7 анлайн-курсаў для актывістаў

Медыя і інфармацыйная пісьменнасць

 Дэдлайн:  27 кастрычніка.

 Дата правядзення:  29 кастрычніка.

Фэйкавыя навіны, булінг у сацсетках, рэпрэзентацыя розных людзей у медыя, анлайн-актывізм, Black Lives Matter ды іншыя рухі за грамадзянскія правы – як з усім гэтым разабрацца, натрэніраваць крытычнае мысленне і звязаць медыяпісьменнасць з дэмакратычнай супольнасцю? Эксперты абмяркуюць гэта ўсё падчас гадзіннай зум-сесіі.

Мастацтва сторытэлінгу

 Дэдлайн:  27 кастрычніка.

 Дата правядзення:  28 кастрычніка – 18 лістапада.

Анлайн-курс для тых, хто хоча авалодаць навукай сторытэлінгу і напоўніцу выкарыстоўваць навык распавядаць гісторыі. Натхненне, прыклады, гульні і практыкаванні – атрымаеш карысныя інструменты і для працы, і для асабістага развіцця. Звярні ўвагу: гэты курс платны, можна зарэгістравацца на канкрэтны варкшоп або на ўвесь курс адразу.

Аналітычная журналістыка

 Дэдлайн:  31 кастрычніка.

 Дата правядзення:  лістапад 2020 – люты 2021.

Бясплатны курс ад Беларускай асацыяцыі журналістаў – гэта 8 модулей, прысвечаных структуры аналітычнага артыкула, мастацтву працы з лічбамі і цытатамі, а таксама спосабам глядзець на адну сітуацыю з розных бакоў. Фармат навучання: заняткі па дзве гадзіны раз на два тыдні. Магчыма, будуць і афлайн-сустрэчы з экспертамі ў Менску (калі ковід раптам адступіць).

Дыджытал у адукацыі і сацыяльным прадпрымальніцтве

 Дэдлайн:  4 лістапада.

 Дата правядзення:  14 лістапада – 12 снежня.

Зімовая беларуска-нямецкая анлайн-школа Digital4Social запрашае людзей да 30 гадоў, якія жадаюць больш даведацца пра лічбавыя навыкі і інструменты, патрэбныя для сацыяльнага прадпрымальніцтва. Выкладчыкі школы – эксперты з Германіі, Вялікабрытаніі і Беларусі. Тэмы: асновы інтэрнэт-эканомікі, навыкі для сацыяльнага бізнэсу, камунікацыя ў камандзе і з анлайн-супольнасцямі, візуалізацыя інфармацыі, новая этыка адукацыі, лічбавае навучанне, трэнды ў адукацыі і прадпрымальніцтве. Заяўку трэба афармляць па спасылцы.

Эфектыўная камунікацыя

 Дэдлайн:  8 лістапада.

 Дата правядзення:  10–12 лістапада.

Анлайн-курс па эфектыўнай камунікацыі распрацаваны як частка арганізацыйнага развіцця для валанцёрскіх арганізацый, але дакладна будзе карысны ўсім. Курс складаецца з двух вэбінараў.

У абарону лясоў і супраць змены клімату

 Дэдлайн:  18 лістапада.

 Дата правядзення:  25 лістапада.

Гэты івэнт – частка вялікай анлайн-канферэнцыі, прысвечанай таму, як мы можам процідзейнічаць змене клімату. Тут будуць казаць пра тое, чаму дрэвы і лес так крытычна важныя і як яны могуць змяніць нашы паводзіны і спажывецкія звычкі на больш экалагічна дружалюбныя.

Лічбавае грамадзянства

 Дэдлайн:  18 лістапада.

 Дата правядзення:  14–19 снежня.

Віртуальная прастора стала паўнапраўнай часткай нашай штодзённасці, але не ўсе з'яўляюцца адказнымі карыстальнікамі гэтай прасторы. Як быць лічбавым грамадзянінам без фэйкавых навін і мовы варожасці, раскажуць на курсе.