Як адзначыць стагоддзе БНР?

 

Варыянт 1. Стрыманая павага

 

 Сядзі дома і чытай кнігу Сяргея Шупы «Падарожжа ў БНР» 

Сяргей Шупа – журналіст Радыё Свабода. Як далікатна сказаў ён на прэзентацыі кнігі, «гэта не навуковая праца і не мастацкі твор. Хутчэй, нешта сярэдняе – "гісторыя для чайнікаў"».

 

 

 Паглядзі цыкл відэасюжэтаў «Гісторыя пад знакам Пагоні» 

Гэта цыкл праграм тэлеканала «Белсат» пра знакавыя гістарычныя падзеі і асобы беларускай гісторыі. Усё, аб чым табе было сорамна спытаць і лянота шукаць, даведаешся ад пісьменніка Уладзіміра Арлова і доктара гістарычных навук Аляксандра Краўцэвіча.

 

 

 Купі білет на канцэрт Лявона Вольскага 

Гомель, Барысаў, Віцебск, Берасце, Магілёў, Горадня, Бабруйск, вам хутка пашчасціць ужывую ўбачыць і пачуць дрэдастага Лявона! А калі ты жывеш у іншым горадзе, рэкамендуем зладзіць бас-тур – гэта заўсёды бадзёрыць.

 

 

 Паслухай «Крамбамбулю» 

Свабоду не стрымаць!

 

 

Варыянт 2. Выпіць-закусіць

 

 Зрабі бел-чырвона-белыя шоты 

Глеб з бара «Карма» прапісаў: «Першы пласт – звычайны цукровы сіроп. Другі – лікёр Кампары. Трэці – гарэлачка. Шот лёгкі, але горкі, як наша доля». Мы дамовіліся, што 25 сакавіка ў «Карме» можна будзе перакуліць гэты б-ч-б дрынк.

 

 

 Звары хатнюю крамбамбулю 

Моцная, пякучая, хуткая. Ідэальны напой для таго, каб сабрацца з бацькамі за святочным сталом. Рэцэпт знойдзеш тут.

 

 

 Схадзі ў чабурэчную на Валадарскага 

Калі ты не ведаеш, то менавіта ў гэтым будынку ў 1918 годзе і падпісалі Устаўную грамату, якая абвясціла незалежнасць БНР. Хутчэй за ўсё, там будзе не праціснуцца. Але перафразуем прыказку і скажам, што лепш цесната ў чабурэчнай, чым у аўтазаку.

 

 

 

Варыянт 3. Выхад у народ

 

 

 Зрабі б-ч-б макіяж 

Аня Жданава падказвае, як схаваць свайго ўнутранага партызана: «Як схаваць сінякі пад вачыма і пры гэтым выглядаць нетрывіяльна? Чырвоная памада – гэта тое, што прыйдзе вам на дапамогу. У нашай справе галоўнае – дзёрзкасць, смеласць і адрывістасць мазка. Чым менш часу, тым эфектней вынік. Рэкамендую выходзіць так на месцы масавых зборышчаў у вашым горадзе і выклікаць уражанне».

 

 

 Прайдзіся па месцах, звязаных з БНР 

Калі ў цябе Android, пампуй дадатак «BNR 100», апранай навушнікі і ідзі ў цэнтр Менска. Аўдыягід раскажа табе пра знакавыя месцы, звязаныя са станаўленнем беларускай нацыянальнай дзяржаўнасці.

 

 

 Схадзі «паганяцца» ў конны клуб 

І сфоткайся, тыпу ты вершнік(-ца) на «Пагоні».

 

 

 Затусі ля Вялікага тэатра оперы і балета 

Канцэрты, вулічная ежа, кірмаш – усё як на звычайным фестывалі, толькі ў міжсезонне і пры паўсюднай сімволіцы БНР. Праграму глядзі тут. Абяцалі без затрыманняў, але яны ўжо пачаліся. У Берасці і Горадні таксама будзе легальны гарадскі дзвіж.

 

 

 Праспявай у гей-караоке «Мы выйдзем шчыльнымі радамі» 

Рубяжоў свядомасці, як ты разумееш, шмат.

 

 

Варыянт 4. Сумнеўны

 Набудзь асабісты аўтазак і арганізуй тур з поўнай інсцэніроўкай «хапуна» 

Хто праспявае «25 сакавіка – лезе ў аўтазак нага», будзе вызвалены.

 

Вiзуал: tut.by, symbal.by, bnr100.by