У Менску ладзяць мемарыяльную выставу Алеся Родзіна

У Берліне, а потым і ў Менску Алесь Родзін арганізоўваў фестываль эксперыментальнага мастацтва «Дах», і ў беларускай сталіцы фэст месціўся акурат у Палацы мастацтва. Куратар выставы, мастак, сябра і паплечнік Родзіна па правядзенні фестываляў Зміцер Юркевіч лічыць, што ўшанаваць памяць Алеся Родзіна менавіта тут – сімвалічна. Ён напісаў у Facebook: «Так супала, што роўна 25 год таму ў Палацы пачалася наша супраца з Алесем Родзіным (падрыхтоўка плошчаў палаца да правядзення фестывалю перформансу “Навінкі” і першы сумесны перформанс). 24 гады таму беларускія мастакі ў Берліне Ігар Ермакоў і Алесь Тарановіч запусцілі працэс падрыхтоўкі да выставы “ДАХ”, якая ў 2003 дала старт міжнароднаму фестывалю саверсізму і ігдрасілізму “ДАХ”, куратарамі якога ад таго часу сталі мы з Алесем Родзіным. 20 год таму ў мурах Палаца мастацтва ледзь не адбыўся “ДАХ-4”, які быў закрыты адразу пасля адкрыцця. 15 год таму на 40 дзён увесь Палац (і прылеглая тэрыторыя) стаў арэнай гладыятарскіх баёў мастакоў “усяго свету”, якія вяліся ў межах фэсту ДАХ-ІХ “Ахвяры Мастацтва”. 13 год таму на 25 дзён Палац пераўтварыўся ў лабараторыю па даследаванні “Цёмных таямніцаў мозга”, якія вяліся ў межах фэсту ДАХ-ХІ. 9 год таму Палац амаль месяц папулярызаваў постаць нашага Героя Тадэвуша Рэйтана ў межах фэсту ДАХ-XXVIII».