21 беларускі падкаст, які варта паслухаць проста зараз

  • 06.03.2020
  • Аўтар: 34mag
  • 4587

Выбралі 21 падкаст пра адукацыю, жанчын, космас і ўвогуле ні пра што, каб табе было што паслухаць у дарозе або перад сном. Свядома выключылі з нашай падборкі чыста навінавае бла-бла-бла і вузкаспецыяльныя шоу. У астатнім атрымалася тое, што прынята зваць рэтра-словам «асарці».

 

 «Мінобр патэлефануе» 

«Падкаст для тых, хто гатовы вучыцца і вучыць па-іншаму». Распавядаюць пра надзённыя праблемы беларускага студэнцтва, пра хатнюю адукацыю, пра энтузіястаў у школах далёка за МКАДам. Трэці сезон шоу прысвечаны вучоным з Беларусі.

 

 

 

 «Куды падацца?» 

Таксама падкаст пра адукацыю, але больш нішавы – ён пра людзей, якія вучыліся на розных праграмах за мяжой і гатовыя пра гэта распавесці. Калі ты баішся зрабіць крок у кірунку еўрапейскай магістратуры, прыклады іншых дакладна падштурхнуць цябе да запаўнення заявак.

 

 

 

 Oh, hi Mars! 

На партале Onliner.by выказалі здагадку (разумна), што чытаць пра космас будуць адзінкі, але шмат каму размовы пра фармаванне Сонечнай сістэмы, самаробныя марсаходы ці новыя планы SpaceX зойдуць фонам у заторы або ў тлуме метрапалітэна. Трымай падкаст Мікіты Ляшкевіча ў падпісках на выпадак, калі ўзнікне адчуванне «даўно не слухаў(-ла) чагосьці “навуковага-разумненькага-бескарыснага”».

 

 

 

 RND talk 

Ужо амаль 100-серыйны падкаст пра забавы, навуку і дызайн. Трыа вядучых абмяркоўвае штучкі ў духу «будучыня наступіла» і «як табе такое, Ілан Маск?»; (не) крытыкуе навінкі кіно; даводзіць да мас, які дызайн ок, а які ўвогуле не.

 

 

 

 «Англійская па песнях» 

Сэнс праграмы вядучай радыё Unistar Каці Самсонавай максімальна просты: слухачы нясумна вучаць англійскую мову па хітах Уітні Х'юстан, Мадонны, Lady Gaga, Depeche Mode і іншых. Летась падкаст абагнаў у рускім iTunes нават цяжкавагавікоў адукацыі кшталту «Арзамас» и TED Talks.

 

 

 

 «Мы не дагаварылі!» 

Гэта падкаст Кацярыны Ажгірэй і Сашы Старадзетка пра ментальнае здароўе. Тут абмяркоўваюць артыкулы па тэме, гутараць з рознымі «знаўцамі душ» і даюць слухачам карысныя для іх душ дамашкі. Асабліва рэкамендуем выпускі «Чамы мы баімся поспеху?», «Чаму перапрацоўваць шкодна для кар'еры і жыцця?» і пра мінімалізм:

 

 

 

 «Эканоміка на пальцах» 

Падкаст ад эканамічнага аглядальніка TUT.BY Сяргея Чалага – гэта зручны фармат спажывання навін: ты не проста даведаешся, пачым сягоння прадаюць нафту Беларусі, але і як быццам зразумееш, чаму так адбываецца і ў якую валюту пераводзіць заначку. Калі ад усяго каляпалітычнага цябе падванітоўвае, паслухай хаця б пра эканоміку велапракатаў:

 

 

 

 Fem FM 

За фемінізм у беларускіх падкастараў адказваюць журналістка Вольга Астаповіч, экалагіня Марыя Сума і спецыялістка па камунікацыях Таццяна Кузняцова. Пачалі з апавяданняў пра тое, што не так з гендарнымі святамі, працягнулі гісторыямі пра бытавы сэксізм, пахуданне, аборты і наркафемінізм. Адной з госцяў падкаста стала топ-феміністка Рунэту Заліна Маршанкулава.

 

 

 

 «Толькі жанчыны» 

Журналістка «Радыё Свабода» Ганна Соўсь абмяркоўвае з госцямі фемінісцкі парадак. Тут і вечна актуальныя халівары – тэмы кшталту публічнага груднога кармлення ці антыпрышчэпачнікаў, і актуалачкі-рэакцыі на свежыя навіны. Зручна, што размовы можна як слухаць, так і чытаць.

 

 

 

 «Лесбы на балоце» 

Актывісткі Makeout Віка Біран і Даша Рамановіч распавядаюць пра жыццё-быццё беларускіх лесбіянак. Для большай інтымнасці размовы запісваюць у стылі піжамных вечарынак. Падкаст пакуль толькі набірае абароты, спрабуючы гасцявы фармат: напрыклад, расказаць пра лесбарасставанні ў Вікіну спальню-студыю запрасілі псіхалагіню Мілу Вёдраву.

 

 

 

 «Подвал. Трёп» 

Тут размаўляюць пра музыку, серыялы, тэхналогіі. Запрашаюць «гасцей, пра якіх вы ніколі не чулі»: групу Dee Tree, электроншчыка Awlnight, арганізатараў Vulitsa Ezha і Vulica Brasil, завадатараў варушняка Keep Minsk Weird і іншых ноўнэймаў. Самі аўтары падкаста называюць яго расслабленым, і больш прыдатнага эпітэта мы знайсці не прэтэндуем.

 

 

 

 Editorial. Radio Plato 

На хвалях Radio Plato эстэцкі тыц-тыц перарываецца рэдактарскім падкастам, у які клічуць розных герояў сучаснасці: музыкаў, рэжысёраў, вандроўнікаў, крафтавых піваробаў.

 

 

 

 «Ты ўжо?» 

Як рэдкі сайт, на якім ёсць рубрыка «Сэкс», KYKY.ORG узяў на сябе нялёгкую задачу сэкспрасвету ў стылі ютуб-праекта «Подруги». Рабяты несарамліва дзеляцца асабістым і чужым вопытам, руйнуюць пасцельныя міфы, жартуюць і ўсемагчымымі іншымі спосабамі спрабуюць вярнуць людзям задавальненне ад задавальнення.

 

 

 

 «Паўгадзіны кардыё» 

У гэтага падкаста пра сэкс вельмі інтрыгуючае апісанне: маўляў, у эфіры можа гаварыцца аб дзеяннях, якія парушаюць закон Рэспублікі Беларусь. У выніку паслухаць аж вушы чэшуцца. Насамрэч ніякага крыміналу: вядучыя абмяркоўваюць «ціндар», гумовыя дзілдакі, арганічны для нашага народа стыль BDSM і запрашаюць у студыю сэксуальных гуру накшталт Івана Шылы.

 

 

 

 «Прабел» 

Ягор Калеснік гуляе ў аматарскай футбольнай камандзе «Аўтазак» і з зайздроснай рэгулярнасцю піша падкасты пра Беларусь. Дарэчы, адзін з выпускаў ён цалкам прысвяціў падкаст-культуры ў нашых шыротах. Ну і падкаст з выдаўцом 34 Антонам Кашлікавым паслухай жа ж.

 

 

 

 «Стартапніца» 

Сумесны падкаст Euroradio і BEL.BIZ. Мікрафон тут даюць не толькі маладым прадпрымальнікам, якія бясстрашна робяць у Беларусі крутыя праекты, але і тым адчайным пасіянарыям, якія даюць на гэтыя дзівацтвы грошы.

 

 

 

 Dzigital 

Усё пра digital. І гэта настолькі шырока, што калі табе не зойдзе адзін выпуск, то ў іншага ўсё роўна ёсць шанцы зжэрці паўгадзіны твайго жыцця – і ты нават не заўважыш.

 

 

 

 «Кракатук» 

У беларускіх рэаліях многія шоу загінаюцца яшчэ ў калысцы, і калі ты баішся, што падсядзеш на іголку нейкага падкаста, а ён раптам перастане выходзіць, не слухай нічога, акрамя аўтарскай праграмы Віктара Сямашкі на «Радыё Рацыя», якая прысвечаная музыцы. У аўдыятэцы «Кракатука» сабраная маса запісаў, якія ніколі не выдаваліся і не гучалі на радыё. Дэманстрацыя матэрыялу суправаджаецца каментарамі аўтараў і знаўцаў. Па спасылцы знойдзеш кучу выпускаў з 5 студзеня 2011 года.

 

 

 

 Аўдыягіды 34travel 

Сайт пра новую культуру падарожжаў дорыць магчымасць зноўку адкрыць для сябе Менск: гуляеш па горадзе ў слухаўках, убіраеш нясумныя факты, загорнутыя ў прыемны саўнддызайн, – і закохваешся ў сталіцу, быццам падлетак, да чырвоных шчок. Стомішся ад Менска – выпраўляйся ў шлях, узброіўшыся гайдамі па Нясвіжы ці Белавежскай пушчы.

 

 

 

 Logika Ritma 

Раз на два тыдні тут міксуюць і абмяркоўваюць навінкі немэйнстрымавай электроннай музыкі: бас, электра, эксперыментальнае тэхна, хаўс, IDM.

 

 

 

 «Дабранач» 

Тут чытаюць нудныя тэксты, каб ты хутчэй заснуў(-ла). Дагавор на аказанне паслуг электрасувязі, рэцэпт аліўе, закон «Аб абароне правоў спажыўцоў», даследаванне асвяжальнікаў паветра – дзейнічае на мозг больш эфектыўна за позняга Таркоўскага.