Улоў #15

Першы летні «Улоў» на трэць прысвечаны катэгорыі <18. У астатнім як заўсёды: трошку вар’яцтва і больш прыгажосці – усё на пацеху твайму ўнутранаму падлетку.

 

 

Кліп тыдня:

 

 

У Дзень абароны дзяцей на канале Noize MC матэрыялізаваўся кліп на песню, якую Нойз не плануе бацаць уласным дзецям на гітары. У каментарах да відэа рэпер тлумачыць, што гэта было: «Многія сучасныя бацькі ўручаюць сваім дзецям айпад з двухгадовага ўзросту і ідуць займацца сваімі справамі, а потым дзівяцца, што падлеткі падпісваюцца на “паблікі смерці”. Песня «Чайлдфры» – пра тое, да чаго можа прывесці сляпое прытрымліванне чужых парадаў і думак «аўтарытэтаў» з медыя, пра персанальную адказнасць за ўласныя жыццёвыя рашэнні». Характэрна, што Нойзу падпявае Ліза Манетачка – юная зорка «псіхадэлічнага клаўд-рэпу», сэлф-мэйд школьніца, у раскрутцы якой ключавую ролю адыграў Укантацік.

 

 

 

 

Сустрэча тыдня:

 

 

80% дзяцей-сірот у Беларусі маюць гэты статус пры жывых бацьках. З падачы часопіса «Имена» адна дзяўчына і тры хлопцы напісалі лісты біялагічным мамам і татам, каб сустрэцца з імі і задаць галоўныя пытанні. Гісторыя Вікі, першая з апублікаваных, толькі пацвярджае, што атрымаць адказы можна не заўсёды. Як глядзяць у вочы адно аднаму людзі, паміж якімі ляжыць прорва ў 15 гадоў? Цяпер ты ведаеш гэта.

 

 

 

Лiкбез тыдня:

 

 

Падлеткі распавядаюць, што такое добра, а што такое «толькі з дазволу бацькоў». Ты, можа, і не ведаеш, што беларускаму школьніку дазваляюць рабіць банкаўскія ўклады і даваць інтэрв’ю, але з тым, каб займець септум або кінуцца ў кругасветку, можа быць затык. Пра сэкс і крымінал таксама цікава.

 

 

 

 

Караоке тыдня:

 

 

Нязмушана напець «Хочу летать на осе, бежать по косе, в лесу скакать на лисе» – той яшчэ чэлендж нават для рускамоўнага. Аляксандра Кулак, рэжысёрка новага кліпа «СБПЧ», цалкам гэта разумела, але спакуса памучыць нью-ёркцаў рускай IDM-паэзіяй была ўжо занадта вялікая. Атрымалася не тое каб членараздзельна, затое вельмі шчыра.

 

 

 

 

Метафара тыдня:

 

 

У «БелГазеце» вырашылі канкрэтна адказаць на шуміху вакол «каровінага сіфілісу» і размясціць на першай паласе бытавую сцэнку з жыцця на ферме. Гумар, аднак, не ўсім прыйшоўся па гусце. «Белсаюздрук» упаў у транс і запрасіў заключэнне аб магчымасці размяшчэння такога фотаматэрыялу, прычым запрасіў у самой «БелГазеты» (накшталт: вы, вядома, гэта ўжо надрукавалі, але вы ўпэўненыя, што такое можна друкаваць?). У адказ распаўсюднікам прапанавалі чытнуць графа Аляксея Канстанціныча Талстога: «Проводя в деревне лето, / Их своди на скотный двoр: / Помогает много это / Расширять их кругозор».

 

 

 

Хваля тыдня:

 

 

Фармат павольных медыя набірае папулярнасць. Свежы вопыт на гэтым полі – чэшскае Slow Радыё, якое перадае ў эфір спевы птушак. Прамая трансляцыя вядзецца з сакрэтнага месца на поўдні Чэхіі. Аўтары праекта сцвярджаюць, што вопытнае вуха адрозніць як мінімум 40 птушак за дзень. Ну а ты проста парэлаксуй.

 

 

 

Краўдфандынг тыдня:

 

 

Віртуозы з Shaman Jungle падрыхтавалі для цябе нешта зачаравальнае, а каб ты не нудзіўся(-лася) ў чаканні, просяць падтрымаць новы альбом The Great Will рублём. Калі сідзішка ў падарунак цябе не вабіць, затусуй на адкрытую рэпетыцыю Shaman Jungle з жывой гутаркай і кальянам або вазьмі майстар-клас па гульні на джэмбе (дарма, ці што, пёр(-ла) з Афрыкі гэты барабан?).
 

 

 

 

Лонгрыд тыдня:

 

 

Дацкае агенцтва ferdio выпусціла раскошную інфаграфіку пра сцягі краін свету. На 26 ілюстрацыях сцягі расклалі па колерах, формах, напрамку палос, прапорцыях і элементах, знайшлі аднолькавыя і падобныя сімвалы розных краін (халоў, Мадагаскар!) і нават склалі сярэднія сцягі кантынентаў. Усім пачаткоўцам-вексілолагам – у закладкі.

 

 

 

Альбом тыдня:

 

 

Бруклінскія «цыгарэты» разрадзілася першым лонгплэем. Салодзенькі голас Грэга Ганзалеса і музычка, пад якую аднолькава зручна варыць цыбульны мармелад, паліць Gauloises і цалавацца, – мажліва, менавіта гэтага табе не хапае ветраным летам 2017-га.

 

 

Улоў збіралі Zamandarin, Sheeborshee і Manaxrom

 


КАМЕНТАРЫ (0)

КАМЕНТАВАЦЬ