), але яго сваякі не могуць прыехаць самі або іх няма ўвогуле, можна наладзіць працэс з дапамогай адваката. З ім арыштаваны(-ая) аформіць заяву аб тым, што будзе атрымліваць перадачы не ад сваяка, а ад цябе.

Якія агульныя патрабаванні да перадач?

Афіцыйны дакумент, які рэгулюе пытанне, – пастанова МУС Рэспублікі Беларусь ад 30.11.2017 «Аб зацвярджэнні Правілаў унутранага распарадку ізалятараў часовага ўтрымання органаў унутраных спраў» (глядзі главу 9). Але важна мець на ўвазе, што адміністрацыя любога ізалятара можа ўвесці нейкія «папраўкі» сваім унутраным распараджэннем.

Прад'яўленне пашпарта – умова абавязковая.

Стандартна перадачу прымаюць раз на суткі, але інтэрвал можа рэгулявацца ўнутранымі распараджэннямі. ІЧУ ў Менску на 1-м завулку Акрэсціна прымае перадачы з 14:00 да 16:00, ЦІП – з 10:00 да 13:00. Лепш удакладняць інфармацыю па дзяжурным тэлефоне.

Стандартнае абмежаванне для перадачы – да 5 кілаграм. Часам супрацоўнікі кажуць, што 5 кг – гэта ўсё, уключаючы ваду і кнігі, часам лічаць інакш. Але звычайна перадачу не ўзважваюць, так што можна спрабаваць перадаваць па максімуме.

Тое, што ў цябе прынялі на ўваходзе, але адфільтравалі пазней, захоўваецца ў ячэйцы арыштаванага(-ай) і вяртаецца яму (ёй) у момант вызвалення.