Дзе студэнтам і студэнткам падзарабіць летам?

У «Депо» на Кастрычніцкай шукаюць кухара-барыста. Досвед працы не патрабуецца, а вось любоў да людзей, жаданне вучыцца і гатоўнасць да вялікага аб'ёму працы – абавязковыя.

Wake Up Coffee на Харужай шукае памочніка(-цу) барыста. Кампанія прапануе поўны курс навучання гатоўцы кавы і ўзаемадзеянню з гасцямі. Графік працы тут будзе гнуткі: 20-40 гадзін у тыдзень. У будучыні можна выйсці і на поўную стаўку.

«Перспектива. Кофе» таксама мае патрэбу ў памочніку(-цы) барыста. Працаваць трэба на Зыбіцкай: з цябе – работа з касай, узаемадзеянне з гасцямі і дапамога ў гатаванні, з кавярні – навучанне ў школе барыста, сістэма бонусаў і заработная плата ад 350 BYN.

Калі не хочаш расставацца з гульнямі нават на працы, станавіся адміністратарам кансольнага клуба. Трэба шарыць у Sony Playstation 4, кантактаваць з кліентамі і працаваць з сацыяльнымі сеткамі кампаніі. Абяцаюць заробак да 1200 BYN, афіцыйнае працоўнае афармленне і адэкватны дыялог з кіраўніцтвам.

На перыяд II Еўрапейскіх гульняў кампанія Bytechs.by. шукае сістэмнага адміністратара. Трэба ўстараняць непаладкі ў офіснай тэхніцы і кіраваць аперацыйнымі сістэмамі. Аплата пагадзінная – 5,5 BYN на рукі, а за ўвесь час менскіх ігрышчаў ты зможаш зарабіць 880 BYN.

Паспрабаваць сябе ў якасці адміністратара хостэла можна ў Hostel Trinity. Будзеш прымаць заяўкі па пошце і тэлефоне, весці справаздачнасць у Excel, засяляць гасцей. Твой гендар і адукацыя не маюць ніякага значэння: важныя базавыя веды ПК і англійскай мовы, камунікабельнасць ды ўменне пераключацца паміж задачамі.

Сэрвісу GetClean, які спецыялізуецца на ўборцы прыватных кватэр, патрэбны майстар-клінер. Асноўныя задачы: навядзенне чысціні ў кватэры, мыйка бытавой тэхнікі і чыстка пасля генеральнага рамонту. Узнагароджанне: навучанне за кошт кампаніі, страхаванне, зарплата ад 750 BYN. Плацяць пасля кожнай уборкі: іх за тыдзень трэба выканаць мінімум чатыры.

У Менск прыходзіць рэстаран Black Star Burger, а разам з ім – вакансія прыбіральніка. Досвед працы не патрабуецца, трэба мыць посуд і падтрымліваць рэстаран у чысціні. У якасці плюшак – зарплата ў 600 BYN, графік 2/2 і самая «мощщная команда».

Прыбіральшчыкам адкрыты дарогі нават у IT-індустрыю. Так кампанія Wargaming шукае клінера ў свой бізнэс-цэнтр: неабходна падтрымліваць у чысціні плошчу ў 600-800 кв. м. У абмен на працу абяцаюць дэмакратычную атмасферу, гнуткі графік і канкурэнтную зарплату, абароненую ад інфляцыі. Тут, праўда, чакаюць ад кандыдатаў гадавы вопыт працы, але раптам ты ўжо не зялёны(-ая) у гэтай справе.

Сушыльня «Суши Вёсла» шукае пешага кур’ера, які будзе дастаўляць а-ля японскія прысмакі ў дамы і офісы ў крокавай дасяжнасці ад пункта выдачы на Лібкнехта. Прапануюць афіцыйнае ўладкаванне, графік 2/2, дадатковыя бонусы на сілкаванне. Заробіш тут столькі, колькі даставак выканаеш: дзесьці ад 400 BYN.

Не падабаецца грамадскі транспарт – перасаджвайся на ровар. Сетцы фаст-фуду Easy Soup патрэбны кур’ер, які вандруе на ровары, гіраскутары або скейтбордзе. Задачы такія: дастаўляць заказы і прэзентаваць кліентам прадукцыю Easy Soup. Калі заказаў няма, табе прыйдзецца дапамагаць калегам у кафэ, за гэта свеціць бясплатнае навучанне і заработная плата да 1000 BYN. Добрыя навіны: можаш выбраць частковую занятасць і ў будучыні сумяшчаць вучобу з працай.

Калі ў цябе ўжо ёсць вадзіцельскае пасведчанне, звярніся ў Domino's Pizza: яны шукаюць кіроўцу-кур'ера, які будзе развозіць піцу ў начны час. Пагадзінная аплата і выручка за кожную дастаўку, прэміі і даплаты за безаварыйны стаж кіравання – такія бонусы чакаюць цябе за прывоз піцы і дадатковую працу ва ўстановах кампаніі.

Кампанія «Трансимпериал» адкрывае вэб-сэрвіс для сферы грузаперавозак, таму пашырае свой штат і шукае рэдактара. Разглядаюць кандыдатаў і без вопыту працы – важна толькі профільная журналісцкая адукацыя і жаданне працаваць. Працаваць трэба з 09:00 да 18:00 пяць дзён на тыдзень: пісаць артыкулы, рэпартажы і агляды, ствараць навіны, рэдагаваць тэксты і шукаць візуальныя матэрыялы.

Жаночы партал Velvet.by прапануе аплачвальную стажыроўку. Працаваць трэба будзе з медыякантэнтам і сацыяльнымі сеткамі. Працягласць стажыроўкі – тры месяцы. Плюсам для кандыдата/кандыдаткі будзе наяўнасць профільнай адукацыі: журналісцкай ці філалагічнай. Адклікайся на вакансію аповедам пра сябе, спісам СМІ/блогаў, з якіх любіш пачынаць дзень, і спасылкамі на асабістыя сацсеткі.

Службе дастаўкі ежы Menu.by патрэбны кантэнт-рэдактар, здольны напаўняць сайт разнастайнай інфармацыяй. Веданне англійскай і беларускай мовы неабходнае – будзеш займацца перакладамі меню. Афіцыйнае афармленне ў кампаніі пачынаецца з першага дня, зарплата – 400 BYN.

Пачаць сваю кар'еру ў грамадскім харчаванні можна з пасады памочніка афіцыянта ў рэстаране-бровары «Сябры». Табе забяспечаць заробак у 500 BYN, графік 2/2 і навучальны курс «Гасцінны сэрвіс». Наўзамен трэба будзе рыхтаваць установу да адкрыцця/закрыцця і абслугоўваць гасцей.

Вакансія афіцыянта выхаднога дня ў пякарні Brioche Paris – ідэальны варыянт для тых, хто хоча зарабіць грошай, не праводзячы ўсё лета на працы. Заробак стартуе ад 200 BYN, затое з’яўляцца тут трэба ўсяго два дні на тыдзень: у суботу і нядзелю. Задачы класічныя – камунікаваць з гасцямі і бойка прадаваць прысмакі.

Цяпер у Underdog можна не толькі вячэраць, але і працаваць. Афіцыянтам тут прапануюць штодзённае навучанне, кар'ерны рост і зарплату ў 1000 BYN. Дарэчы, чытай па спасылцы гісторыю самелье Underdog, магчыма, хутка будзеце ў адной камандзе.