34mag

Тапёрскія фокусы

31.08.2016
Аўтар: 34mag
6287

У гэтую суботу, 3 верасня, Гётэ-інстытут і канцэртная агенцыя BOpromo прадставяць у Менску фестываль нямога сінематографа з жывой агучкай «Кіно і немцы». У праграме заяўленыя нямецкі электроншчык Фелікс Кубін, беларускі мінімаліст Весялін Румянцаў, а таксама вандроўны кінатэатр на пажарнай машыне Wanderkino. Мы пагутарылі з дырэктарам агенцыі Аляксандрам Багданавым пра дэталі фэсту.

Мерапрыемства плануецца як пікнік-кінапрагляд пад адкрытым небам у двары завода МЗКР ля Event Space – там, дзе ты танчы_ла на MZOR-пікніках гэтым летам. На ўтульным лужку прасторы каманда пабудуе паўнавартасны тапёрскі кінатэатр для эксперыментаў з кіно і музыкай.

«“Кіно і немцы” – гэта адказ на шматлікія выкрыкі вакол нас пра тое, што “хочацца, як у Берліне”, – кажа арганізатар імпрэзы, дырэктар BOpromo Аляксандр Багданаў. – А як у Берліне? Людзі самі сабе арганізоўваюць святы ў дварах і раённых скверах, тусуюцца, весяляцца, а яшчэ ўбіраюць у сябе нешта новае. Берлінцы даўно зразумелі: калі ты дазваляеш культуры развівацца ў непасрэднай блізкасці, ты дазваляеш пасяліцца ёй ўнутры сябе».

Сам кінатэатр – праект Wanderkino – гэта пераробленая двума музыкантамі з Ляйпцыга, скрыпачом Гюнтардам Штэфанам і піяністам Тобіясам Ранкам, старая пажарная машына маркі Magirus Deutz 1969 года выпуску. «Вандэркіно» спецыялізуецца на паказах нямога кіно розных жанраў з жывым музычным суправаджэннем. На інструментах граюць самі стваральнікі, яны ж шафёры і кінамеханікі.

«Ініцыятарам выступіў менскі Інстытут імя Гётэ, які знайшоў гэтых немцаў з унікальным перасоўным арт-аб'ектам і прапанаваў прывезці яго ў Менск з паказамі. Вядома ж, мы, як аматары змешаных жанраў і нестандартнай падачы, загарэліся, – працягвае Саша. – Пажарны аўтамабіль-алдтаймер Magirus Deutz (1969) служыць тэхнічнай базай для ўсёй кінатэхнікі, забяспечвае святло і гук, транспартуе крэслы ды іншую неабходную мэблю і інструментар. Такім чынам, практычна ў любым месцы можна разгарнуць у самыя кароткія тэрміны цэлы оўпэн-эйр-кінатэатр. Кінапаказы праходзяць у настальгічнай атмасферы часоў зараджэння кінамастацтва».

Сёлета ўвесь свет святкуе стагоддзе з узнікнення дадаізму – авангарднай плыні ў мастацтве, з твораў якой мы смяяліся яшчэ ў школе. Так-так, варта ўспомніць пісуар Дзюшана, падмаляваныя ім жа вусікі Джаконды, трубку, якая не трубка, і іншыя pieces of art. У праграме фестывалю «Кіно і немцы» таксама будзе чутны адбітак дады. Кінатэатр пакажа фільм знакамітага французскага рэжысёра, заснавальніка жанру музычнага кіно Рэнэ Клера «Антракт», які большасць дадаістаў праз падобны на сон сюжэт палічылі ўвасабленнем сваіх мастацкіх ідэй. Агучваннем фільма зоймецца Фелікс Кубін – нямецкі электроншчык, вядомы яшчэ з 80-х сваімі эксперыментамі з панк-эстэтыкай, нон-канфармізмам, класічнай музыкай, musique concrete, авангардызмам і Юрыем Гагарыным, карацей, прыязджае жывая легенда і эксцэнтрычны перформер – сапраўдны прадстаўнік нямецкага андэграўнду.

«Асабіста для мяне ягоная музыка заўсёды асацыявалася з саўндтрэкамі да дзікага касмічнага кіно, – кажа Багданаў. – І гэты прыезд стаў магчымы толькі пры канцэптуальным змешванні яго музычнага выступу са старым кіно. Мы прапанавалі яму паўдзельнічаць у такім эксперыменце і, вядома, Фелікс пагадзіўся. Нават не ўяўляю, што з гэтага атрымаецца, але дакладна будзе захапляльна». Пасля тапёрскай агучкі Фелікс таксама выступіць з лайв-праграмай.

«Як і “Белое зеркало”, наш новы замут – гэта спроба аб'яднаць розныя напрамкі ў мастацтве, прыгатаваць экзатычны кампот для насалоды вачэй, вушэй, сэрца і мозгу тых, хто гатовы ўспрыняць нешта новае і незвычайнае»

Музыкі і кінамеханікі з Wanderkino пакажуць і агучаць кароткаметражку «The Wacky World of Mack Sennett» (1914) пра канадскага рэжысёра камедый Марка Сенэта, «The Garage” (1920) Роска Арбакла з удзелам знакамітага коміка нямога кіно Бастэра Кітана і, канешне, неўміручага Чарлі Чапліна з фільмам «На плячо!» (1918).

Такая крутая праграма не змагла абысціся без адпаведных беларускіх удзельнікаў. З беларускага боку на імпрэзу запрошаныя вядомы ў авангардных колах артыст Весялін Румянцаў aka Wёska Project, нойз-праект гітарыста Аляксандра Мазуркевіча Grind Out, дырыжор Аляксандр Хумала, флейтыст Глеб Якушаў з Shaman Jungle і паэт Міша Макейчык. Сумеснай камандай артысты ў гонар 100-годдзя дадаізму агучаць фільм Ханса Рыхтэра «Дадаскоп» (1961).

«Уся гэтая задумка, вядома ж, канцэптуальна працягвае асноўную ідэю фестывалю “Белое зеркало” – выйсці за рамкі канцэртных пляцовак, стандартных музычных канцэртаў і вечарынак. Як і “Белое зеркало”, наш новы замут – гэта спроба аб'яднаць розныя напрамкі ў мастацтве, прыгатаваць экзатычны кампот для насалоды вачэй, вушэй, сэрца і мозгу тых, хто гатовы ўспрыняць нешта новае і незвычайнае», – падсумоўвае Аляксандр Багданаў.

Кінапаказы пройдуць 3 верасня а 19:00 на лужку ля хаба MZOR (вул. Кастрычніцкая, 16А). Арганізатары папярэджваюць, што колькасць месцаў строга абмежавана. Спяшайся!

Падзея ў FB Падзея ў VK