SpaceX пачала ствараць «сусветны інтэрнэт»

Калі ўсё пройдзе гладка, SpaceX шпурне ў неба мноства падобных апаратаў і створыць сетку для забеспячэння шырокапалосным спадарожнікавым доступам у інтэрнэт амаль усю паверхню Зямлі.

Як гэта будзе зроблена тэхнічна, шырокай публіцы невядома: кампанія не спяшаецца раскрываць падрабязнасці праекта. Больш за тое, яна дамаглася забароны на публічнае распаўсюджванне гэтых падрабязнасцей з боку амерыканскай Федэральнай камісіі па сувязі, куды падавала заяўку на выдзяленне рабочых частот для спадарожнікавага інтэрнэту.

Калі аб праекце Starlink у 2015 годзе ўпершыню застрачылі СМІ, пісалі, што кампанія Ілана Маска выведзе на нізкую калязямную арбіту 4425 спадарожнікаў з абсталяваннем сувязі. Планавалася размясціць апараты ў 83 арбітальных плоскасцях на вышынях ад 1110 да 1325 кіламетраў, што, па прыкідках, дазволіла б перамагчы галоўны недахоп спадарожнікавага інтэрнэту – тармазы ў праходжанні сігналу (тыя правайдары, што працуюць са спадарожнікамі зараз, юзаюць іх на значна большай вышыні, і затрымка сігналу складае ад сотняў мілісекунд да некалькіх секунд – карацей, у анлайн-гульню не зарубішся).

У 2017 годзе план апдэйтнулі: SpaceX вырашыла арганізаваць групоўку з 11943 спадарожнікаў. Да першапачатковых 4425 апаратаў дадаецца 7518 на больш нізкіх арбітах – ад 335 да 346 кіламетраў, – і разам яны складаюць аднарангавую сетку: кожны спадарожнік у сетцы будзе самастойнай адзінкай, адначасова выконваючы функцыі і кліента, і сервера. Такі расклад дазволіць знізіць затрымку сігналу да 25 мілісекунд (каб ты разумеў(-ла): у сотавых сетках 4G затрымка складае ў сярэднім 7-8 мілісекунд).

Некаторыя СМІ пісалі, што Ілан Маск & Co падораць нам сусветны Wi-Fi, але тое, канешне, казкі. Вайфаеўскі сігнал безнадзейна заглухне ў іянізаваных пластах атмасферы.

Каб падключыцца да спадарожнікавага інтэрнэту «ад Маска», трэба будзе набыць трансівер, фазіраваную антэну і тэрмінал кіравання ёй. Колькі грошай гэта высмакча з твайго гаманца, пакуль невядома, але сучасныя трансіверы з антэнамі для спадарожнікавага інтэрнэту каштуюць у сярэднім 300–800 даляраў.

Сам доступ абяцаюць зрабіць танным. Верагодна, SpaceX будзе зарабляць на рэкламе, арэндзе і продажы абсталявання. Таксама кампанія плануе здаваць свае інтэрнэт-спадарожнікі ў арэнду іншым даследчым арганізацыям.

Усеагульны доступ у інтэрнэт першым перападзе амерыканцам, затым яго разгорнуць у Канадзе, у краінах Еўропы, а потым ужо ў астатніх рэгіёнах. Пры гэтым улады асобных краін, зразумела, могуць не выдаць дазвол на выкарыстанне частот, і ў гэтым выпадку кампаніі SpaceX, хутчэй за ўсё, будзе забаронена пастаўляць свае спадарожнікавыя тэрміналы ў гэтыя дзяржавы.

Яшчэ адзін слізкі момант: занадта танны спадарожнікавы інтэрнэт можа не спадабацца антыманапольным службам.

Ну, будзем жывыя – патэсцім!

Крыніца: N + 1