Што зменіць дэкрэт «Аб развіцці прадпрымальніцтва»?

23 лістапада прэзідэнт падпісаў дэкрэт №7 «Аб развіцці прадпрымальніцтва», які даўно чакалі ўсе іпэшнікі і бізнэсмены. У новым выпуску рубрыкі «Працэс» раскладаем дэкрэт па галоўных поінтах: што зменіцца ў працы ўладальнікаў інтэрнэт-крамаў, рэстаранаў і барух, а таксама працаўнікоў у сферы PR і рэкламы.

 

Пра што дэкрэт?

 

Па задумцы дэкрэт № 7 «Аб развіцці прадпрымальніцтва» – пра паляпшэнне бізнэс-клімату і дае імпульс для развіцця прадпрымальніцкай ініцыятывы ў Беларусі. Згодна з ім, дзяржава будзе менш умешвацца ў працу бізнэсу. Дэкрэт спрашчае працэдуры ўваходу на рынак малога бізнэсу і ўводзіць мараторый на падвышэнне падатковых ставак.

 

Праўда, што зарэгістраваць свой бізнэс стане прасцей?

Так. Цяпер для заняткаў адным з відаў эканамічнай дзейнасці, спіс якіх ужо апублікавалі, дастаткова будзе падаць адзінае апавяшчэнне ў выканкам праз службу «адно акно», паштовае адпраўленне з паведамленнем аб уручэнні альбо з дапамогай партала электронных паслуг. На наступны дзень ужо можна будзе займацца заяўленым відам дзейнасці.

У спіс уключаныя гасцінічныя, бытавыя і паслугі па грамадскім харчаванні, перавозкі, рамонтныя і турыстычныя паслугі, вытворчасць адзення, скураных вырабаў, абутку, прадуктаў харчавання, мэблі і будаўнічых матэрыялаў, аказанне псіхалагічнай дапамогі.

Згодна з меркаваннямі экспертаў, да 95% прыватных прадпрыемстваў займаецца нейкім з вышэйпералічаных заняткаў. А значыць, жыццё стане лепей, і ў першую чаргу для тых, хто толькі плануе запусціць падобны бізнэс. Дык не шчоўкай дзюбай!

Бонус: іпэшнікам, бізнэсменам і іншыя суб’ектам гаспадарання дэкрэт дазваляе працу без пячатак. Cheers!

 

Як мяняецца графік працы ўстаноў?

Яшчэ адной радаснай навіной стала магчымасць не ўзгадняць свой рэжым працы, але тут не без кроплі смуроду: калі хочацца працаваць пасля 23.00 ці адчыняцца раней за 7.00 – па дазвол усё ж трэба будзе ісці ў мясцовыя органы.

 

Я працую ў PR ці рэкламе. Як дэкрэт закране мяне?

Дэкрэт робіць не абавязковай распрацоўку праектнай дакументацыі для размяшчэння вонкавай рэкламы. Цяпер дазваляецца без узгаднення размяшчаць рэкламу на транспартных сродках, а таксама – ура! – праводзіць рэкламныя мерапрыемствы ў месцах грамадскага харчавання і бясплатна раздаваць піва і слабаалкагольныя напоі ў якасці прызоў пры правядзенні конкурсаў у грамадскіх месцах.

 

А калі ў мяне ёсць інтэрнэт-крама?

Калі ты адкрыў(-ла) інтэрнэт-краму па продажы хэнд-мэйд шкарпэтак або мыла, парадуем і цябе: зараз такі тып бізнэсу можна карыстацца спрошчанай сістэмай падаткаабкладання (ССП). ССП прадугледжвае меней формаў справаздачнасці, выдаткаў на бухгалтэрыю і ў некаторых выпадках – больш выгадную стаўку падатку. Напрыклад, калі пры агульнай сістэме падаткаабкладання (АСП) са 1000 BYN прыбытку ты заплаціш 180 BYN як арганізацыя і 160 BYN як ІП, то пры ССП са 1000 BYN выручкі (не ўлічваючы расходаў) – адпаведна 50 ці 30 BYN. Разабраў(ла)ся?

 

Ці будуць падвышаць падатковыя стаўкі?

Не, прынамсі да 2020 года. Мараторый на падвышэнне падатковых ставак да 2020 года – гэта яшчэ адзін неверагодны падарунак дэкрэта. Гэтае правіла дзейнічае на ўсё, акрамя ставак падаткаў, прывязаных да беларускага рубля.

 

У мяне ёсць рэстаранчык ці баруха. Што новага?

Нядаўна ў бары «На пляжы» супрацоўнікі міліцыі прынялі кактэйлі ў бутэлечках, якія гатуе сам бар, за нелегальны алкаголь і ўсё канфіскавалі. Цяпер рабіць і захоўваць кактэйлі і настойкі ў рэстаранах і барах – легальна.

Згодна з дэкрэтам, рэстаратары маюць права вырабляць і рэалізоўваць прадукцыю з аб'ёмнай доляй этылавага спірту больш за 7 адсоткаў шляхам змешвання і (або) настойвання гатовых алкагольных напояў з іншымі харчовымі прадуктамі. Для вырабу такой прадукцыі не патрабуецца атрыманне ліцэнзіі на дзейнасць, звязаную з вытворчасцю алкагольнай і нехарчовай спіртаўтрымліваючай прадукцыі і нехарчовага этылавага спірту.

Дадатак №3 да дэкрэта нагадвае, што ў будынках і памяшканнях нельга выкарыстоўваць піратэхнічныя вырабы і адкрыты агонь (свечы, факелы) – ну а раптам ты хацеў адкрыць рэстаран з фанершчыкамі? Але і тут ёсць нюансы: выключэнне робіцца для агню ў культавых будынках, свечак у спа-салонах і для «аб’ектаў грамадскага харчавання пры афармленні сталоў, падачы блюд і вырабаў».

Калі ты шукаеш новае памяшканне для крамы ці рэстарана, то зараз адчыніцца можна ў офісным памяшканні, калі астатнія суседзі будуць не супраць. Раней для гэтага трэба было змяняць мэтавае прызначэнне і займала ўсё не менш за месяц.

 

Калі ты хочаш запрасіць замежніка на працу?

Скажам, у цябе з’явілася звышгеніяльная ідэя: адкрыць майстэрню па вырабе мексіканскіх понча ў цэнтры сталіцы. І ты вырашыў(-ла) запрасіць старога трушнага майстра-мексіканца. Па былых парадках ты б шмат вазіў(ла)ся з паперамі, каб прывезці яго ў горад-герой. Але калі твой мексіканец – пераможца міжнароднага (нацыянальнага) конкурсу, што гарантуе яго прафесійнае майстэрства, – вуаля, прывозь яго сюды і адразу запускай на працу! 

 

Калі табе не ўсё адно на навакольнае асяроддзе?

Калі ты вядзеш экастайл жыцця, у нас для цябе добрая навіна. Дадатак №5 абавязвае складаць і выконваць планы па змяншэнні колькасці адкідаў на ўсіх прадпрыемствах, а таксама гаворыць пра абавязковае існаванне персоны, адказнай за працу з адкідамі.

У дадатку прапісаныя неабходныя для выканання аперацыі для розных тыпаў бізнэсу: выкарыстоўваеш шмат вады – рабі ўнёскі на ачышчальныя мерапрыемствы; парушаеш раслінны ці жывёльны свет – укладайся ў іх аднаўленне. Ці гэта не цуд?

 

Ілюстрацыя by Sheeborshee

 


КАМЕНТАРЫ (1)

Felix
Felix | 2017-12-07 02:45:03

Добры малюнак!

КАМЕНТАВАЦЬ