Даследаванне: 42% слухачоў і слухачак падкастаў абіраюць гумар

Хто слухае падкасты?

Цікава, што ў сацыяльна-дэмаграфічным плане слухачы і слухачкі падкастаў нічым істотна не адрозніваюцца ад тых, хто падкастаў не слухае. Унутры групы аматараў ды аматарак аўдыяшоу таксама зачапіцца амаль няма за што. 

Агульны партрэт атрымаўся такі:

  49% – жанчыны, 51% – мужчыны;
  33% – ва ўзросце 25–34 гадоў, 29% – 35–44;
  29% жывуць у Менску, 37% – у гарадах-стотысячніках;
  34% атрымалі сярэднюю спецыяльную адукацыю, 32% скончылі ВНУ;
  75% адказалі, што маюць сярэдні дастатак.

Як у Беларусі слухаюць падкасты?

Назіранні, на якія варта звярнуць увагу беларускім падкастарам і падкастаркам:

Якія падкасты заходзяць лепш?

Цікава, што большай папулярнасцю карыстаюцца размаўляльныя фарматы тыпу інтэрв’ю ці ток-шоу. Аўдыядакументалкі і сола-падкасты тут крыху прайграюць.

Нельга ігнараваць той факт, што беларусы і беларускі, як вынікае з даследавання, шукаюць у кантэнце найперш магчымасць атрымаць станоўчыя эмоцыі і адцягнуцца ад клопатаў. Большасць апытаных слухае падкасты, каб бавіць час, і тэмы абірае адпаведныя: музыку, гумар, кіно, псіхалогію, здароўе. Запыт на «сур’ёзныя» топікі, кшталту палітыкі, гісторыі, эканомікі, таксама ёсць, але такія падкасты заўсёды будуць больш нішавымі. І нішавымі ўнутры нішавых былі і застаюцца падкасты, арыентаваныя на нацыянальную мову і культуру. Падкрэслена беларускі кантэнт рэдка з’яўляецца забаўляльным. 

«Беларускае – гэта амаль заўсёды праблемнае, балючае, цяжкае, гэта сегмент рэальнасці, які нячаста выходзіць у паўсядзённасць ці які большасць лічыць за лепшае не бачыць у сваёй паўсядзённасці, Ён проста не адпавядае запытам большасці слухач_ак, – канстатуюць у БАМ. – Стварэнне беларускага кантэнту, які б адпавядаў запытам больш шырокай аўдыторыі (напрыклад, забаўляльны кантэнт, самаразвіццё, адукацыя і іншыя “няцяжкія” тэмы), магчыма, маглі б змяніць сітуацыю і скарэктаваць успрыманне “беларускага” ў цэлым».

Зразумела, што і «складаны» кантэнт заўсёды знойдзе сваю публіку – можа, нават болей адданую. Гаворка тут хутчэй пра тое, што ў беларускім падкастынгу ёсць незанятыя нішы, актыўнасць якіх пайшла б на карысць усёй індустрыі. Агулам атрымліваецца, што да беларускага падкастынгу аўдыторыя, калі яна яго ведае, адносіцца станоўча, і тут бачыцца вялікі патэнцыял, які пакуль не надта рэалізаваны.

Цалкам даследаванне пра тое, як у Беларусі цяпер заходзяць падкасты, можна пачытаць па спасылцы.

Фото: Palasatka