Праваабаронца Алена Танкачова вярнулася ў Беларусь

У 90-х Алена Танкачова стварыла Цэнтр прававой трансфармацыі Lawtrend. Галоўная мэта – аказанне прафесійнай юрыдычнай і экспертнай падтрымкі некамерцыйным арганізацыям Беларусі, а таксама дапамога пры парушэнні правоў чалавека. Таксама Алена прымала ўдзел у радзе «Зялёнай сеткі», Нацыянальнай платформе Форуму Усходняга Партнёрства і міжнародных гуманітарных ініцыятывах.

У лютым 2015 года Алену дэпартавалі з Беларусі з забаронай на наведванне краіны на працягу трох гадоў. Танкачова – грамадзянка Расіі, аднак да гэтага жыла ў Беларусі на працягу 30 гадоў. Афіцыйная прычына высылкі – парушэнне ПДР, аднак праваабарончая суполка лічыць дэпартацыю Алены помстай за яе актыўную прафесійную дзейнасць. Яе калегі неаднаразова падавалі звароты ў МЗС і МУС з патрабаваннем адмяніць або скараціць тэрмін забароны Танкачовай на ўезд у Беларусь, але кожны раз атрымлівалі адмову.

На працягу трох гадоў Алена жыла ў Вільні. Там яна атрымала дыпламатычны статус амбасадоркi Рэспублікі Ужупіс з правам адкрыцця рэзідэнцыі Рэспублікі ў беларускай вёсцы Каптаруны. Зараз Танкачова збіраецца атрымаць грамадзянства Беларусі.

«Для маёй сям’і высылка была выпрабаваннем, усе перажывалі, але падтрымлівалі. Некаторых сваіх сяброў у Вільні часцей бачыла, чым у Менску. Пакуль ты дома і ўсё добра, то часам забываеш патэлефанаваць ці сустрэцца. А калі ёсць цяжкасці, робіцца зразумела, хто побач, хто не», – кажа Алена пасля вяртання.

Першае інтэрв'ю Алены Танкачовай пасля вяртання чытай на Радыё Свабода.

Вiзуал: tut.by