Анансаваная «Reshape 2021» – канферэнцыя пра будучыню Беларусі

Са слоў даследчыцы ЦНІ Лесі Руднік, рышэйп – гэта не традыцыйная канферэнцыя, а серыя сучасных і цікавых дыскусій, якія могуць быць карыснымі ўсім – ад IT-спецыялістаў да палітыкаў.

Тэматычна канферэнцыя разбітая на чатыры дыскусійныя блокі – па адным на дзень:

«Грамадства і Дзяржава»: Арыся Луцэвіч з Chatham House разам з Лесяй Руднік, даследчыцай Цэнтра новых ідэй, абмяркуюць, што такое ўстойлівасць у кантэксце нацыі і чаму думаць пра яе трэба ўжо сёння.

«Эканоміка»: размова адбудзецца паміж Канстанцінам Соніным (Чыкагскі ўніверсітэт і Вышэйшая школа эканомікі) і прадстаўніком Святланы Ціханоўскай па эканамічных пытаннях Алесем Аляхновічам (віцэ-прэзідэнт даследчага цэнтра CASE Belarus, аспірант Варшаўскай школы эканомікі).

«Расія і Беларусь»: Фёдар Лук’янаў з часопіса «Расія ў глабальнай палітыцы» паразмаўляе з дырэктарам Цэнтра новых ідэй Антонам Раднянковым пра дыялог паміж Расіяй і Беларуссю.

«Захад і Беларусь»: Мелінда Хэрынг (Atlantic Council) і Рыгор Астапеня, заснавальнік і дырэктар па даследаваннях ЦНІ, эксперт Chatham House, абмяркуюць адносіны Беларусі і Захаду і антыкрызісны менеджмент у аўтарытарных краінах.

Антон Раднянкоў, дырэктар Цэнтра новых ідэй

«Гэта ўжо наш чацвёрты Reshape, але першы ў анлайн-фармаце. Мы вырашылі скарыстацца гэтым і запрасілі выбітных замежных мысляроў, каб зразумець, як выглядае будучыня нашай краіны звонку. Беларусаў чакаюць найбольшыя змены ў гісторыі краіны, і рыхтавацца трэба ўжо цяпер».

Размовы будуць адбывацца з 23 па 26 лютага, штодня а 19:00. Папярэдняя рэгістрацыя абавязковая.

 Зарэгістравацца