6 правілаў экалагічна адказнага жыцця

 Правіла # 1. Вучыся мастацтву маленькіх крокаў 

Перастаць забруджваць навакольнае асяроддзе – задача значна больш комплексная і складаная, чым, напрыклад, кінуць паліць. Курцы ведаюць, што на шляху да гэтай мэты бессэнсоўна пачынаць з маленькіх саступак і змяншаць колькасць цыгарэт. Але ёсць і добрая навіна: гэтая схема працуе з экалагічнасцю жыцця.

Паспрабуй вызначыцца, якія з экалагічна адказных звычак патрабуюць ад цябе найменшых высілкаў, і пачні з іх. Для кагосьці гэта будзе мыццё посуду ў ракавіне, поўнай мыльнай вады, а не пад струменем. Для іншых – пераход з тампонаў на чашу для менструацыі.

Вельмі проста надурыць сябе: пачынаючы з простага, ты не адчуваеш, што саступаеш уласны штодзённы камфорт на карысць вялікай мэце.

 Выснова # 1 

Пачынай з таго, што табе найпрасцей рабіць. Каб «алічбаваць» свае намаганні, звярніся да даследаванняў, у якіх пазначана, колькі менавіта энергіі ты ашчаджаеш сваімі маленькімі крокамі. Напрыклад, еўрапейскія навукоўцы разлічылі: калі адна гаспадыня перастае выкідаць неспажытую ежу, то свет пазбягае прыблізна 80 кг выкідаў СО2 у год.

 Правіла # 2. Твой асабісты ўнёсак не такі і вялікі 

Уплыў прынятых табой намаганняў будзе вельмі цяжка заўважыць. Вялікіх зменаў экалагічны лад жыцця не прадугледжвае, адно твой здаровы лад жыцця прывядзе цябе да таго, што ты радзей будзеш укручваць новыя лямпачкі дома ды перастанеш выкідаць ежу. Дзеці ў Афрыцы будуць і далей пакутаваць на смагу, а гіганты прамысловасці – па-ранейшаму выкарыстоўваць «неадпаведную» энергію.

 Выснова # 2 

І гэта ўсё цалкам нармальна. Так, мы прызвычаіліся чакаць ад сябе надзвычайных дасягненняў. Але пры гэтым большасць з нас застаецца сярэднестатыстычнымі прадстаўнікамі чалавецтва. Не думай, што твае ашчаджаныя пяць хвілін у душы робяць такую розніцу, што можна тыкаць ёй у нос усім тым, хто яшчэ не спазнаў дзэн і набірае ванну з пенай.

 Правіла # 3. Кожны ўнёсак залічваецца (але ў агульным заліку) 

Вядома, думка пра тое, што не кожны з нас можа і будзе ратаваць палярных мядзведзяў ад вымірання, збівае матывацыю. It´s a trap!

Запомні: кожнае малое намаганне, зробленае табой, улічваецца. Але гэта не так цяжка ўсвядоміць, як наступнае: кожнае малое намаганне ўсіх астатніх таксама ўлічваецца.

Твае бацькі не апранаюцца ў sustainable local крамах еўрапейскага адзення? Задумайся, што яны, магчыма, і не лятаюць у Еўропу самалётам па пяць разоў на год, як ты. Твая бабуля адмаўляецца сартаваць смецце? Звярні ўвагу на тое, як яна мые і выкарыстоўвае тэтрапакі другасна для расады памідораў і перцаў.

 Выснова # 3 

Не катуй сябе і іншых сваімі перакананнямі. Немагчыма працягваць рабіць што заўгодна, калі ідэал дзейнасці загадзя недасяжны. Немагчыма матываваць чалавека метадам асуджэння, запалохвання або прыніжэння.

 Правіла # 4. Недахоп ведаў – твая новая рэчаіснасць 

Узімку, калі беларуская брокалі ўжо адышла, што ты купляеш? Брокалі з Польшчы ці брокалі з Нідэрландаў? Якая з іх «экалагічней»? Шлях з Польшчы карацей, але ў Нідэрландах яна вырошчваецца без выкарыстання пестыцыдаў, круглы год, а фермеры атрымліваюць прыстойны заробак.

Рашэнне прымаць табе – як і безліч падобных рашэнняў, для сур’ёзнага прыняцця якіх у цябе проста не можа быць усіх патрэбных ведаў. Прыйдзецца звыкнуцца з тым, што эфектыўнае спажыванне – гэта мадэль, разлічаная на тое, што ў спажыўца(-ніцы) дастаткова інфармацыі.

 Выснова # 4 

Жорсткая рэальнасць у тым, што ў цябе ніколі не будзе дастаткова інфармацыі. Мажліва, аднойчы ўсе мы будзем мець магчымасць прымаць абсалютна ўзважаныя спажывецкія рашэнні. Пакуль гэта не так, трэба прымірыцца з абмежаванасцю нашых выбараў і рабіць тое, што найбольш адпавядае нашаму пачуццю здаровага сэнсу. І не абвінавачваць іншых у ягонай адсутнасці.

 Правіла # 5. Усведамленне сваіх прывілеяў – крок у патрэбным кірунку 

Людзі, якія з той ці іншай прычыны не вядуць такое ж свядомае жыццё, як ты, сапраўды маюць сур’ёзныя падставы для гэтага. Большасць не валодае тымі ведамі, якімі валодаеш ты. Іншыя не могуць суаднесці абстрактныя дадзеныя пра забруджванне навакольнага асяроддзя з уплывам уласнай гаспадарчай дзейнасці. Некаторыя не бачаць эканамічных прычынаў для таго, каб пачаць жыць экалагічна.

Сапраўды, «экалагічны» лад жыцця – даволі дарагая забава, калі ацэньваць яго ў кароткатэрміновай перспектыве. Так, пакунак тампонаў каштуе прыблізна 2 рублі, а чаша для менструацыі – 20 рублёў. У кароткай перспектыве чаша для менструацыі – інвестыцыя, якую шкада рабіць, асабліва ўлічваючы, што прадукт гэта незнаёмы.

 Выснова # 5 

Уласным прыкладам ты можаш даводзіць людзям, што экалагічна адказнае жыццё – гэта не толькі хобі для фрыкаў у ваўняных шкарпэтках і багатага сярэдняга класа. «Доўгатэрміновае» мысленне – твой козыр, але зважай на тое, што мысліць «доўгатэрмінова» – адзін з навыкаў, якія патрабуюць намаганняў і часу на развіццё.