Краўдфандынг дня: інсталяцыя «Лавец ветру»

«Лавец ветру» – кінетычная скульптура, якая рэагуе на вецер і плаўна лунае ў паветры. Яе прыдумала амерыканская арт-група Poetic Kinetics і ўпершыню ўсталявала такую інсталяцыю ў Лос-Анджэлесе ў 2016-м, а ў 2017-м – у Санкт-Пецярбургу. Надышоў час Менска, вырашыла каманда культ. цэнтра «КОРПУС» і сваімі сіламі будзе рэалізоўваць праект, які так натхняе сваёй прыгажосцю.

– Тэхнічна гэтая канструкцыя будзе зроблена так: над дваром мы нацягнем рыбалоўную сетку ў буйныя клеткі і на самі гэтыя клеткі прымацуем бліскучыя стужкі. Мы плануем выкарыстоўваць адпрацаваныя і бракаваныя ўпаковачныя стужкі, а таксама абрэзкі ад этыкетак – у гэтым ёсць экалагічны складнік у выглядзе другаснага выкарыстання матэрыялу. Таксама «Лавец ветру» дакажа, што ў Беларусі ёсць вецер, з чым любяць паспрачацца праціўнікі аднаўляльнай энергетыкі, – кажа Аня Дапш, галоўная «корпусная» экалагіня.

6 000 BYN – агульная сума краўдфандынгавай кампаніі. Самае дарагое ў гэтым праекце – матэрыялы і мантаж. Ужо цяпер альтруісты-прафесіяналы рыхтуюць макеты па стварэнні не толькі маштабнай, але і бяспечнай канструкцыі.

– Мы ўпэўненыя, што «Лавец ветру» зможа стаць як мінімум новай зоркай інстаграма краіны, а як максімум – натхненнем для тых, хто не да канца ўпэўнены ў сваіх сілах. Захацець зрабіць нешта глабальнае без прамой выгады для сябе і давесці справу да канца – добры прыклад у эпоху меркантылізму, – кажуць арганізатары.

Кампанія працягнецца да 16 ліпеня.

Адкрыццё «Лаўца ветру» стане днём, прысвечаным ветру, сонцу, вадзе і іх стваральнай энергіі.

Пад жывымі махрамі новай гарадской славутасці плануюцца:

  экамаркет;

  чай, звараны з дапамогай энергіі сонца;

  адукацыйны блок аб аднаўляльных крыніцах энергіі;

  гукі ад Papa Bo Selektah;

  выступ інструментальнага трыа Port Mone з праграмай з новага альбома.

 
 Падтрымаць!