Што рабіць, калі трапіў(-ла) у ДТЗ?

У студзені-верасні 2017 года ў Беларусі зарэгістравалі 2 241 дарожна-транспартнае здарэнне, у выніку якіх хтосьці быў паранены ці загінуў. За кіраванне ў п’яным стане паплаціліся ўжо 16 900 кіроўцаў. Разбіраемся, што рабіць, калі ў ДТЗ трапіў(-ла) ты сам(-а).

 

Самае галоўнае

 

Ні ў якім разе не пакідай месца здарэння без афармлення ДТЗ, інакш твае дзеянні кваліфікуюць па артыкуле 18.17 КоАП ч. 4 і абавяжуць выплаціць штраф у памеры ад 5 да 25 базавых велічынь. Могуць і пазбавіць правоў на тэрмін да двух гадоў. Артыкул распаўсюджваецца нават на тых, каму ўдалося «палюбоўна» разысціся з іншым удзельнікам ДТЗ, паабяцаўшы грошы, рамонт на «сваім» сэрвісе або яшчэ штосьці. Памятай, што ДАІ могуць выклікаць спагадлівыя відавочцы.

 

Як разабрацца без ДАІ?

Гэта магчыма, калі зоркі сышліся наступным чынам:

– ДТЗ адбылося з удзелам не больш чым двух транспартных сродкаў;

– пашкоджаныя толькі транспартныя сродкі ўдзельнікаў ДТЗ, людзі не пацярпелі, маёмасць трэціх асоб не пашкоджана;

– у цябе і іншага пацярпелага ёсць правы на кіраванне транспартам адпаведнай катэгорыі;

– вашы транспартныя сродкі застрахаваныя;

– у вас няма сумненняў у ступені адэкватнасці адно аднаго;

– бачанне карціны таго, што адбылося, супадае, рознагалоссяў па пашкоджаннях няма;

– пашкоджанне на вока не перавышае 400 еўра па курсе Нацбанка.

Пры такім раскладзе дастаткова аформіць адмысловы бланк паведамлення аб ДТЗ (еўрапратакол), які трэба трымаць у бардачку побач з раздрукаваным узорам запаўнення.

Уключыце аварыйную сігналізацыю, выстаўце знак аварыйнага прыпынку, аформіце паведамленне аб ДТЗ, пасля чаго неадкладна вызваліце праезную частку.

З запоўненым бланкам, а таксама страхоўкай і машынай пацярпелы адпраўляецца ў страхавое агенцтва вінаватага ў ДТЗ або ў тое, дзе афармляў дамову страхавання сам. Трэба зрабіць гэта цягам 5 працоўных дзён.

Май на ўвазе, што больш за 400 еўра табе не кампенсуюць, нават калі на СТА высветліцца, што «ластаўка» пацярпела куды сур'ёзней. Таму пры любых сумневах у ацэнцы лепш звяртацца ў ДАІ.

 

У чаканні супрацоўнікаў ДАІ

Не вызваляй праезную частку. Ёсць толькі адна прычына, па якой можна «прыбраць» за сабой да прыезду даішнікаў: табе давялося завезці ў шпіталь пацярпелага(-ых). Усё астатняе не мусіць цябе хваляваць. Нервовыя сігналы з машын у заторы проста ігнаруй. Ты застапарыў(-ла) паток не па сваім капрызе.

Пазнач сябе і аўтамабіль на дарозе. Уключы «аварыйку», выстаў знак аварыйнага прыпынку: у населеным пункце трэба аднесці яго хаця б за 15 метраў да месца ДТЗ, на трасе – яшчэ далей, не менш чым на 40 метраў. Забяспеч несапсаванасць прадметаў, якія распавядаюць пра ДТЗ, будзь то аскепкі шкла або рэчы, якія вылецелі з аўтамабіля.

Калі атрымліваецца адысці на абочыну, адыдзі. Можна апрануць камізэльку са святлоадбівальнымі палоскамі. Гэта не абавязкова, але на цёмнай трасе можа быць вельмі карысна. Каштуе такая камізэлька капейкі: ≈7 BYN (гуглі «камізэлька павышанай бачнасці купіць»).

Выкліч інспектара ДАІ: 102 з любога тэлефона.

Запішы дадзеныя сведак: прозвішчы, тэлефоны, нумары аўтамабіляў. Кантактная інфармацыя спатрэбіцца, калі будуць спрэчныя моманты.

 

Калі патрэбная медыцынская дапамога

Выклікай «хуткую»: 103. Пакуль карэта едзе, акажы пацярпеламу(-ым) першую дапамогу. Калі справа зусім кепская, тармазі аўтамабілі, прасі, каб пацярпелага(-ых) даставілі ў шпіталь.

Калі ніхто не праязджае, не спыняецца або адмаўляецца дапамагчы, вязі пацярпелага(-ых) сам, але, перш чым рушыць з месца ДТЗ, зафіксуй у прысутнасці відавочцаў становішча аўто, усе сляды і прыкметы, якія могуць даць нейкае ўяўленне аб здарэнні. Даведайся, як звязацца з відавочцамі.

У шпіталі трэба паведаміць сваё прозвішча і нумар рэгістрацыйнага знака аўтамабіля. Даручыўшы пацярпелага(-ых) медыкам, вяртайся на месца ДТЗ і чакай даішнікаў.

 

Калі ДАІ на месцы

Супрацоўнік ДАІ аформіць пратакол і схему ДТЗ, зафіксуе тлумачэнні ўдзельнікаў здарэння.

Сачы за ўсімі замерамі, пры неабходнасці дапамажы іх зрабіць. Пры наяўнасці відэарэгістратара можаш патрабаваць, каб супрацоўнік ДАІ забраў флэш-карту і прыклаў інфармацыю да матэрыялаў справы.

Калі ёсць пацярпелыя, цябе, хутчэй за ўсё, адправяць на агляд на прадмет знаходжання ў стане алкагольнага ап'янення. Неабходнасць экспертызы можа прызнаць як інспектар ДАІ, так і іншы пацярпелы ў аварыі. Адмова ад праходжання экспертызы прыраўноўваецца да п'янай язды.

Нават не думай цягнуцца па пляшку ў прамежку часу ад аварыі да экспертызы! Такі рэлакс выйдзе бокам, бо ніхто не стане разбірацца, калі менавіта ты выпіў(-ла).

 

Што ў выніку?

Калі ты – віноўнік(-ца) ДТЗ, ты можаш панесці адміністрацыйную або крымінальную адказнасць. У выпадку, калі ДТЗ абышлося матэрыяльным уронам, рашэнне прымае начальнік упраўлення ДАІ. Калі ў выніку ДТЗ былі нанесеныя цяжкія цялесныя пашкоджанні ці нехта загінуў, справу разглядае суд.

Калі ты – пацярпелы(-ая) у ДТЗ, ты мусіш апавясціць страхавую кампанію пра здарэнне на працягу 5 дзён. Для гэтага трэба з’явіцца і напісаць заяву аб выплаце страхавога пакрыцця. Спіс дакументаў, якія патрабуе страхавая кампанія, лепш удакладніць загадзя. Калі ў вінаватага ў ДТЗ не было страхоўкі, за кампенсацыяй прыйдзецца звяртацца ў Беларускае бюро па транспартным страхаванні: 8 (017) 200-93-55.

 

Куды скардзіцца?

Калі супрацоўнік ДАІ адмаўляецца складаць пратакол – кажа, што пашкоджанні нязначныя, – ты можаш паскардзіцца на яго ў вышэйстаячыя інстанцыі або па тэлефоне даверу ДАІ. Для менчукоў гэта гарадскі нумар 8 (017) 222-17-17.

Можна аспрэчыць пратакол інспектара ДАІ адразу пасля яго складання. Для гэтага трэба выкласці свой пункт гледжання ў тлумачэннях да пратакола.

Абскардзіць рашэнне начальніка ДАІ, як і рашэнне суда, можна ў вышэйшых інстанцыях на працягу 10 дзён.

 

Ілюстрацыя by Sheeborshee

 


КАМЕНТАРЫ (0)

КАМЕНТАВАЦЬ