Work Hard! Play Hard!

  Што такое «Работай больше! Отдыхай больше!»?  

«РБ!ОБ!» – самаарганізаваная ініцыятыва. Мы ўсё робім сваімі сіламі і сіламі нашых удзельнікаў і ўдзельніц, а таксама нашых сяброў і сябровак і прыязных нам пляцовак. У нас няма бюджэту. Усе ўдзельнічаюць з добраахвотнай ініцыятывы. Нам было цікава, каб выкарыстоўваліся розныя мастацкія фарматы, але не выставачныя, а хутчэй перфарматыўныя, гутарковыя.

Назва серыі падзей – гэта даволі ходкая фраза «Work Hard! Play Hard!». Яна адлюстроўвае, наколькі адпачынак і праца пераплеценыя сёння, што адпачынак таксама часта звязаны з прымусам (вы павінны весяліцца і атрымліваць задавальненне), а праца, якая вымотвае, можа стаць тэмай задзірыстых поп-песень Рыяны і Брытні Спірс. 

  З чаго ўсё пачалося?  

Ініцыятыва пачалася з таго, што летась мы ўчатырох (Воля, Лёша, Коля, Дзіна) захацелі працаваць разам. Нас цікавяць умовы працы і вадпачынку ў кантэксце таго, як гэтыя з'явы сёння радыкальна змяняюцца.

  Хто ўваходзіць у працоўную групу «РБ!ОБ!»?  

Арт-групоўка EEEFFF (Дзіна Жук і Міколай Спясіўцаў) – мастакі, якія працуюць у Маскве і Менску.

Воля Сасноўская – мастачка, працуе ў Менску.

Аляксей Барысёнак – куратар, даследчык, які жыве ў Стакгольме, але працуе і ў Менску, і ў Стакгольме.

  Якая тэма «РБ!ОБ!» сёлета?  

Мы арганізуем «РБ!ОБ» ужо другі год. Тэма серыі івэнтаў у гэтым годзе – трансмісія. Гэтая тэма круціцца вакол спалучэння працы і адпачынку, але з фокусам на скрыжаванні хуткасных рэжымаў і інструментаў па кіраванні хуткасцю. Нас цікавіць, як лавіраваць паміж паскарэннем і запаволеннем і як нашыя каробкі перадач буксуюць або блытаюць перадачы. Мы пачуваемся як рыба ў вадзе пад назвай «хуткасць», плаваем у розных хуткасных рэжымах і спрабуем працаваць з тым, як мы гэтыя рэжымы перамыкаем.

  Навошта ісці?  

Будзе шмат перформансаў, дыскусій і іншых цікавых падзей. І гэта пытанне персанальных адкрыццяў, пашырэння ўласных межаў. На глебе цякучасці нашых прац і адпачынку трэба аб'ядноўвацца і салідарызавацца.

Удзельнікі і ўдзельніцы выкарыстоўваюць розныя фарматы, якія не часта сустракаюцца ў менскім культурным полі. У нас будзе шмат гасцей з Расіі і Украіны. Гэта вельмі інтэнсіўная тусоўка, дзе адбываецца шмат знаёмстваў.

  Чаму гэта важна?  

Калі гавораць пра адпачынак і працу, мяркуецца, што гэтым займаюцца спецыяльна арганізаваныя ведамствы, якія знаходзяцца пад крылом дзяржавы. Адпачынак асацыюецца з прыватным бізнэсам. Калі зірнуць на праграмы палітычных партый Беларусі і пашукаць, што там напісана пра кагнітыўную работу, выявіцца, што нічога няма.

Наша падзея важная, таму што яна не толькі вузка глядзіць на гэтае пытанне з пазіцый сучаснага мастацтва, але і стварае базу і прастору для дыскусій. Гэта плавільны кацёл, дзе можна па-новаму падумаць пра тое, пра што думаць складана. І не толькі падумаць, але і патанчыць.

Гэта ненапружаны рэжым абмеркавання работы і адпачынку з тымі, каму гэта таксама цікава. Мы імкнемся выбудаваць рухомы асяродак, у якім можна абменьвацца ідэямі.

  Хто ўсе гэтыя людзі? 

У асноўным гэта мастакі і мастачкі, музыкі, кінакрытыкі і кінакрытыкесы, філосафы і філосафкі, кіберфеміністкі, куратары і куратаркі, рэжысёры і рэжысёркі, актывісты і актывісткі, пацімэйкеры і пацімэйкеркі. Усе гэтыя людзі практыкуюць розныя фарматы: хтосьці займаецца перформансам і гарадскімі практыкамі, хтосьці – электроннай музыкай, а хтосьці робіць Ph.D.