Faik No More

Ян нарадзіўся ў Гомелі, а Вадзім – у Баку. Калі хлопцам было па 5-6 гадоў, разам з бацькамі яны пераехалі ў невялічкі горад Ака на поўначы Ізраіля. Пра клэш культур на Блізкім Усходзе, які ва ўсю папёр ужо ў першым відосе Orgonite, яны ведаюць не па чутках. У Ацы, як і амаль паўсюль у краіне, у адным раёне разам жывуць рэпатрыянты з былога саўка, арабы, мясцовыя габрэі, мараканцы, эфіопы і аманцы.

«Яшчэ 15 год таму ніхто б не зразумеў гэтага прыколу, – кажа Вадзім. – Культуры яшчэ не былі так перамяшаныя. Калі мы хадзілі ў школу, то ўсе тусаваліся паасобку. А цяпер у маёй маці дома ў лядоўні разам стаяць грэчка і тхіна з хумусам. Калі мы расказваем знаёмым, што грэчка – гэта такая савецкая тхіна, самая папулярная страва на постсавецкай прасторы, усе пачынаюць урубацца. Мясцовыя, у сваю чаргу, любяць зайсці ў рускія крамы, каб пакаштаваць каўбасы ці салёных агуркоў. Такім чынам, мы ў Orgonite адкрываем людзям адну з частак нашага культурнага бэкграўнду».

Orgonite замяшаны на dubstep, trap, hardstyle і edm, але хлопцы ўсё адно ставяцца да яго як да рок-гурта, а на сваю музыку глядзяць як на сучасны электронны рок. Яны працягваюць моду на лакальны рэп-рэйв, якую распачалі калісьці Die Antwoord, а на постсавецкай прасторы падхапілі Tommy Cash і Little Big, якіх Orgonite некалькі разоў «грэў» у Ізраілі. «Яны давалі нам натхненне, бо мы, як і яны, прадстаўляем сваю мясцовую культуру і з’яўляемся часткай сусветнага трэнду – сумесі электроннай музыкі з лакальным кантэкстам. Трэнду “Нічога не саромейся, нічога не асуджай, усё паважай і паказвай як ёсць”».

Хлопцы пазнаёміліся яшчэ падлеткамі і амаль адразу пачалі граць панк-рок. У складзе гурта ShittyCT яны амаль 14 год спявалі злосныя песні пратэсту, а таксама рабілі вясёлыя панк-каверы на блізкаўсходнія гопніцкія трэкі. Тым не менш электронны саўнд падабаўся ім заўсёды, і вось летась яны саспелі для яшчэ аднаго праекта: без аніякага пратэсту і негатыву – толькі суцэльная весялуха. «Так мы тут жывем у Ізраілі. Гэта наш другі, светлы бок. Канешне, мы не ходзім па вуліцы ў галабеях. У Яфе, дзе мы зараз жывем, так ходзяць арабы. Кожны раз, калі ты бачыш гэта, думаеш: “О, як крута, прахалодна, усё праветрываецца, не пацееш”. А ў Ізраілі ж горача, ліпка. Ёсць спадзеў, што мы сваімі кліпамі зробім гэтае адзенне больш модным».

«Вайб гэтай песні – зрабі свой брэнд і не саромейся, таму што ты і ёсць брэнд»

Тэму моды Orgonite працягваюць і ў новым сінгле. «Песня і кліп Adibass – пра месца брэнда ў нашым жыцці. Калі мы былі малымі, нашыя бацькі-рэпатрыянты куплялі нам фальшывыя брэнды, мы хадзілі з імі ў школу, гэта было прыкольна. Верагодна, многія ў свеце адчулі гэты прыкол, калі яны хацелі брэнды, але не маглі іх сабе дазволіць. Вайб гэтай песні – зрабі свой брэнд і не саромейся, таму што ты і ёсць брэнд. Гісторыя хлопчыка, які хацеў быць модным і зрабіў свой брэнд. Спадзяемся, што ён спадабаецца людзям, яны пачнуць друкаваць яго ў сябе дома і хадзіць у ім на рэйвы».