Міні-гайд на «ТЭАРТ»: здымаем вяршкі, ірвём шаблоны
- 23.08.2019
- 4906
Каса ў агні: на гэтым тыдні разышліся апошнія квіткі на тэартаўскі «Сталінград». Калі ты яшчэ не выбраў(-ла), з кім і на што ісці, або ўвогуле не разумееш, навошта табе той «ТЭАРТ», раім самае моцнае і нестандартнае. Ад гэтых пастановак сапраўды займае дух.
«Родныя людзі?»
Беларусь
Лабараторыя сацыяльнага тэатра ECLAB стварае пастаноўкі пра няёмкае і часам нават жудаснае. Гэтыя рабяты не баяцца ўзяцца ні за тэму тэракту ў менскім метро, ні за тэму дыскрымінацыі ЛГБТК+. Для пастаноўкі, якую мы рэкамендуем, акцёры сабралі рэальныя гісторыі гвалту партнёраў над партнёркамі, бацькоў над дзецьмі. І цяпер кожны раз перажываюць іх на сцэне.
«Песня песень»
Беларусь
Спектакль, які нарабіў шуму яшчэ зімой. Раім ісці тым і з тымі, каго ўжо нічым не здзівіць. З вялікай верагоднасцю цябе ўразіць касмічны голас Марты Голубевай, гульня святла і гуку, а таксама свежасць трактоўкі старазапаветнага тэксту, які прыпісваюць цару Саламону. Менавіта так – фрыкавата і заварожвальна – пералапаціць гэты кантэнт мог толькі Дзівакоў.
«Паветра»
Беларусь
Рэжысёрка: Вольга Лабоўкіна.
Калі: 25 і 26 верасня ў 20:00.
Навошта: атрымаць візуальны кайф.
Танцоры, сярод якіх сама рэжысёрка Вольга Лабоўкіна, з першай хвіліны завалодваюць прасторай і ўвагай гледача. Яны гуляюць з ідэяй паветра і яго адсутнасці. «Паветра» паказваюць некалькі разоў на год. І ўбачыць яго двойчы на «ТЭАРТ» – вялікая ўдача.
«Адысея»
Германія
Рэжысёр: Анту Рамэра Нуньес.
Калі: 28 верасня ў 19:00.
Навошта: праверыць сябе на моц духу.
Нарэшце ўсім фіялетава, што ты не прачытаў(-ла) «Адысею» ва ўніверы. Тэлегон і Тэлемах будуць чакаць свайго бацьку з бензапілой, а на сцэне паставяць натуральную труну. Спектакль ідзе на няіснай мове без субцітраў, што здымае апошнія хістанні, ісці або не. Канешне, ісці.
«Піксель»
Францыя
Рэжысёр: Мурад Мерзукі.
Калі: 1 кастрычніка ў 19:00.
Навошта: паглядзець на захапляльныя танцы і wow-графіку.
Ніколі яшчэ ў Беларусі не ставіліся і не прывозіліся пастаноўкі такога ўзроўню харэаграфіі. Танцоры і танцоркі будуць спаборнічаць з 3D-графікай. Мазгі абяцаюць загрузіць на поўную: у спалучэнні рухаў і лічбавай выявы амаль немагчыма зразумець, як гэтыя людзі адрываюцца ад зямлі.
Фота: Вольга Савіч, Ганна Шарко, Armin Smailovic, Agathe Poupeney