У Беларусі запускаецца адукацыйны курс для прадпрымальніц Out Loud

Out Loud – гэта бясплатны адукацыйны курс для жанчын, якія як мінімум два гады муцяць свой бізнэс і жадаюць памножыць свае поспехі з дапамогай экспертных артыкулаў, інтэрв’ю і публічных выступаў.

Курс складаецца з 5 аднадзённых модуляў, у рамках якіх адбудзецца 10 варкшопаў. Спікеркі будуць вучыцца ўпэўнена трымацца на публіцы, эфектыўна камунікаваць са СМІ, асэнсавана фармаваць асабісты брэнд і пісаць нармалёвыя тэксты. Сярод іншага распавядуць пра анцідот да сіндрома самазванкі і пра тое, як стаць каралевай сацыяльных сетак і зоркай на ТБ. Падрабязную праграму знойдзеш тут.

За кантэнт сярод іншых адказваюць заснавальніцы PR-IT-агенцтва «Огромный Потанцевал» Яна Гурская і Каця Шкор, кансультантка па прафарыентацыі Таццяна Пуцяціна, выкладчыца курса «Медыядызайн» Акадэміі крэатыўных тэхналогій Ганна Ядлоўская, дырэктарка па вучэбнай рабоце IT Princess Акадэміі Валянціна Чакан.

Курс пасуе тым, хто:

   Вядзе ўласны бізнэс >2 гады.

   Займаецца кансалтынгам і працуе на сябе.

   Гатовая дзяліцца вопытам запуску і вядзення бізнэсу.

   Жадае прасоўваць сябе і сваю справу з дапамогай сваёй экспертызы.

   Адчувае, што ёй не хапае бачнасці ў СМІ.

   Плануе і мае магчымасць (!) рэальна наведаць усе модулі курса.

Місію курса яго стваральніцы сфармулявалі так: «Мы хочам, каб жаночыя галасы гучалі гучней. Важна, каб жаночы вопыт, ідэі і экспертыза часцей з'яўляліся ў публічнай прасторы, бо гэта ключ да разнастайнасці, цікавых дыскусій і новага погляду. Але для гэтага трэба навучыцца гучней заяўляць пра сябе».

Удзел у праграме бясплатны. Для ўдзельніц з рэгіёнаў прадугледжаная кампенсацыя выдаткаў на дарогу ў Менск і назад.

Юлія Малькова

каардынатарка праекта Out Loud

«Я крыху сама сабе зайздрошчу, якім класным атрымаўся курс. Абавязкова падавайцеся, калі ў вас ёсць бізнэс. Расказвайце тым, каму можа быць цікава, запрашайце жанчын з рэгіёнаў далучыцца да нас».

Заяўкі прымаюць да 7 чэрвеня. Вынікі адбору агучаць 15 чэрвеня.

 Падавайся