7 маладых беларускіх фэшн-брэндаў

 Lokonkokon 

Просты крой і натуральныя матэрыялы – адметныя асаблівасці брэнда Lokonkokon, за якім стаяць Наташа Дасько і Рыта Лазарэвіч.Часцей за ўсё дзяўчаты шыюць ільняныя сукенкі, але таксама па-майстэрску вяжуць рукавіцы і ствараюць ваўняныя чахлы для гаджэтаў. Яшчэ яны сябруюць з камандай праекта «Каліласка», таму некаторыя аксесуары Lokonkokon робіць з абрэзкаў тканін, якія людзі аддаюць на дабрачыннасць. Лайк за другаснае выкарыстанне!

  Instagram

 Wear Bigel 

Стваральніца гэтага брэнда не прысвячала ўсю жыццё дызайну адзення: Вольга Бігель прыйшла ў сферу моды з журналістыкі. Пачала яна з канструявання мадэляў штаноў, таму што яны імпануюць ёй ідэяй фемінізму. Цяпер можна набыць і кашулі, і пінжакі. Любімы колер Вольгі – вінны, матэрыялы – бавоўна, лён, воўна.

  Instagram

 Dofamine Studio 

Стваральніца брэнда Вераніка Харашун нарадзілася ў Менску, атрымала адукацыю фэшн-дызайнера ў Kingston University ў Лондане і Polimoda International Institute у Фларэнцыі. Але пасля сямі гадоў жыцця за мяжой вярнулася ў Беларусь і ў 2014-м заснавала свой брэнд жаночай вопраткі Dofamine Studio. Вераніка выкарыстоўвае выключна еўрапейскія тканіны, якія сама ж выбірае і замаўляе: так яна захоўвае якасць і эксклюзіўнасць кожнай мадэлі.

Вераніка ўзгадвае, як жыла ў Фларэнцыі і адносіла першыя працы ў італьянскую краму на продаж:

– Фларэнцыя, 2012 год. Я вучылася на другім курсе Polimoda і часам адносіла свае студэнцкія працы ў камісійную краму ў самым цэнтры горада каля Дуома. Крамка зарабляла вінтажнымі Louis Vuitton і Chanel, так што кампанія для маіх паліто і сукенак была някепскай. Мудрагелістыя творы знаходзілі сваіх гаспадынь у асобах спрактыкаваных модай сіньёраў і сіньярыт. Памятаю, на абтачках рэчаў, там, дзе павінна быць этыкетка з лагатыпам, я ўжо вышывала Dofamine.

  Instagram

 Zibra 

Аляксандра Жук і Дарына Вадап'янава – дызайнеркі-пачаткоўцы, якія натхняюцца электроннай музыкай і сучасным мастацтвам. У сваіх працах яны практыкуюць асіметрыю і нелінейны крой, але пры гэтым уважліва ставяцца да дэталяў і нават выкарыстоўваюць ручную вышыўку.

  Instagram

 Poet.ka 

Заснавальніца брэнда – Кацярына Кабанава – з адукацыі лекарка-псіхатэрапеўтка. Раней яна выкладала ў медыцынскім універсітэце. Цяпер Кацярына цалкам пагружаная ў творчасць: піша вершы, распісвае тканіны і шые з іх паветраныя сукенкі.

У інтэрв’ю на 34mag Кацярына распавядае пра свае адносіны з адзеннем:  

– Я думаю, маё адзенне – гэта складнік таго, што я бачу і чым я жыву. Мае ўражанні – гэта і прырода, і адносіны, і сям'я, і музыка, і канцэрты, на якія я схадзіла. Але мой галоўны натхняльнік – гэта ўсё ж прырода, настолькі я «зраслася» з ёй, з яе колерамі і яе танальнасцю. Я люблю гэтыя палі, вясновыя разводдзі, лужыны на палях, колеры зямлі і неба, скал і гор, дрэвы без лісця. У мяне няма праблемы, што восень змрочная. Не магу сказаць, што я заўсёды любіла прыроду ва ўсіх яе праявах, – так стала тады, калі я стала займацца тым, што мне падабаецца.

  Instagram

 LSD 

За правакацыйнай назвай крыецца простая расшыфроўка: Lifestyle Simple Design. Камфорт, мінімалізм, шматфункцыянальнасць – галоўныя каштоўнасці Дар’і Лучанковай-Лебедзевай. І варта адзначыць пасты ў сацсетках, напісаныя з любоўю. Акрамя даволі падрабязнага апісання матэрыялаў, там таксама можна знайсці і рэкамендацыі па спалучэнні рэчаў.

  Instagram

 The Young Clothes 

Віка і Крысціна Леванюк сапраўды шыюць з беларускіх тканін, хоць спачатку працавалі з італьянскімі і турэцкімі матэрыяламі. У іх мы закахаліся яшчэ вясной і зрабілі з імі інтэрв’ю, у якім дызайнеркі развенчваюць міф, што ў Беларусі ўсё кепска:

– Усе былі ў шоку, адкуль такая палітра?! Але гэта робіць наш «Камволь». Проста не трэба баяцца, трэба шукаць. І не лічыць, што ў Беларусі ўсё дрэнна і няма чаго выбраць.

   Instagram