Time EP Tok Rukoo

Tok Rukoo пра рэліз:

– Усе песні былі напісаныя ў розны час існавання гурта і з рознымі ўдзельнікамі. Партыя ўдарных для адной з кампазіцый была запісаная яшчэ ў 2010 годзе. Ці ў 2009-м? Мы ўжо і самі дрэнна памятаем.

Часткова тэма часу ў альбоме тычыцца і нашай марудлівасці [апошні рэліз у гурта быў тры гады таму. – 34mag ]. Але калі сур’ёзна, час – настолькі неверагодны фактар, які пранізвае ўсё жывое, а магчыма, і нежывое ў гэтым свеце, што не разважаць пра яго, не будаваць свае тэорыі і фантазіі вельмі складана. Таму доўга назву альбома прыдумляць не даводзілася, яна ўжо лунала ў паветры. Хоць гэтыя песні назваць вясёлымі не атрымліваецца, але пад іх хочацца танцаваць. Нам падаецца, нашая музыка стварае асаблівы стан, калі ўсё тваё нутро хоча актыўнасці, дзеянняў, жыцця, але пры гэтым не хочацца ўсміхацца кожнаму мінаку, распаўсюджваючы салодкае дабро сваіх намераў. Магчыма, ты проста ненавідзіш увесь свет проста тут і цяпер, а танцаваць усё роўна хочацца.