34 Media Days: талака па-беларуску

34 Media Days vol. IV

За мінулы год-паўтара Беларусь перажывала недахоп сонечных дзён ды не самыя спрыяльныя эканамічныя абставіны, а ў нашым асяроддзі здарылася шмат маленькіх, але важных перамог.

Беларусы і беларускі паспяхова збіралі грошы на выданне кніжак і музычных альбомаў, літаральна за дзень скінуліся на ўдзел Віталя Гуркова ў Чэмпіянаце свету па муай-тай (ды амаль адправілі яго туды), падтрымалі журналісцкія расследаванні «Нашай Нівы», дапамаглі вялікай колькасці сацыяльна важных праектаў не толькі фінансава, але і ўласнымі ўменнямі.

Вядома, немагчыма прайсці міма і не згадаць галавакружную гісторыю поспеху часопіса «Имена», які, зрэшты, толькі пачынае набіраць сваю моц. І ўсе гэтыя прыклады – толькі частка доўгага спіса дасягненняў супольнасці. Мы зразумелі, што дзеля канкрэтнай мэты – крок за крокам – мы хочам і можам аб’ядноўваць намаганні.

Што такое талака для сучаснай беларускай супольнасці? У якіх формах яна працуе ў эпоху влогераў і бесперапыннага доступу да навінаў і мэсэнджараў? Ці галасаванне рублём за той ці іншы праект замяняе нам паход з бюлетэнем да урны? Ці можа «лакальная» талака перайсці на вышэйшы ўзровень і змяніць, напрыклад, спосаб размеркавання падаткаў? Тэма сустрэчы – «Як працуе талака ў эпоху новых медыя?».

Запрашаем абмеркаваць у коле экспертаў, у дасягненні якіх мэтаў можа дапамагчы краўдфандынг. Разам пагаворым пра неабходныя складнікі паспяховага праекта, ці то запуск уласнай лініі адзення, ці адкрыццё інклюзіўнай спартыўнай пляцоўкі.  

Напэўна, ты таксама задумваешся папрасіць суайчыннікаў пра падтрымку сваёй ідэі. Гэты івэнт дапаможа табе зразумець, як набраць ветру ў ветразі ды прыступіць да рэалізацыі.

Падзея пройдзе ў фармаце ток-шоу – спярша госці падзеляцца сваімі думкамі на згаданую тэму, пасля чаго пачнецца адкрытая дыскусія з удзелам мадэратаркі і слухачы атрымаюць магчымасць задаць свае пытанні.

Запрашаем усіх, хто хацеў бы даведацца, якія формы талакі і краўдфандынгу працуюць у Беларусі, у чым сакрэт поспеху праектаў. Падзея будзе карысная і тым, хто толькі задумваецца пра запуск уласнага праекта.