Куды пайсці на «Ноч музеяў» у Менску?

  • 20.05.2021
  • Аўтар: 34mag
  • 19360

Міжнародны дзень музеяў сёлета трапіў на аўторак, таму некаторыя музеі ўжо адстраляліся на мінулых выходных. А што прапануюць менчукам і гасцям сталіцы ў суботу 22 траўня? Ёсць варыянт, дзе будзе шмат на што паглядзець, ёсць варыянт для аматараў гісторыі, а ёсць варыянт апынуцца ў новай арт-прасторы за Чырвоным касцёлам.

 

«Што адбылося гэтай ноччу». Палац мастацтва

Дзе: Казлова, 3
Калі: з 20:00 да 2:00
Колькі: 5 рублёў

У Палацы мастацтва скампнавалі шчыльную праграму з трох выстаў мастацтва, арт-маркета, выставы дызайнерскай мэблі, графіці-перформансу і музычнай імправізацыі. У «Арт-Беларусь» Канстанцін Селіханаў прадставіць персанальны праект «Унутраны назапашвальнік», у ZAL #2 выставяцца маладыя мастачкі і мастакі Надзея Хмыль, Лізавета Хіхлушка, Лора Паўлава, Савіч Сярожа і не толькі. У кавярні Da.Coffee Анастасія Рыдлеўская ўпершыню пакажа працы 2020-2021 гадоў.

«Ноч на фабрыцы». «Арт-Фабрыка»

Дзе: Свярдлова, 2
Калі: з 18:00 да 23:00
Колькі: free

Ад Палаца мастацтва варта дабрацца да будынка менскай Фабрыкі-кухні – тут адкрываецца новая шматфункцыянальная прастора з канферэнц-цэнтрам і арт-галерэяй. Можна прыйсці і бясплатна агледзецца. Будуць выставы і музыка, але асабліва рэкамендуем лекцыі – уласна пра Фабрыку-кухню і пра канструктывізм як стыль архітэктуры і стыль мыслення.

 

«Гістарычны калапс». Літаратурны музей Петруся Броўкі

Дзе: Карла Маркса, 30
Калі: з 18:00 да 23:00
Колькі: 7 рублёў ці 5 для школьнікаў і студэнтаў

Тут можа быць цікава аматарам гістарычных адкрыццяў. Гэтым разам музейшчыкі вырашылі прысвяціць «ноч» вядомаму суседу Петруся Броўкі – акадэміку Мікалаю Нікольскаму. Што даюць: лекцыі пра містэрыі ў Рымскай імперыі і беларускім фальклоры, дыскусію пра гісторыю старажытнаўсходніх грамадстваў. Таксама будуць чэлендж, гульні, квэсты. Ну і від з вокнаў гэтага музея заўсёды каштуе больш за 7 рублёў, вядома.

«МАС-КУ!». Літаратурны музей Янкі Купалы

Дзе: Янкі Купалы, 4
Калі: з 00:00 да 05:00
Колькі: 5 рублёў

Галоўная цукерка праграмы Купалаўскага музея – у тым, што ноч будзе рэальна ноччу: варушняк расцягнецца аж да пяці раніцы. Тут будуць працаваць інтэрактыўныя пляцоўкі: можна будзе зрабіць фота ў знакамітым Віленскім атэлье, праверыць свае паэтычныя здольнасці, пазнаёміцца з космасам Язэпа Драздовіча. Апоўначы стартуе квэст «МАСтацтва і КУпала». У гэтым музеі, дарэчы, актыўна нагадваюць аб неабходнасці выконваць масачны рэжым: у назве праграмы, на афішы і нават дарыць маскі абяцаюць.

 

Агучванне камедыі Бастара Кітана. Музей гісторыі беларускага кіно

Дзе: Свярдлова, 4
Калі: у 20:30
Колькі: 5 рублёў

Варыянт для тых, хто хоча хоць бы на гадзіну пагрузіцца ў музыку і зусім бяскрыўдны візуал. Камерны аркестр агучыць класічную нямую камедыю Бастара Кітана «Шэрлак малодшы» (1924). Ноты для гэтай гісторыі напісаў амерыканскі кампазітар, піяніст і дырыжор Стывен Прутсман.

Выстава работ Файбіша-Шрагі Царфіна. Галерэя мастацваў «Предместье»

Дзе: Інтэрнацыянальная, 25а
Калі: да 18:00
Колькі: 5 рублёў

Выстава мастака Парыжскай школы адкрыецца акурат пад «Ноч музеяў». Канешне, можна зазірнуць сюды і ў іншы дзень (яна будзе доўжыцца да 13 чэрвеня), але чаму б не прабегчыся па тусовачным зыбіцкім квартале не дзеля кактэйля, а дзеля таго, каб натхніцца колерамі Царфіна? Яны ў яго фантастычныя.

 

Поўная праграма «Ночы музеяў» ва ўсіх гарадах Беларусі

Фота: palasatka