Што казаў Ладыгін

  • 25.01.2016
  • Аўтар: 34mag
  • 6801

У мінулы чацвер, 21 студзеня, у прасторы «ЦЭХ» прайшла сустрэча з сузаснавальнікам украінскага анлайн-радыё «Арыстакраты» Яраславам Ладыгіным. Амаль што стэндап-лекцыя была прысвечана таму, як знайсці сваю нішу, якім чынам з валанцёрскай дапамогай запусціць незалежнае разумнае медыя і чаму давер – гэта краевугольны камень для «Арыстакратаў».

 

Свой выступ Яраслаў пачаў з азначэння таго, што сабой павінна ўяўляць прафесія радыёвядучага ў ідэале і што яна сабой уяўляе на Украіне. Стаміўшыся ад таго стану рэчаў (радыёвядучы – чалавек, усе абавязкі якога зводзяцца да анансавання зводак надвор’я і часу) і пачуўшы аднойчы ноччу недзе ў Чаркаскай вобласці радыёвыступ Аляксея Когана пра джаз, будучых «Арыстакратаў» натхніла: радыё мусіць будавацца вакол персоны вядучага, які знаёміць слухачоў з уласнымі густамі і дае ім разуменне музычнага кантэксту.

У лютым 2014 года Яраслаў разам са сваімі калегамі Данілай Хамутоўскім і Лерай Чачыбая ў адным з кіеўскіх падвалаў заснавалі незалежнае анлайн-радыё «Арыстакраты», цалкам на ўласныя сродкі. За два гады існавання радыё выйшла на самаакупнасць і нават стварыла з нуля рынак рэкламы на анлайн-радыё ва Украіне. Летась «Арыстакраты» выпусцілі каля 100 сезонаў аўтарскіх шоу, а найбуйнейшы сусветны падкаст-агрэгатар Mixcloud назваў украінскае анлайн-радыё 7-м нумарам сярод усіх радыёстанцый свету 2015. Яраслаў распавядаў, якую ролю ў поспеху медыя адыграла валанцёрская дапамога, і акцэнтаваў увагу на даверы, які з’яўляецца галоўным капіталам «Арыстакратаў» – як унутры калектыву, так і ў сяброўскіх адносінах са слухачамі.

Дарэчы, таямніца паходжання назвы радыё так і засталася таямніцай. Кажуць, што адказ трэба шукаць у барадатым анекдоце амерыканскіх комікаў і ў сезонах серыяла South park.

Цалкам пазнаёміцца з лекцыяй Яраслава Ладыгіна і прыдумаць уласнае basement-медыя можна падчас прагляду гэтай відэасправаздачы.

 

Слухаць радыё «Арыстакраты».

 

 

 

Фота by palasatka
Video by Carolina Poliakowa