Як арганізаваць фэст у сябе на раёне?

  Самае галоўнае – адказаць сабе, навошта ты гэта робіш і для каго. Хочаш перазнаёміць суседзяў паміж сабой? Вырашыць нарэшце пытанне з паркоўкай у двары? Зрабіць свята для дзяцей? Паставіць у раённым парку модны варкаўт? Памяняць імідж свайго раёна ў вачах сяброў?

  Пастарайся сфармуляваць мэту, задачы і мэтавую аўдыторыю максімальна канкрэтна і запісаць іх у асобны файл – у будучыні ён стане тваім асноўным працоўным дакументам.

  Складзі простую і зразумелую абвестку пра набор у каманду арганізатараў фэсту. Не абмяжоўвайся расклейкай друкаваных экзэмпляраў. Знайдзі ўсе магчымыя суполкі ў сацыяльных сетках і на форумах, прысвечаныя твайму раёну. Збяры як мага больш актыўных людзей, паміж якімі можна размеркаваць розныя зоны адказнасці.

  Адначасова збірай ідэі па актыўнасцях ад мясцовых студый, гурткоў і асобных жыхароў. Заняткі ёгай, тэатральнае прадстаўленне, майстар-клас па дыджэінгу – усё тое, што стане начыннем твайго фэсту. Цябе ўразіць, што ўмеюць рабіць людзі, з якімі ты штодзённа стаіш у чарзе па малако.

  На гэтым жа этапе пачынай шукаць партнёраў і спонсараў. У залежнасці ад дамоўленасцяў, спонсары могуць узяць частку грашовых выдаткаў на сябе альбо падтрымаць «прадуктам»: забяспечыць пакетамі для смецця, балонікамі, алоўкамі і паперай, гукавым апаратам – усім, што можа спатрэбіцца як на падрыхтоўчым этапе, так і падчас самога івэнту.

  Партнёры патрэбныя, каб узмацніць канцэптуальны бок твайго фэсту і распаўсюдзіць інфу пра яго сярод шырокай аўдыторыі. Для гэтага выдатна пасуюць суполкі архітэктараў, урбаністаў.

  Расказвае адзін з арганізатараў леташняга фэсту ў Малінаўцы Аляксей Стрэльнікаў: «Мы запрасілі групу маладых архітэктараў, якія правялі даследаванне ў парку Паўлава і высветлілі, як мясцовыя юзаюць гэтае месца, што там можна палепшыць і што мы можам паспрабаваць зрабіць падчас самога фэсту, напрыклад пасадзіць фіта-гарод ці абсталяваць незвычайную дзіцячую зону».