Вакансіі: vol. 1

Дызайнерскае агенцтва PocketRocket, напэўна, больш за ўсё вядомае дзякуючы арганізацыі фестывалю Freaky Summer Party. Таксама яно займаецца айдэнтыкаю, дызайнам мабільных дадаткаў і сайтаў, фота- і відэаздымкай – карацей, робіць навакольны свет прыгажэйшым i зручнейшым. Офіс – у цэнтры Менску, каманда – маладая і баявая, праца – мара. Цяпер у PocketRocket шукаюць дызайнера і капірайтара. Калі ты бесперастанку вывяргаеш з сябе слушныя ідэі ды ўжо даказаў гэта ў digital-сферы, табе сюды. Да таго ж праз сакрэтныя каналы нам удалося даведацца, што PocketRocket шукае яшчэ і проджэкт-менеджара для самога FSP!

Асноўныя патрабаванні да дызайнера:

упэўненае валоданне Adobe Photoshop, Illustrator, Indesign;

досвед працы ад 5 гадоў;

нездаровы перфекцыянізм.

Асноўныя патрабаванні да капірайтара:

распрацоўка інавацыйных механік, сцэнароў, слоганаў;

разуменне трэндаў і магчымасцяў рынку;

досвед працы з digital, івэнтамі.

Асноўныя патрабаванні да проджэкт-менеджара:

уяўленне таго, што такое Freaky Summer Party;

досвед рэалізацыі масавых мерапрыемстваў.

Лакацыя: Менск.

 Кантакты: Сайт  |  Пошта denis@pocketrocket.by

Team leader. Viber

Наш нацыянальны гонар – Viber – шукае лідара каманды праекту для працы з плацяжамі, звязанымі з мабільнымі кліентамі. Неабходна браць удзел у стварэнні сістэмы, пакрываць код тэкстамі, весці тэхнічную дакументацыю і, вядома, умець спрытна кіраваць бандаю праграмістаў. Дарэчы, праграмістаў розных спецыялізацыяў Viber таксама шукае.

Асноўныя патрабаванні да team leader:

экспертнае веданне OOP і design patterns;

досвед працы з PHP 5.5+;

экспертнае веданне MySQL;

досвед працы з RESTful API;

здаровы сэнс.

Лакацыя: Менск.

Кантакты: Сайт | Пошта support@viber.com

Вэб-рэдактар. Рэгіянальная газета

Незалежная газета, якая асвятляе падзеі Маладзечна, Вілейкі, Смаргоні, Ашмянаў, Валожыну, Мядзелю і Астраўца, шукае шматзадачнага работніка да сябе ў штат. Калі ты сябруеш з графікаю, а таксама падумваеш кінуць усё і з’ехаць у Маладзечна, табе сюды. Наш рэпорт пра «Рэгіянальную газету» чытай тут.

Асноўныя патрабаванні да вэб-рэдактара:

свабоднае валоданне беларускаю мовай;

уменне пісаць журналісцкія матэрыялы;

уменне фатаграфаваць, здымаць і мантаваць відэа;

валоданне Adobe Photoshop ці іншымі праграмамі для апрацоўкі фота і стварэння калажаў, плакатаў.

Лакацыя: Маладзечна.

Кантакты: Сайт | Пошта regionnews@rh.by

Бармен, афіцыянт. SVOBODY.4

SVOBODY.4 – бар, які імкліва згуртаваў аматараў віна і добрай музыкі. Тут круцяць вініл, прапаноўваюць дзясяткі гатункаў вінаў з розных краінаў, праводзяць модныя дзвіжухі. Быць тут – суцэльнае эстэтычнае задавальненне. Цяпер бар шукае аднадумцаў, абазнаных у віннай культуры і ахвотных дзяліцца гэтымі дабратворнымі ведамі з гасцямі бару. Таксама нам паведамілі, што шукаюць яшчэ і афіцыянта ў сваю кампанію. Любоў да віна абавязковая, а досвед працы – не.

Асноўныя патрабаванні да бармена:

узрост ад 21 года;

веданне англійскай мовы;

цікавасць да віна ды імкненне вучыцца і развівацца.

Асноўныя патрабаванні да афіцыянта:

узрост ад 21 года;

выхаванасць, ветлівасць;

веданне англійскай мовы;

хуткія ногі ды акуратныя рукі.

Лакацыя: Менск.

Кантакты: Сайт  |  Пошта bar@svobody4.com  |  FB

Сакратар. Радыёстанцыя «Unistar»

Радыёстанцыя, чыёй трансляцыі ты воляй-няволяй у думках падпяваеш, тэрмінова шукае сакратара. Пішуць, што досвед гэткай працы пажаданы (але, верагодна, не абавязковы). Так што калі ў цябе ёсць пякучае імкненне пранікнуць у свет музычнага эфіру, то вось табе шанец.

Асноўныя патрабаванні да сакратара:

вядзенне справаводства;

английска-рускія і руска-англійскія пераклады дакументаў;

забеспячэнне працы офісу.

 Лакацыя: Менск.

Кантакты: Пошта jurist@unistar.by  |  Сайт

Senior Java Developer. EffectiveSoft

Праца для сапраўдных профі! Праграмерская фірма EffectiveSoft актыўна супрацоўнічае з замежнымі заказчыкамі ды цяпер прапаноўвае вакансію з працяглаю камандзіроўкай (ці некалькімі рэгулярнымі) у Швецыю або Фінляндыю, а таксама магчымай рэлакацыяй і працаўладкаваннем у адной з гэтых краінаў. Заказчыкам выступае кампанія-распрацоўнік фрэймворку Vaadin, ад праграміста патрабуецца праца з яе праектамі ды выкарыстаннем гэтага фрэймворку.

Асноўныя патрабаванні да Senior Java Devepoler:

упэўненае валоданне web-тэхналогіямі ды Java;

досвед працы з Vaadin Framework;

веданне англійскай мовы.

Лакацыя: першапачаткова – Менск, затым Швецыя або Фінляндыя.

Кантакты: Сайт  |  Пошта ekaterina.zimich@effective-soft.com

Хостэс. Кавярня «Бітлджус»

Кавярня з вегетарыянскім і класічным меню «Бітлджус» шукае хостэс на лета і нават разглядае кандыдатуры студэнтаў. Звярні ўвагу на гэтую вакансію, калі хочаш папрацаваць у прыемнай установе, схаванай у яблыневым садзе ў адным з ціхіх менскіх дваркоў. Кожную пятніцу тут танчаць ліндзі-хоп, часам праводзяцца джазавыя вечары, перыядычна зазіраюць знакамітасці. А яшчэ ўнутры ёсць музычны аўтамат!

Асноўныя патрабаванні да хостэс:

інтэлігентнасць, выхаванасць, адэкватнасць, камунікабельнасць;

досвед працы ў рэстаранным бізнэсе.

Лакацыя: Менск.

Кантакты: Пошта beetlejuice.art@gmail.com  |  VK  |  FB

Travel-адмысловец. EPAM Systems

Вось яна, праца мары – падарожнічаць і дапамагаць рабіць гэта іншым, хоць і ў межах рабочага працэсу. Ты і сам ведаеш, што такое EPAM, а цяпер табе будзе вядома і тое, што кампанія шукае travel-адмыслоўца. Ён мусіць арганізоўваць камандзіроўкі для працаўнікоў фірмы: афармляць візы, купляць квіткі, букаць гатэлі, вырашаць спадарожныя пытанні. Пры гэтым у яго самога будуць пастаянныя падарожжы ў іншыя краіны паводле працоўных справаў. Гучыць казачна, таму і патрабаванні адпаведныя.

Асноўныя патрабаванні да travel-адмыслоўца:

выдатнае валоданне вуснаю і пісьмоваю англійскай (прасунуты ўзровень);

вышэйшая адукацыя;

досвед жыцця ў ЗША, Канадзе або краінах Еўразвязу;

досвед арганізацыі працоўных візаў у ЗША, Канаду і Еўразвяз;

добрае валоданне MS Office і ўменне хутка навучацца новым камп’ютарным праграмам;

досвед падарожжаў.

Лакацыя: Менск ды іншыя гарады і краіны.

Кантакты: Пошта Violetta_Avseenko@epam.com  |  Сайт

Журналіст. 34mag.net

Мы ўвесь час шукаем сваіх аднадумцаў – дзёрзкіх і актыўных, лёгкіх на пад’ём, з агнём у вачах і сэрцах. У нашай мультымедыйнай камандзе патрэбныя ўніверсальныя людзі, якія ўмеюць і лонгрыд напісаць, і фотарэпорт прывезці, і відос зняць. Мы любім тых, хто адкрыты для новых досведаў і не баіцца браць на сябе адказнасць. Працы шмат, кнот запалім.

Асноўныя патрабаванні да журналіста:

уменне працаваць са словамі ды візуалам;

смеласць, нахабства, бясстрашнасць;

наяўнасць цікавых знаёмстваў і таемных ведаў.

Лакацыя: зямны шар.

Кантакты: Сайт  |  Пошта 34editors@gmail.com  |  FB