Як распавядаць пра Беларусь? Парады заходнім калегам

 1.  Не менш за 5 (пяць) разоў узгадай фразу «Last dictatorship of Europe» (абавязкова — у пачатку).

 2.  Для ілюстрацыі матэрыялу выкарыстоўвай фота і відэа з параду (там, дзе Лукашэнка з сынам Колем стаяць у дзіўнай вайсковай форме).

 3.  Таксама абавязкова праілюструй матэрыял фотаздымкамі АМАПу, ярка нафарбаванымі жанчынамі ў міні-спадніцах і помнікаў Леніну (варыянт: савецкая мазаіка на сцяне).

 4.  Каб апісаць, як справы ў культуры, раскажы гісторыю «Свабоднага тэатра» і вазьмі каментар у яго кіраўніка Мікалая Халезіна (запэўніваем: да цябе так ніхто не рабіў).

 5.  Дадай ад сябе фразу пра тое, як ты планаваў(-ла) зняць там, там і там, але цябе нікуды не пусцілі. Абавязкова ўдакладні, што вам з аператарам здавалася, нібы за вамі сочаць. Саспенс вырашае!

 6.  Пазнаёмся з мясцовай альтэрнатыўнай тусоўкай, але пастарайся не даваць ёй слова: ім чамусьці многае тут падабаецца. Гэта будзе трошкі выбівацца з тваёй канцэпцыі.

 7.  У прынцыпе, у Беларусь можна не прыязджаць. Паспрабуй творча пераасэнсаваць відэасюжэты пра краіну, якія ўжо выйшлі. Перамантуй.

 8.  Калі ўсё ж такі вырашыў(-ла) прыехаць, пачакай, пакуль надвор'е сапсуецца. Здымай пахмурнае неба (пад гэтую карцінку добра кладуцца гукі савецкіх маршаў). Калі з дрэнным надвор'ем усё ж такі не пашанцавала, заху * р усё ў сепію.

 9.  Лепшыя кадры Менска можна зрабіць на плошчы Перамогі: там гарыць вечны агонь, а таксама бачны надпіс: «Подвиг народа бессмертен».

 10.  Не забудзь згадаць фразу «Last dictatorship of Europe». Інакш матэрыял не прапусціць твой рэдактар. Ах, так, мы ўжо пра гэта казалі...