Запускаецца інкубатар малабюджэтнага кіно

Гэта магчымасць для маладых рэжысёраў папрацаваць над сцэнарамі дэбютных поўнаметражак. А два сцэнары нават зафінансуюць, каб яны ўвасобіліся на экранах, і адправяць на фестывалі.

«У бягучых умовах беларускія кінематаграфісты не могуць разлічваць на вялікія бюджэты і студыйныя вытворчыя працэсы. Але гэта не значыць, што яны мусяць гадамі чакаць магчымасці зняць кіно, – пішуць арганізатары інкубатара. – Сучасныя тэхналогіі дазваляюць здымаць кіно за мінімальныя грошы, а задача інкубатара – дапамагчы рэжысёрам рэалізаваць свае ідэі і данесці іх да гледачоў».

Мікрабюджэтнае кіно – гэта абмежаванне, але і магчымасць: у такім фармаце цалкам імаверна можа прарасці нешта новае, чаго беларусы яшчэ не здымалі і не бачылі. Джым Джармуш і Вернер Райнер Фасбіндэр пачыналі шлях у кіно з самых сціплых грошай – а сёння іх імёны ведае ўвесь свет.

 Этапы работы інкубатара: 

1 / Сцэнарная лабараторыя: праекты пад куратарствам будуць даведзеныя да сцэнарыя поўнаметражнага ігравога фільма.

2 / Здымкі двух мікрабюджэтных ігравых поўнаметражных фільмаў, абраных з пяці праектаў сцэнарнай лабараторыі (у фільмаў будзе куратар, які стане і супрадзюсарам фільма).

3 / Прэпрадакшан, постпрадакшан, закрытыя паказы гатовага кіно.

 Як узяць удзел:  адправіць сінопсіс будучага фільма і матывацыйны ліст з расповедам пра свой досвед і растлумачыць, адкуль з’явілася жаданне зняць мікрабюджэтны поўнаметражны фільм, а таксама пра тое, як мікрабюджэтная эстэтыка будзе працаваць на ідэю.

Заяўкі прымаюць да 10 лістапада. Расклад працы лабараторыі і ўсе дэталі – па спасылцы. 

  Падацца

Фота: Kyle Loftus / Pexels