JubiläumsFest: 50 адукацыйных івэнтаў на адной пляцоўцы

Фестываль арганізуе Менскі міжнародны адукацыйны цэнтры ім. Ёханэса Рау (IBB Менск). У гонар свайго 25-годдзя цэнтр бясплатна прапанаваў пляцоўкі для процьмы вартых ініцыятыў: пра гэтую беспрэцэдэнтную акцыю 34, вядома ж, пісаў.

Сабрына Бабоўскі

дырэктарка IBB Менск

«Мы вырашылі правесці IBB JubiläumsFest, каб даць магчымасць беларускім грамадскім ініцыятывам сабрацца ў адным месцы і расказаць пра важныя праекты жыхарам Менска. Сацыяльны маркет, вывучэнне жэставай мовы, лекцыі і кінапаказы аб дыслексіі, правах жанчын і людзях з інваліднасцю – гэтыя і многія іншыя мерапрыемствы змогуць наведаць госці фестывалю IBB JubiläumsFest».

Мерапрыемствы разгорнуцца на васьмі пляцоўках адукацыйнага цэнтра, дзе змесцяцца ад 30 да 200 чалавек.

34 десантуе на фэст галоўрэда

У 10:30 на пляцоўцы Berlin з бадзёрай лекцыяй «Як прыдумваць ідэі і прадаваць іх аўдыторыі?» выступіць галоўны рэдактар 34mag.net і 34travel.me Антон Кашлікаў. Гутарка пойдзе пра тое, як нараджаюцца ідэі, чым добрая ідэя адрозніваецца ад дрэннай, як ідэі фармуляваць і як выпускаць у свет.

За музыку адкажуць феміністкі са Швейцарыі

IBB прывязе ў Менск гурт з Бёрна – willibald. Швейцарскі калектыў на ¾ складаецца з жанчын, а яго ўдзельніцы ўваходзяць у Асацыяцыю Helvetiarockt, якая змагаецца за павышэнне рэпрэзентатыўнасці жанчын у музычнай індустрыі Швейцарыі. Музыкі willibald актыўна змагаюцца супраць сэксізму і выступаюць за тое, каб на рок-сцэне было як мага больш прадстаўнікоў розных гендараў і як мага менш стэрэатыпаў.

Таксама музычны настрой гасцям створаць беларускія дыджэі Smok і DJ Plavsky.

Будзе працаваць сацыяльны маркет

Наведвальніка фестывалю змогуць набыць паштоўкі і сувеніры ад творчай майстэрні «Арт-ідэя», вязаныя цацкі ад Гістарычнай майстэрні ім. Л. Левіна і экасумкі ад сацыяльна-экалагічнага праекта «Добрая авоська». «Кнігарня Логвінаў» прыгатавала сеансы кніжнай тэрапіі. Сацыяльны праект «Мопс-Шмопс» прадставіць экатавары для хатніх гадаванцаў. Магазін Zerro.by прапануе тавары без упакоўкі для экаўсвядомленых таварышаў і таварышак. А яшчэ тут будуць збіраць вопратку, абутак і цацкі для тых, хто мае патрэбу: дабрачынны сэрвіс «Бананавы фургон» перадасць рэчы на дабрачыннасць.

Іншыя хайлайты JubiläumsFest:

 экспрэс-курс нямецкай мовы ў перасоўнай бібліятэцы на колах DeutschExpress (Goethe-Institut Minsk);

 дыскусія «Як мастацтва выратуе ваш сацыяльны праект?» з удзелам вядомых арт-персон;

 марафон беларускай літаратуры (ПЭН-цэнтр);

 навучанне жэставай мове (Беларускае таварыства глухіх);

 майстар-клас пра тое, як рабіць сторыз і візуалы ў Instagram («Радыё Свабода»);

 інтэрактыўная дыскусія на тэму фэтфобнай рэкламы («Больш цела»);

 гульня на тэму сацыяльнай няроўнасці «Іншы погляд» («Жывая Бібліятэка»);

 бясплатныя паказы беларускіх і нямецкіх фільмаў на сацыяльную тэматыку;

 майстар-клас па асновах імправізацыйнага тэатра (Minsk Impro);

 спектакль «Камера, якую дала мне маці» (HomoCosmos);

 кулінарны майстар-клас ад дырэктаркі IBB Менск Сабрыны Бабоўскі.

Падчас фестывалю будуць працаваць фудкорт і дзіцячая пляцоўка. А яшчэ наведвальнікаў(-іц) фэсту гасцінна пачастуюць юбілейным 25-кілаграмовым тортам.

 Дзе:  Менскі міжнародны адукацыйны цэнтр імя Ёханэса Рау (праспект газеты «Праўда», 11).
 Час:  10:00 – 22:00.
 Уваход:  вольны.

 Івэнт у FB