34mag

Зацьміць сістэму

Рубрыка: ВІДЭА-НЯВІДЭА
13.02.2017
Аўтар: 34mag
6630

Напярэдадні выхаду дэбютнага альбома менскай індастрыял-нойз-банды The Glitchhh прэзентуем іх другое відэа на сінгл Eclipse, якое хлопцы запісалі разам з берасцейскім андэрдогам Воўкам Плюмбумам, салістам гуртоў NABR і Plum Bum. Суцэльнаметалічны калаб!

The Glitchhh – маладая беларуская група, якая ў 2016 годзе прайшла ў фінал адборачнага туру «Басовішча», грае рок-інструментал з адценнем нойзу, блюзу, шугейзу і ўсяго таго, што расцягвае тваю свядомасць шматлікімі гітарнымі дылэямі і дысторшанамі, а зверху накідвае індустрыяльнымі барабанамі. У гурце граюць тры хлопцы – Жэня на гітары, Ігар на басе і Федзя на барабанах. У снежні 2016-га на старонках 34mag мы прэзентавалі іх дэбютны сінгл і кліп Trap. Сёння – прэзентацыя другога відэа на новы сінгл Eclipse.

The Glitchhh пра кліп:

– Наш новы сінгл Eclipse мы запісалі разам з беларускім музыкам Воўкам Плюмбумам. Ідэя сумеснага трэка з’явілася даўно. Калі вырашылі запісваць альбом, у нас ужо было некалькі варыянтаў, але ў выніку спыніліся на гэтай кампазіцыі.

Воўка Плюмбум пра асноўную ідэю песні:

– Уся справа ў сістэме, у яе варожасці і разбуральнай сіле. Чалавек малы і слабы, чалавеку складана заставацца такім. Часта ўсе імкнуцца да большага памеру, найвышэйшага выніку. Любое жаданне такога кшталту адрынаецца сапраўднай істотай і варожа ўспрымаецца ёю. У выніку ўсіх дзеянняў узнікае боль, кроў, злосць і азарт. А як фінал – смерць. Любіце адно аднаго, сябры!

Кліп здымала берасцейская каманда Shayon Product. Рэжысёрам выступіў Paul Shayon, аператарам – Ігар Гусеў. Праца над кліпам вялася яшчэ летам 2016-га. Здымаўся ён у Берасці – горадзе, які сам з’яўляецца адным з галоўных герояў кліпа і песні.