34mag

Імянное мастацтва

16.05.2017
Аўтар: Violetta Savchits
10993

Ужо больш за паўтысячы чалавек наведалі арт-праект часопіса «Имена» ў «Корпусе». Калі ты з нейкіх прычын прапусціў(-ла) вернісаж, яшчэ ёсць час унікнуць у сутнасць інсталяцый. Тым больш дадатковая праграма івэнтаў у межах арт-праекта – самы сок. Аглядаем выставу з ног да галавы, а таксама пытаемся ў мастакоў і мастачак, навошта ўвесь сыр-бор.

Арт-праект «Имена» – гэта дзесяць інсталяцый сучасных мастакоў і мастачак на тэму дзесяці гісторый, распаведзеных часопісам. Куратаркі выставы – Антаніна Сцебур і Аня Карпенка.

«Для нас з Антанінай Сцебур гэта вельмі важны праект, у якім сустракаецца сучаснае мастацтва і грамадства ў цэлым. Мы прапануем гледачам актыўна ўключацца ў прадстаўленыя інсталяцыі. Можна глядзець не з бяспечнай адлегласці, а быць унутры інсталяцыі, напрыклад, на ложку, як прапануе Сяргей Гудзілін. Або натхніцца працай арт-групы Hutkasmachna, адшукаць у Менску два прытулкі для бяздомных і адчуць, як гэта, калі твой дом – гэта набор кардонных скрынак, – кажа Аня Карпенка. – Інклюзія для нас – гэта не толькі прадстаўленасць мастацкіх работ людзей з асаблівасцямі развіцця, але таксама ўключэнне максімальнай разнастайнасці падзей, тэм і сустрэч, якія адбываюцца ў рамках дадатковай праграмы выставы “Имена”».

Важны нюанс: уваход на выставу ад 3 рублёў і да бясконцасці – гэта квіток-ахвяраванне. Акрамя таго, можна аплаціць уваход дзякуючы сэрвісу МТС, калі даслаць смс на нумар *222*12# (толькі для абанентаў МТС). Усе сродкі, выручаныя ад продажу квіткоў, ідуць на падтрымку часопіса «Имена».

17 траўня, серада Top Choice

14:00 – прэзентацыя праекта «Штурман», экскурсія для слабавідушчых з выкарыстаннем прылады «Штурман»

Дакладна must see. З дапамогай мабільнай аплікацыі сляпыя і слабавідушыя людзі могуць камфортна адчуваць сябе ў любым месцы – ад супермаркета да музея. Напрыклад, бацькі дзіцяці з інваліднасцю па зроку могуць дапамагчы яму прыгатаваць ежу выдалена. На прэзентацыі пакажуць, як працуе праект «у дзеянні», і для слабавідушчых людзей правядуць экскурсію з дапамогай аплікацыі.

19:00 – дакументальны спектакль «Шэрая вясёлка», пабудаваны на аснове дзясяткаў інтэрв’ю з рознымі людзьмі

Спектакль-даследаванне выпускнікоў Eclab складаецца з гісторый рэальных людзей, якія жывуць побач з табой. Удзельнікі праекта некалькі месяцаў запісвалі інтэрв’ю з рэальнымі людзьмі на вуліцах Менска, каб пасля распавесці пра тое, што хвалюе кожнага.

18 траўня, чацвер

11:00 – круглы стол «За зачыненымі дзвярыма: праблема хатняга гвалту» для журналістаў і актывістаў з удзелам прытулку «Радзіслава», арганізацыі «Гендарныя перспектывы».

20 траўня, субота Top Choice

14:00 – экскурсія па выставе ад куратараў праекта на мове жэстаў

Табе сюды, калі ты хочаш больш даведацца пра тое, як задумваўся і ўвасабляецца арт-праект «Имена». Распавядуць і гісторыі, звязаныя з працай кожнага з 10 мастакоў праекта.

20:00 – Ноч музеяў (вялікі 3D мэпінг)

Будзе Ноч музеяў і будзе горача. Прама на фасадзе культ. цэнтра «КОРПУС» спраектуюць маштабны 3D-мэпінг з мультыплікацыйнымі персанажамі мультстудыі «Мы ёсць». Студыя працуе з дзецьмі з асаблівасцямі развіцця (з аўтызмам і сіндромам Даўна), а таксама з выхаванцамі інтэрната.

21 траўня, нядзеля Top Choice

15:00 – адкрытая лекція Крысціяны Куцікіо з Германіі, майстар-клас па інклюзіі ў мастацтве

Ініцыятар і дырэктар атэлье «Гальштэйн» для асаблівых мастакоў і аднайменнай галерэі распавядзе, як яны цягам сямі гадоў удзельнічалі ў рэстаўрацыі і афармленні царквы Marienkirche. Гэта адзіная ў свеце царква, дзе кананічныя вобразы і алтар зрабілі мастакі з аўтызмам і з сіндромам Даўна.

22 траўня, панядзелак

19:00 – мастацтва ўзаемадзеяння на прыкладзе арт-праекта «Имена» (Антаніна Сцебур, Ганна Карпенка, Ганна Самарская)

Прыходзь паслухаць пра тое, што такое інклюзіўныя праекты ў сучасным мастацтве і якую ролю выконвае мастацтва ў сацыяльным кантэксце.

23 траўня, аўторак

10:00 – бізнэс-сняданак па КСА для журналістаў, маркетолагаў (Што такое КСА? Як выбраць сацыяльныя праекты? Як зрабіць КСА часткай сваёй PR-стратэгіі?)

24 траўня, среда

19:00 – медыя-пікнік па сацыяльным кіно (у рамках Тыдня Даступнасці ў Менску)

25 траўня, чацвер

19:00 – афіцыйнае закрыццё праекта

19:30 – інтэрактыўны перформанс, завяршальны рух «Сустрэча»

Мы запыталіся ў мастакоў і мастачак, навошта ісці на выставу часопіса «Имена».

Аляксандр Васюковіч:

– На выставу варта схадзіць хаця б таму, што звычайна пра такія праблемы грамадства гаворыцца ў СМІ і па тэлевізары. А тут пра ўсё тое ж гаварыцца на мове сучаснага мастацтва. Гэта бывае рэдка ў нас, і таму дакладна заслугоўвае ўвагі.

Сяргей Гудзілін:

– «Имена» – унікальная супольнасць, якая аформілася літаральна за адзін год. Ніхто тэматычна і канцэптуальна падобнага яшчэ не рабіў у Беларусі. Чалавечыя гісторыі, прапушчаныя праз візуальны досвед мастакоў абсалютна розных тэхнік, дазваляюць пабачыць зусім іншы свет. І сам прыход на выставу будзе не толькі актам дапамогі супольнасці часопіса, іх працы, але і персанальным крокам кожнага наведніка да разумення/прымання праблем людзей з інваліднасцю ў нашым грамадстве.

Сяргей Краўчанка (арт-група Hutkasmachna):

– На выставу трэба ісці, каб пашырыць свае ўяўленні пра тое, якім можа быць штодзённае існаванне, пра тое, як можна яшчэ быць – амаль выключаным, але выключным, амаль нябачным і нячутным, але яркім і жыццелюбным. Гэтая выстава, як мне здаецца, зусім не пра жаль і спачуванне да людзей, а пра іх сілу духу і прысутнасць у самасці жыцця, да чаго і выказана шмат павагі ў працах.

Воля Сасноўская:

– Трэба ісці, каб сутыкнуцца з рэальным, хоць і медыяваным, мастацтвам, жыццём рэальных людзей вакол нас. І адчуць у сабе сілы, магчымасць і жаданне рабіць навакольную рэчаіснасць лепш разам. А таксама ўбачыць, як сёння ў Беларусі мастацтва можа працаваць з сацыяльнай праблематыкай.

Маша Святагор:

– Гэты праект дае магчымасць аб’яднацца, далучыцца да нечага сапраўды важнага. Звярнуць увагу на чалавека і яго гісторыю. Гэта самае галоўнае. Мая любімая сяброўка, якая была на адкрыцці арт-праекта «Имена», сказала: «Гэта выстава пра тое, як важна чалавеку адчуваць сябе патрэбным, не забытым. Наколькі важная любоў і падтрымка для ўсіх людзей без выключэння».

Антаніна Слабодчыкава:

– Рэкамендую ісці на арт-праект «Імёны», па-першае, каб даведацца пра тое, якую важную працу робіць часопіс «Імёны». Па-другое, у гэтым мастацкім праекце сканцэнтравана мастацтва. Група куратараў і мастакоў дала вельмі дакладную рэфлексію на гісторыі рэальных людзей, што атрымала складанае, цікавае развіццё ў кожным творы.