Навошта мы зрабілі новы 34mag?

А ўсё ж такі што здарылася са старым сайтам?

Здарылася цікавае: у выніку маральнага разлажэння нашай каманды і разбэшчанасці былых хостэраў серверы, на якіх фізічна захоўваўся наш цуда-часопіс, выйшлі з ладу. Нейкім містычным чынам бэкапы нашага сайту з бессэнсоўнаю паслядоўнасцю раз на тыдзень перазапісваліся на той самы сервер. Які, як ты ўжо зразумеў, на*бнуўся. Вонкавыя бэкапы ў нас былі, але чамусьці толькі за мінулы год. Карацей, на тое, каб аднавіць сайт у старым выглядзе і больш-менш прыстойнай кандыцыі, нам спатрэбіліся б 2–3 тыдні. Ну, акей, магчыма, – месяц. Мы вырашылі, што гэта задача для слабакоў, і пачалі працаваць над новым сайтам.

Такі ўжо і новы! А са старымі матэрыяламі што будзе?

Старыя матэрыялы і спецпраекты – як мінімум тыя з іх, што асабліва дарагія нашым гендарна чуллівым сэрцам, – будуць паціху адноўленыя ў раздзеле «Архіў» (ён з’явіцца пазней). Англійская і руская версіі часопісу таксама будуць, але не адразу. Частка старых рубрык уключна з матэрыяламі ўваскрэсне на новым сайце. «Правінцыя» з усімі яе гайдамі, гісторыямі ды актывістамі – ужо цалкам адноўленая і працуе як гадзіннік. «Пяршак» таксама знойдзеш на звыклым месцы. Але паступова мы будзем рухацца ў кірунку гарызонту, з кожным днём скідаючы старую скуру.

А што ўсё ж будзе новае?

Мы вярнулі «Афішу». Гэта будзе самая зручная афіша ever – без усялякіх левых падрабязнасцяў, усё толькі па справе (дзякуй за ідэю, Danila Berencef!). Мы завялі асобную старонку для нашага 34radio, якое ўжо лашчыць твой слых звонкімі мелодыямі беларускай і замежнай эстрады. Мы ўводзім унутрырэдакцыйны панятак «мікрафармату» і будзем абнаўляцца часцей. Таксама мы рыхтуем да выдання на «Першаку» новую кнігу і аўтаматную чаргу музычных рэлізаў. Яшчэ мы запланавалі некалькі відэапраектаў і offline падзеяў, зрабіць якія ў нас ужо чэшуцца рукі.

Я трохі тут ужо палазіў і бачу шмат багаў…

Мы іх таксама бачым. Але, можа, не ўсе. Пішы ў каментах пад гэтым пастом (калі каменты працуюць, вядома) ці кідай на пошту 34editors@gmail.com (лепей са скрынамі).

А вам патрэбныя новыя людзі ў каманду?

Так, патрэбныя. Перш-наперш, аўтары, якія ўмеюць распавядаць гісторыі пры дапамозе тэкстаў, фота, відэа, гукаў, ілюстрацыяў ды іншага. Па-другое, мы шукаем у каманду рэдактара з досведам працы ў сучасных медыях: абавязкова пісьменнага, з вострым розумам, арганізатарскімі здольнасцямі ды веданнем замежных моваў. Ну і трохі ё*нутага, вядома.

Калі ты – наш чалавек, пішы на 34editors@gmail.com. Калі ты ведаеш кагосьці з удзельнікаў каманды, можаш напісаць ім наўпрост. Але напішы, калі ласка, так, каб мы зразумелі, што ты нам патрэбны (то бок падрабязна, але па справе).

А інтэрны вам патрэбныя?

Так, пра пошук інтэрнаў і ўмовы іхнай катаржнай працы мы хутка напішам. Сачы за абвесткамі.

Я не хачу з вамі працаваць, але хачу, каб вы пра мяне напісалі.

Воў-воў, лягчэй! Калі ты робіш цікавы (як табе падаецца) івэнт, напішы нам на 34afisha@gmail.com. Нічога не гарантуем, але ліст прагледзім. Калі ты лічыш, што варты стаць героем нашых публікацыяў, пішы на 34editors@gmail.com. Мы любім нахабных.

Карацей, навошта вы зрабілі новы 34mag?

Бо 34mag фарэва.