Улоў #8

На мінулым тыдні здарыліся адразу дзве трагічныя падзеі. У панядзелак у метро Санкт-Пецярбурга прагрымеў выбух – 13 загінулых, каля 60 раненых. У пятніцу ў Стакгольме грузавік на пешаходнай вуліцы ўрэзаўся ў натоўп, вынік – 4 чалавекі загінула, 15 параненыя. На фотаздымках – піцерская і стакгольмская акцыі ў памяць ахвярам тэрактаў.

 

Чатыры гады таму разам з электроннымі ўладарамі дум – гуртам Moderat – зіхацеў яшчэ адзін калектыў, схільны больш да эксперыментальнай, хоць і такой жа моднай, электронікі, – дуэт Mount Kimbie. Праз чатыры гады творчага вакууму музыкі вяртаюцца з новым трэкам. Сыраватае гучанне цудоўна кладзецца на просты, але трывожны кліп, а вакал Джэймса Блэйка толькі дадае надрыву.

 

Адзін з галоўных камбэкаў гэтага года і, хочам сказаць, дужа ўдалы. На мінулым тыдні выйшаў іх новы кліп на песню «Самолет» – клоўзап імгнення, калі алей ужо разліты, але галава яшчэ не пакацілася. Насалоджваемся момантам! Дарэчы, тут канцэрт іх у Менску намячаецца.

Статыстычна цяпер жанчын бегае, у тым ліку і ў масавых забегах, больш, чым мужчын. Але яшчэ нейкіх 50 гадоў таму гэта было неймаверна. У 1967 годзе Кацярына Швітцэр зарэгістравалася як K.V. Switzer на бостанскім марафоне і стала першай жанчынай, якая даказала, што можа прабегчы 26,2 мілі нароўні з мужчынамі. Чытай, з якімі цяжкасцямі давялося сутыкнуцца Кацярыне.

Увесь мінулы тыдзень карыстальнікі сацсетак абмяркоўвалі новы рэкламны ролік Pepsi пра моладзевыя пратэсты. Пад натхняльную песню Скіпа Марлі (унука легендарнага Боба) паказваюць дэманстрацыю маладых людзей рознай нацыянальнасці і веравызнання. Яны граюць на інструментах, танцуюць і патрабуюць міру. У фінале роліка да пратэстаў далучаецца мадэль Кендал Джэнер (малодшанькая з клану Кардаш’ян), якая ўлагоджвае паліцэйскіх банкай «Пэпсі». Крытыка абрушылася на кампанію ў асноўным праз занадта тапорнае спрашчэнне сэнсу: ёсць праблема – «пэпсі» яе вырашыць, нават калі гэта шматпакутная барацьба за правы цемнаскурых. Тым болей што рэклама была прымеркавана да 49-х угодкаў забойства Марціна Лютэра Кінга. Карацей, Pepsi ўляпалася ў сваю газіроўку і ўжо дала задні ход ды выдаліла ролік з афіцыйнай старонкі на YouTube.

 

Твая бабуля ўжо засвоіла інстаграм і глядзіць гіпнатычныя ютуб-падборачкі? Час рухацца далей. Пенсіянерка Таццяна з Саянагорска ўласнаручна зрабіла хромакей – зялёны фон – і як толькі не дэманструе яго магчымасці. Хутчэй за ўсё, ты гэта бачыў(-ла). Але ўжо выйшлі новыя серыі. І новыя анекдоты, ааа!

Наш курасоўшчынскі талент Бакей выпусціў новы альбом – 30-хвіліннае эмацыйнае падарожжа па зазубінах рытмікі, якія раптам выпростваюцца ў гратэскавую мелодыку – і вось ужо ў дрэваў вакол цябе з’яўляюцца вочы. Самае самабытнае гучанне ў трэку «У бетоне», на яго і раім звярнуць увагу. Да яго ж прыкладаецца 13-хвілінны відэаэпас пра савецкага бухгалтара.