Даўно пара: якіх сусветных сэрвісаў не хапае Беларусі?

Медыя

 Spotify 

Стрымінгавы сэрвіс Spotify з’явіўся ў 2008 годзе ў Швецыі, а сёння мае 100-мільённую аўдыторыю. Прылада дазваляе слухаць музыку легальна і бясплатна ў 66 краінах свету. Прынамсі, неабмежавана ў памерах і ў зайздроснай якасці.

З мноства нагодаў і Apple Music (з 2015 г.), і Google Play Music (з 2011 г.) працягваюць нервова паліць у кутку. Карыстацца Spotify – асалода: афармляеш бясплатную падпіску (ці набываеш прэміўм-акаўнт) – атрымліваеш ва ўласнае валоданне 30 мільёнаў трэкаў, 2 мільярды плэйлістоў і штодзённыя Daily Mix, якія альбо пампуеш на дэвайс, альбо загружаеш праз інтэрнэт. А прычэпам – расклады канцэртаў.

У адрозненне ад канкурэнтаў, сістэма працуе не толькі на платформах Windows, MacOS, Android і iOS, доступ таксама ёсць на Linux і Windows Phone. Да таго ж Spotify не цураецца старых версій Android. Сэрвіс крута інтэграваны ў АС, з якімі працуе. Яго можна ўсталяваць на ПК як плэер і кіраваць і лакальнай, і воблачнай фанатэкай з аднаго месца адначасова на 3 прыладах.

Spotify адметны трапным алгарытмам падбору музыкі і асобна рэжымам радыё. Машыннае навучанне ладзіць працэс так: чым больш слухаеш, тым больш атрымліваеш адпаведныя рэкамендацыі (не толькі па жанрах ці выканаўцах, але нават на настроі). Spotify аддае 70% даходу выканаўцам і праваўладальнікам. Але плаціць зыходзячы з колькасці праслухоўванняў аўтара ў суаднесенасці з аб’ёмам усяго стрыму.

На прасторы СНД са Spotify пакуль не дамовіліся. Сэрвіс тут не працуе з падставы эканоміка-палітычнай сітуацыі і законаў пра інтэрнэт. Карыстацца «ліпавым» уліковым запісам можна толькі праз VPN-сэрвісы. Шукай інфу ў сеціве, як падрубіць Spotify. У 2017 годзе холдары абмяркоўвалі намер распачаць працу сэрвісу ў Расіі. Магчыма, варта спадзявацца і нам.

Разам са Spotify чакаем трансатлантычныя стрымінгавыя сэрвісы Tidal і Pandora.

 HBO NOW 

Некалькі гадоў таму Netflix і яго арыгінальны кантэнт сталі даступнымі ў Беларусі. Але гэта не мяжа дасканаласці. У рэйтынгах найбольш папулярных аплікацый для смартфонаў яму літаральна топчацца па пятках HBO NOW, які ў нас зараз не працуе. Гэты сэрвіс зладзілі не менш знакамітыя вытворцы серыялаў – HBO.

Як і Netflix, ён адкрывае карыстальніку вялікую колькасць ліцэнзійнага відэаматэрыялу. Эпізоды серыялаў можна глядзець у высокай якасці і ў той дзень, калі яны выходзяць. Канешне, калі з павагай да аўтарскіх правоў набываеш падпіску.

Грошы

 PayPal 

Плацежны сэрвіс PayPal – глабальная платформа, што спрашчае грашовыя аперацыі: дазваляе без камісіі аплачваць пакупкі і перамяшчаць капітал куды заўгодна, не раскрываючы асабістых дадзеных. Патрабуе толькі адрас пошты і пароль. Яна працуе з больш чым сотняй сусветных валют у 202 краінах.

Сэрвіс функцыянуе ў Беларусі з 2014 года, але з букетам абмежаванняў (як ва Украіне і Казахстане). Інтэрфейс беларускага PayPal на англійскай мове, па змоўчанні ён робіць канвертацыю, накручваючы сабе 4%, а карыстацца ім могуць толькі фізічныя асобы.

Функцыянал таксама не ў поўным харастве: ты можаш толькі аплачваць і атрымліваць зварот сродкаў. Ні прымаць плацяжы, ні выводзіць грошы на банкаўскі рахунак не атрымаецца. Ці можам мы разлічваць на full version? Не біткоіны, канешне, але... З задавальненнем забыліся б на гаманцы і цвёрдую валюту.
 

 Venmo 

Абарот фінансаў у аплікацыі Venmo за мінулы год перавысіў 7 млрд даляраў. Гэтая залатая карова – яшчэ адзін віртуальны кашалёк. Але фішка ў тым, што аплаты ён сумяшчае са стылем сацсеткі.

Сэрвіс, да якога далучаеш крэдытную картку ці банкаўскі рахунак, аўтаматычна транслюе сябрам у стужку, які ты марнатравец: інфу пра пакупкі можна і трэба каментаваць. Для шапаголіка такі пул паведамленняў заменіць гадзіну расповедаў-справаздач на тэму «Што я набыў сёння». Чэкі становяцца пулам навін (гэтага, напрыклад, не мае нават PayPal). Схаваць сляды транжырства таксама можна ў наладах падчас кожнага канкрэтнага плацяжу.

Да таго ж з Venmo можна хутка пазычыць рубель у сяброў. Калі, напрыклад, дзеліце паездку ў таксі, перавесці суму на акаўнт хутчэй, чым твой(-ая) спадарожнік(-ца) расплаціцца з кіроўцам. Праўда, у адрозненне ад плацяжоў праз банк, сэрвіс спісвае плюс 3% на ўласныя затраты. Тым не менш мець такі дадатак – не лішняе, каб надрываць кішкі, смеючыся з пакупак сябра.

 Apple Pay 

Фінансавае «Хутка-смачна», сэрвіс Apple Pay з’явіўся ў 2014 годзе і акупаваў на сёння 21 развітую краіну. Сутнасць – у шпаркіх грашовых пераводах з адной карткі на іншую (у тым ліку розных банкаў) і не менш маланкавыя аплаты. Прыкладанне залучылася з вядомымі бескантактнымі счытвальнікамі Visa PayWave, MasterCard PayPass і American Express ExpressPay.

Праз Apple Pay уладальнікі iPhone (6/6+, 6s/6s+, SE, 7/7+, 8/8+) і Apple Watch могуць плаціць па сістэме NFС ( «блізкая бескантактавая сувязь»), якая дзеля бяспекі далучана да праграм Wallet і Touch ID альбо Face ID. І таксама карыстацца сэрвісам для зручных пакупак у інтэрнэце.

Дастаўка

 Amazon Prime 

За два дні сэрвіс Amazon Prime бясплатна прывозіць тавары, якія прадае Amazon ці некаторыя іншыя кампаніі-партнёры (яны абазначаныя блакітнай іконкай Prime). Калі даплаціць $ 3.99, атрымаеш свой тавар за адзін дзень. Разам з падпіскай атрымліваеш доступ да шэрагу электронных кніг для Kindle, бясплатнай медыятэкі і дадатковых зніжак на некаторыя катэгорыі тавараў.

Гадавы абанемент Amazon Prime па ўсім свеце каштуе $ 99. Першы месяц сэрвісам можна карыстацца ў тэставым рэжыме бясплатна, але з all inclusive па опцыях. На жаль, у Беларусі і для звычайнага Amazon час пакуль не надышоў.

 Postmates 

Аналаг, які існуе выключна ў ЗША. Без чаргі, званкоў і квіткоў даставіць і паперку, і піяніна. Сярэдні час дастаўкі, напрыклад, па Сан-Францыска і прыгарадах – 43 хвіліны. Ролю паштовых аддзяленняў (а іх няма) выконвае апка для iPhone. Каб адправіць пасылку, трэба пазначыць зыходную і фінальную лакацыю і сфатаграфаваць бандэроль, каб кур’ер падрыхтаваўся да яе габарытаў. Сачыць за замовай можаш праз смартфон у рэальным часе.

 Book Depository 

Book Depository дрэйфуе сярод найбольш вядомых кніжных анлайн-крамаў. Дзякуючы гэтаму сэрвісу Еўропа прызвычаілася мець у валоданні 17 мільёнаў кніг па нізкім кошце, з дастаўкай у 160 краін свету бясплатна. Самае новае і цікавае хуценька аказваецца на тваім стале.

Транспарт

 UberPOOL 

Практыку сумесных паездак афіцыйна ўводзіць у штодзённасць UberPool. Дадатковы сэрвіс уратуе цябе ад самоты і пустой кішэні: кошт дарогі можаш дзяліць з рандомным спадарожнікам.

 Deutsche Bahn 

Праз аплікацыю для чыгункі Deutsche Bahn лёгка набыць квіткі на цягнік па ўсёй Еўропе: такі сэрвіс нашмат зручнейшы, чым, напрыклад, сайт беларускай чыгункі. Абіраеш квіток і – voila! Пасля дастаткова паказаць кантралёру QR-код.

 Сitymapper 

Анлайн-сэрвіс Citymapper і аднайменны дадатак для Android і iOS інтэгруюць цябе ў транспартную камунікацыю 17 мегаполісаў Еўропы і Амерыкі. Маршрут генеруецца ад адной кропкі на мапе да іншай у 3 варыянтах: пешшу ці на ровары (нават пакажа, колькі ты губляеш калорый), на таксі (прыгадае сярэдні кошт), на грамадскім транспарце (разлічыць час). Да таго ж Citymapper дазваляе трансфармаваць сваё месцазнаходжанне ў спасылку. Калі ты турыст, зарыентуешся, нібы тутэйшы.

Адукацыя

 Blackboard 

Для навучальнага працэсу студэнцтву складана прапанаваць штосьці больш карыснае за Blackboard. Гэтая аплікацыя аб’ядноўвае і ўстановы, і сусветных навучэнцаў (акрамя Паўночнай Амерыкі і Усходняй Еўропы). Па сутнасці, гэта больш маштабная версія Google Сlassroom.

Студэнт рэгіструецца праз уласную студэнцкую пошту, залінкаваную да пэўнага ўніверсітэта, і атрымлівае доступ да ўсіх матэрыялаў па курсах. Бонус – зручная камунікацыя з калегамі і выкладчыкамі і своечасовыя тэлефонныя паведамленні.