Улоў #6

25 сакавіка мы адзначалі 99-ю гадавіну абвяшчэння БНР, а фактычна – каляндарны абрад сцвярджэння нашай уласнай волі. Волі ў шапэнгаўэраўскім сэнсе: праз яе мы прарываем кола нашых уяўленняў і меркаванняў і дакранаемся да сапраўднай рэальнасці (хоць гэта і не палягчае жыццё). Далей – хтосьці з нас стане палітычна больш актыўным, хтосьці створыць сацыяльна адказны стартап, а хтосьці нарэшце зразумее: хопіць грэць дупу на бессэнсоўнай працы і адкрые свой… аўтасэрвіс для электрамабіляў.

Пра новыя анімацыйныя гісторыі Gorillaz і кліп Джэймса Блэйка з цяжарнай Наталі Портман мы распавядаць не будзем. А раскажам лепей пра сюррэалістычнае падарожжа рэпераў з Run The Jewels у паліцэйскі пастарунак. Іх новае відэа на трэк Legend Has It выкрывае ўсю жорсткасць і абсурднасць працэдуры дазнання: калі праз сацыяльныя стэрэатыпы абвінавачваюць невінаватых. Знаёмая гісторыя, ці не праўда?

У мінулую сераду Experty.by вызначылі музычных фаварытаў 2016-га. Першай ракеткай стаў гурт «Петля Пристрастия» з альбомам «Мода и облака», які сабраў чатыры ўзнагароды прэміі – «Альбом года», «Лепшы рок-альбом», «Прыз штатных экспертаў» і «Прыз вялікага журы». Узгадаем іх апошні кліп на песню «Груз», якая, на жаль, і дагэтуль застаецца візітнай карткай беларускай рэчаіснасці. Усе сёлетнія топы экспертаў шукай тут.

Індыйскі суд прызнаў рэкі Ганг і Ямуна жывымі істотамі. Цяпер яны маюць такія ж юрыдычныя правы, як і чалавек, у тым ліку магчымасць быць прадстаўленымі ў судовых разборах. Такое рашэнне суд прыняў, каб больш эфектыўна абараняць іх ад забруджвання. Гэта ўжо другі такі выпадак: раней Новая Зеландыя прызнала юрыдычнай асобай Уонгануі – адну з галоўных рэк племені маоры.

Адукацыйны праект Arzamas падрыхтаваў рэтраспектыўнае даследаванне пра тое, што вывучалі савецкія школьнікі на ўроках рускай літаратуры з пачатку 20-х гадоў і да развалу саўка. Цікава, што школьны «канон», якім мы зачытваемся і ў сучаснай Беларусі, быў складзены яшчэ да вайны сталінскімі ідэолагамі.

Можна параўнаць, як ставіцца да сябе кіраўнік беларускай дзяржавы і галоўны пантыфік Рыма-каталіцкай царквы.