Галубы ў Telegram: фірмовы стыкерпак ад 34mag

Стыкеры – візуальны слэнг новага часу. Калі няма часу тлумачыць і пісаць абзацы тэксту, лепшы спосаб перадаць думку – даслаць павялічанага ў некалькі разоў ламберджэка з надпісам «гоў тусіць» або «я ўжо ў гаўно». Гэта не толькі чарговая доза мімякімішнасці, але і дэвайс, які стварае дадатковыя, часта непадкантрольныя табе сэнсы, а таксама пераводзіць камунікацыю ў тактыльную сферу.

Упершыню мэсэджынгавыя стыкеры выкарыстала японская карпарацыя Line у сваёй аплікацыі ў 2011-м. І цяпер віртуальную налепку можна атрымаць хоць ад сваёй бабулі, якая хутка ўжо і хромакеем навучыцца карыстацца, – амаль усе мэсэнджары і сацсеткі маюць іх: ад Viber і WhatsApp да Facebook і «Аднакласнікаў». Стваральнікі Line распавядаюць, што ў Японіі абсалютна нармальна, калі муж пасля працы дасылае жонцы стыкер у выглядзе зайчыка з піўком замест таго, каб напісаць «Затрымаюся з калегамі ў барусе».

Стыкеры сёння – першакласны дыджытал-інструмент для прасоўвання і бізнэс-кампаній, і НДА. Напрыклад, першы брэндаваны стыкерпак у Беларусі запусцілі летам 2015-га для фестывалю Freaky Summer Party. Першы пак стыкераў з нацыянальнай тэматыкай і на беларускай мове з’явіўся ў Viber напярэдадні навагодніх святаў ад кампаніі «Бульбашъ». Разышоўся на ўра – усяго адправілі больш за 6 мільёнаў стыкераў!

Ты і сам(-а) можаш бамбіць стыкеры на свой аўтарскі густ у Telegram. Вось табе інструкцыя.

Цяпер і ў 34mag ёсць свой стыкерпак у Telegram з дзёрзкімі галубочкамі, як ты сам(-а)! Калі на тваім iPhone/Android/Windows Phone ужо ўсталяваны Telegram, пампуй бясплатны стыкерпак ад 34mag.net.