14 адборных падзей ліпеня
- 04.07.2019
- 4180
Разам з ліпеньскай прахалодай у Менск прыйшлі крутыя івэнты. Мы маглі напісаць пра канцэрты 30 Seconds To Mars і Bring Me The Horizon, але пра іх і так усе ведаюць. Замест гэтага трымай 14 невідавочных івэнтаў, з якімі тваё лета пройдзе максімальна яскрава.
THE GLITCHHH BY | ENTHA UK
Калі: 4 ліпеня, у 20:00.
Дзе: TNT Rock Club (вул. Рэвалюцыйная, 9А).
Кошт: free.
У Менск вязуць гурт éntha – каманду з Манчэстэра, якая выдае хвацкі шугейз. Падтрымліваць брытанцаў будуць The Glitchhh – менскія музыкі, якія ствараюць якасны эксперыментальны рок.
1234 Х FOUNDAMENTAL
Калі: 5 ліпеня, у 23:00.
Дзе: Ок16 (вул. Кастрычніцкая, 16).
Кошт: з рэпостам афішы – 10 BYN, да паўночы – 5 BYN. Без лішніх рухаў – 15 BYN.
Выдатная магчымасць уляцець на сумесную вечарыну аб'яднанняў «1234» і Foundamental Network. Музыка вечара – саўндтрэкі ад Verde, Salut 80, Viikatory, Foundamental Dj's і Elena Sizova.
Калі: 6 ліпеня, у 10:00.
Дзе: Палігон «Трасцянецкі», адпраўленне са станцыі метро «Магілёўская».
Кошт: экскурсія бясплатная, але патрэбная рэгістрацыя.
Працягваем тапіць за экалогію. Гэтым разам ты зможаш бясплатна наведаць палігон «Трасцянецкі» і ўразіцца горамі пластыкавага смецця: пасля ўбачанага дакладна не захочацца чапаць бясплатны пакет у гіперы. Таксама табе абяцаюць экскурсію па сартавальным заводзе, дзе пластыкавую ўпакоўку ператвараюць у футбольную форму, садовую мэблю і іншыя патрэбныя штукі.
Калі: 6 ліпеня, у 20:00.
Дзе: Культ. цэнтр «Корпус» (пр-т Машэрава, 9, корпус 8).
Кошт: 5 BYN – папярэдне, 7 BYN – у дзень спектакля.
Спектакль «Апошнія сведкі» – гэта сумесная праца Святланы Алексіевіч і нямецкага рэжысёра Ёхана Лангнера. У пастаноўцы сабраныя ўспаміны аб нацысцкім тэроры і злачынствы вермахта ў Беларусі. Пасля паказу цябе клічуць на дыскусію – выказаць свае думкі і абмеркаваць убачанае.
Калі: да 18 ліпеня, у 18:40.
Дзе: кінатэатр «Піянер» (вул. Энгельса, 20).
Кошт: 6 BYN.
Юрый Дудзь паглядзеў «Дылду» ў Канах, а табе нічога не застаецца, як глянуць гэты фільм у Менску, пакуль ён яшчэ ў пракаце. У новай кінастужцы малады, але аблашчаны крытыкамі расійскі рэжысёр Кантэмір Балагаў распавядае пра жыццё франтавічак у пасляваенным Ленінградзе. Водгукі гледачоў самыя розныя: ад поўнага захаплення да расчаравання зацягнутымі дыялогамі. Тым цікавей сфармаваць сваё меркаванне.
Калі: 7, 14 і 28 ліпеня ў 21:00.
Дзе: Ок16 (вул. Кастрычніцкая, 16).
Кошт: free.
Хочаш глядзець фільмы, але кінатэатравы фармат табе не вельмі? Прыходзь на ўлюбёную Кастрычніцкую: тут ва ўнутраным дворыку «Ok16» пройдуць кінапаказы ад «Белкіналета», «Нефільтраванага кіно» і «Кінабалагана». Прыемны бонус – на тэрыторыі працуе бар!
Калі: 9 ліпеня, у 19:00.
Дзе: кніжная крама «Сон Гогаля» (вул. Леніна, 15).
Кошт: free.
Беларуска-амерыканская паэтка Вальжына Морт і пісьменнік – прэтэндэнт на «Большую книгу» Альгерд Бахарэвіч у прыемнай абстаноўцы паразважаюць пра мову і нюансы перакладу мастацкіх твораў. Курыраваць дыскусію будзе, вядома ж, Юля Цімафеева – беларуская паэтка і перакладчыца.
Калі: 12 ліпеня, у 20:00.
Дзе: «Меламаны» (пл. Свабоды, 23).
Кошт: 30 BYN.
Прыезд «Пасош» – гэта не толькі магчымасць пашалець пад музыку расійскага поп-панк-трыа, але і важкая нагода наведаць новенькую пляцоўку «Меламаны» на плошчы Свабоды. Чытай наша інтэрв'ю з прадстаўнікамі «новай гітарнай хвалі» і спяшайся пачуць музыкаў ужывую – упэўненыя: будзе крута.
Калі: 13 ліпеня, у 19:00.
Дзе: клуб Hide (вул. Кастрычніцкая, 19).
Кошт: да 7 ліпеня – 20 BYN, з 8 па 12 ліпеня – 25 BYN, на ўваходзе – 30 BYN.
Адзін фестываль электроннай музыкі, чатыры танцпляцы і 24 артысты з Даніі, Расіі, Ізраіля і Беларусі. Дарэчы, сёлета «Космас наш» адзначае пятнаццацігоддзе: выдатная нагода пратанцаваць да світання.
FRIDA KAHLO. DANZA DE LA MUERTE
Калі: 14 ліпеня, у 17:00.
Дзе: Культ. цэнтр «Корпус» (пр-n Машэрава, 9, корпус 8).
Кошт: free.
65 гадоў таму памерла мексіканская мастачка Фрыда Кала. Гадавіна смерці ў Мексіцы – гэта не горкія слёзы, а падстава ўспомніць добрага чалавека песнямі і скокамі. Менавіта за гэтым цябе і запрашаюць у «Корпус»: падрыхтуй сваю калаверу і трымай пляшку тэкілы напагатоў!
Калі: 20 ліпеня, у 11:00.
Дзе: Культ. цэнтр «Корпус» (пр-т Машэрава, 9, корпус 8).
Кошт: 90 BYN.
Івэнт для тых, хто прагне трапіць у IT-індустрыю. Дакладчыкі з Масквы, Кіева, Піцера, Харкава ды іншых гарадоў збяруцца ў Менску з выступамі, прысвечанымі мове JavaScript. Ніякіх запісаў дакладаў – толькі эксклюзіўны кантэнт, dev-кам'юніці і піва ў перапынках.
Калі: 20–21 ліпеня, у 19:00.
Дзе: Цэнтральны Батанічны сад (вул. Сурганава, 2В).
Кошт: 15 BYN – адзін чалавек, 25 BYN – сямейны білет. Дзецям да 12 гадоў уваход вольны.
Летась Батанічны сад запаўнялі музыкі. Цяпер тут ладзяць усё больш сямейныя фэсты. 20–21 ліпеня гэтую пляцоўку зоймуць прадстаўнікі разнастайных летніх прафесій (якіх – пакуль сакрэт). Прастора саду будзе падзеленая на тэматычныя вуліцы, і маленькія наведвальнікі змогуць паспрабаваць сябе ў новай справе, атрымаць за гэта зарплату і выдаткаваць яе на цацкі ў спецыяльнай краме. У даважак – тэатральныя і музычныя пастаноўкі, фуд-корт і куча майстар-класаў.
Калі: 25 ліпеня, у 19:00.
Дзе: Re:Public (вул. Прытыцкага, 62).
Кошт: 30–60 BYN.
Летась выступ IC3PEAK падоўжыўся ўсяго паўгадзіны, але ў гэтым месяцы расійскі дуэт мае намер адыграць поўную праграму. Змрочная эстэтыка, ламаная электроніка і гісторыі пра смерць, якой больш няма, – час нагнаць усё тое, што мы прапусцілі.
Калі: 29 ліпеня, у 11:00.
Дзе: вуліца Кастрычніцкая.
Кошт: free.
Фестываль Vulica Brasil, які перайшоў у фармат біенале, вяртаецца. Менскія вуліцы рыхтуюцца да ператварэння ў вулічныя галерэі: узбройвайся камерай і адпраўляйся пстрыкаць муралы, скульптуры і графіці. У апошні дзень фестывалю на Кастрычніцкай пройдзе традыцыйнае свята. Глядзі, як гэта было ў 2017-м. І чакай у хуткім часе наш падрабязны гайд па фэсце!
Менск – горад жывы. Кожны дзень тут здараецца штось карыснае, цікавае ды прыгожае. Каб не прапусціць самы тлушч – тэрмінова джойн наш тэлеграм-канал Lost in Minsk.