«ТЭАРТ» абвясціў праграму

Слоган «ТЭАРТу» сёлета просты і ёмісты – «Канцэнтрат». Маецца на ўвазе, што гледачоў і глядачак чакае «канцэнтрат смелых рэжысёрскіх рашэнняў, правакацыйных ідэй, актуальных тэм, яркага выканання і новых эмоцый». Карацей, суцэльная магія.

Чым уразіць беларуская праграма (Belarus Open)

  Прадэманструюць блокбастар ад свету тэатра – «ГЭТАМЫ» пра жыццё і творчасць суперпапулярнага беларускага аўтара Андруся Горвата. Гэта праца ўкраінскага рэжысёра Стаса Жыркова. На Belarus Open пакажуць таксама яго «Паляванне на сябе».

  Пакажуць аж два творы рэжысёра Юры Дзівакова: сучаснае прачытанне старазапаветнай гісторыі «Песнь песней» і «Павятовы лекар» паводле Франца нашага Кафкі.

  Будуць два лепшыя спектаклі сезона 2018/2019 па версіі TUT.BY: «Вартавыя Тадж-Махала» Аляксандра Янушкевіча і «Паветра» Вольгі Лабоўкінай (апошні – твая магчымасць азнаёміцца з такім жанрам, як танц-спектакль).

  Прывязуць Вальтэра, якога хочацца глядзець у 2019-м. «Кандыд, або Аптымізм» Ігара Казакова – інтэрпрэтацыя круцельскага рамана, па яго тэатралы гатовыя ехаць нават у такую далеч, як Магілёў.

  Упершыню ў рамках беларускага шоукейса пакажуць спектакль Беларускага Свабоднага тэатра. Гэта будзе «Дом № 5», які складаецца з гісторый людзей з інваліднасцю.

  Таксама ўпершыню на форуме адбудзецца прэзентацыя праектаў «Тэатр сацыяльных даследаванняў». Праекты Лабараторыя Тэатра сацыяльнага ECLAB, HUNCHtheatre і «Крылы халопа» пакажуць табе такі тэатр, які здольны мяняць грамадства. Пакажуць, адпаведна, «Родныя людзі?» пра хатні гвалт, «Левыя дысідэнты» пра супрацьстаянне чалавека і сістэмы, «Brest Stories Guide» пра знішчэнне берасцейскай габрэйскай абшчыны ў 1941–1942 гадах.

Чатыры сланы міжнароднай праграмы:

  пастаноўка на няіснай мове – «Адысея» аднаго з найстарэйшых тэатраў Германіі;

  мудрагелісты мікс харэаграфіі і 3D з аптычнымі ілюзіямі – «Піксель» Мурада Мярзукі;

  псіхалагічнае даследаванне польскага рэжысёра Крысціяна Люпа на тэму нацыяналізму і фашызму – «Плошча герояў»;

  марыянеткавы спектакль Рэзо Габрыадзэ (гэта той самы, які сцэнарыст «Кін-дза-дза») «Сталінград» – лепшы паводле New Yorker у 2010 годзе.

Зніжкі і падарункі для тых, хто дачытаў(-ла)

  Калі купіць білет на спектакль, а потым зазірнуць у Ruin Bar на Кастрычніцкай, там нальюць што заўгодна са зніжкай 20%. А яшчэ спецыяльна да «ТЭАРТу» там прыдумаюць тры новыя кактэйлі.

  Калі сфатаграфавацца з білетам на пастаноўку «ТЭАРТу» ў якой-небудзь з кавярняў «Зерне», можна выйграць праходку на яшчэ адзін спектакль.

Больш падрабязна пра ўсё чытай на сайце «ТЭАРТу» або ў яго сацсетачках.

Квіткі на івэнты прадаюць на teart.by, bycard.by, kupalauski.by, smsbilet.by, bezkassira.by.