У Прэс-клубе адбудзецца адкрытая лятучка «Як стварыць мікрамедыя?»

27 траўня ў Прэс-клубе пры падтрымцы 34mag.net пройдзе адкрытая лятучка, якая будзе карысная ўсім, хто марыць запусціць годны тэлеграм-канал, падкаст ці яшчэ які твітар. Тут будуць дзяліцца досведам рабяты, якія стварылі рэальна сімпатычныя мікрамедыя і на якіх варта раўняцца.

 

 Што:  адкрытая лятучка «Як стварыць мікрамедыя? Вопыт актывістаў і інфлюенсераў».

 Дзе:  Прэс-клуб (вул. Веры Харужай, 3-601).

 Калі:  27 траўня, 19: 00.

 Уваход:  free, толькі зарэгіструйся.

Падчас лятучкі можна будзе атрымаць адказы на такія пытанні:

   Як ствараць інфанагоды, на якія чытачы прыляцяць, рыхтык гракі ў беларускую вясну?

   Як беражліва і з любоўю абыходзіцца са сваёй аўдыторыяй?

   Як эфектыўна даносіць ідэі да галоў і сэрцаў?

   Як выбудоўваць сваю медыйную палітыку?

   Як дагрукацца да СМІ (калі табе гэта раптам патрэбна)?

 

Спікеры:
 
   Дзяніс Васількоў, падкасцер і нана-інфлюенсер, экс-рэдактар TUT.by;

   Ксюша Малюкова, стваральніца і рэдактарка канала «Твои возможности» пра стажыроўкі, валанцёрства, івэнты;

   Даша Рамановіч і Мілана Лявіцкая, удзельніцы праекта пра гендар і сэксуальнасць Makeout;

   Антон Раднянкоў, дырэктар «Цэнтра новых ідэй», што працуе і як медыяплатформа, і як адукатар, і як даследчая арганізацыя;

   Дар'я Сазановіч, наша любімая ілюстратарка, стваральніца тэлеграм-канала «Не благодари.» – «пра пуцёўкі ў жыццё» (= магчымасці з’ехаць за мяжу на вучобу ці валанцёрства). Даша далучыцца да сустрэчы па скайпе.

Мадэраваць лятучку будзе галоўрэд 34mag.net і 34travel.me Антон Кашлікаў.