У Познані можна пабачыць беларускага «Пігмаліёна»

Гэта знакавая падзея, бо спектакль на вялікай сцэне рэпертуарнага тэатра ў Польшчы каманда са значным беларускім складнікам ставіць упершыню. Прэм’ера «Пігмаліёна» адбылася ў сакавіку, але можна яшчэ патрапіць на пастаноўкі 4, 5, 6, 8, 9 красавіка. Набыць квіткі можна на сайце тэатра.

«Пігмаліён» – сатырычная класіка, п’еса ірландскага драматурга Бернарда Шоу, якая з моманту выхаду ў 1912 годзе экранізавалася адзінаццаць разоў (культавы амерыканскі мюзікл «Мая цудоўная лэдзі» 1964 года створаны менавіта па гэтай п’есе). У новай версіі, дзе задзейнічаныя беларускія творцы – Мікіта Ільінчык, Раман Трацюк, Таша Кацуба, Аляксандр Адамаў і Сяргей Рылко, – «Пігмаліён» стае падставай для рэфлексіі вакол сацыяльнай напружанасці паміж палякамі і мігрантамі. Па сюжэце пастаноўкі ў недалёкай будучыні Еўрасаюз вырашае дэпартаваць усіх мігрантаў, і ліберальная польская сям’я намагаецца ўратаваць адну дзяўчыну, «лепячы» з яе «сапраўдную еўрапейку» (у Шоу прафесар «лепіць» з вулічнай гандляркі герцагіню). П’есу «перастварыў» Мікіта Ільінчык разам з польскім паэтам, драматургам, рэжысёрам Анджэем Блажэвічам. Ролі выконваюць польскія акторы.

Рэжысёр Мікіта Ільінчык жыве ў Польшчы з 2022 года. Ён вядомы пастаноўкамі «Казінага вострава» ў Бруселі, «F***ing in Brussels» у Быдгашчы, «Emma» ў Варшаве. Двойчы атрымаў польскую тэатральную прэмію «Aurora». П’есу «Say hi to Abdo», якая прынесла прыз летась, выдасць у наступным годзе Skarynapress – па-беларуску і па-ангельску.

Фота: teatr-polski.pl