План на суботу: фестываль пра страхі і пераадоленне іх

 Калі:  29 чэрвеня, 13:00 – 23:00.

 Дзе:  Галерэя сучаснага мастацтва «Ў», Кастрычніцкая, 19.

 Уваход:  бясплатны, трэба толькі зарэгістравацца вось тут.

Івэнт у Facebook і ВКонтакте.

У нас не вельмі прынята казаць пра тое, чаго баіцца актыўная моладзь. Часцей даводзіцца чуць пра цудоўныя гісторыі поспехаў і выклікаў. Але ж распачаць свой праект, упершыню выступіць публічна ці напісаць пісьмо патэнцыйнаму партнёру, мець зносіны з незнаёмымі людзьмі – гэта можа быць страшна да ледзянога поту. І з гэтым трэба нешта рабіць.

Фестываль «Страшное дело» прапануе табе зазірнуць у «Пакой страху» і «Дворык жахаў», каб выйсці адтуль чалавекам, якому ўсё ні па чым. Чаяванне з ментарамі і ментаркамі дапаможа пачаць сваю справу, а варкшопы моладзевых ініцыятыў натхняць на дзеянні.
 
У праграме знойдзеш майстар-класы па працы ў камандзе, пошуку грашовых рэсурсаў для сваёй ідэі, пераадоленні страху публічных выступаў і страху памылак. Таксама будуць варкшопы па фатаграфіі, калажах, бяспецы ў інтэрнэце, беларусізацыі шыльдаў, азеляненню дахаў і не толькі.

Фэст будзе на карыць усім, у каго ёсць жаданне рабіць нешта крутое, але яны баяцца або не ведаюць, з чаго пачаць. Штурхель натхнення тут прапішуць дакладна.