Якія фільмы зноў пакажуць на «Паўночным ззянні»?

На кінафестывалі «Паўночнае ззянне» ўжо здарылася тры солд-аўты, і з такой нагоды арганізатары і арганізатаркі вырашылі прадубляваць паказы гэтых карцін. Сам фестываль будзе доўжыцца да 26 красавіка, так што ў цябе яшчэ ёсць шанец паглядзець фільмы Паўночных краін і краін Балтыі – у 2018-м падборка асабліва добрая. Глядзі поўную афішу тут.

 

 Расклад паўторных паказаў 

 

Мары каля мора

(Фарэрскія астравы, Данія)

 

 

Рэжысёр: Сакарыс Стоўра

Калі і дзе: 27 красавіка, 19:00, кінатэатр «Мір»

Набыць квіток

Галоўная гераіня Эстэр жыве на адным з Фарэрскіх астравоў і вымушана падпарадкоўвацца ладу жыцця рэлігійных бацькоў. Аднойчы ў горадзе яна знаёміцца з дзяўчынай на імя Рагна, і на час непрацяглага паўночнага лета іх жыццё змяняецца. Гэты фільм пра барацьбу, каханне і пошук сваёй ідэнтычнасці ад асобы дзяўчынкі-падлетка.

 

 

Жахлівая жанчына

(Фарэрскія астравы, Данія)

 

 

Рэжысёр: Крысцiян Тафдруп

Калі і дзе: 28 красавіка, 19:00, кінатэатр «Мір»

Набыць квіток

Гісторыя пра Расмуса і Мары: спачатку ён лічыць яе каханнем усяго свайго жыцця, але з часам пачынае заўважаць яе маніпулятарскія схільнасці. Мары перабудоўвае жыццё Расмуса пад сябе, захоплівае яго прастору, прымушае мяняць звычкі, распрадае яго асабістую маёмасць. Фільм паказаны з мужчынскага пункту гледжання.

 

 

Былая жонка

(Швецыя)

 

 

Рэжысёр: Каця Вік

Калі і дзе: 29 красавіка, 19:00, кінатэатр «Мір»

Набыць квіток

Сатырычны фільм пра чалавечыя адносіны з трох пунктаў гледжання: сяброўкі, жонкі і былой жонкі. Ад закаханасці да разводу, ад кармлення дзіцяці да немагчымасці адпусціць партнёра – прыкладна такая палітра перажыванняў.

 

У 2018-м у афішы кінафестывалю «Паўночнае ззянне» прадстаўлены 18 стужак з дзевяці краін: Літва, Латвія, Ісландыя, Швецыя, Нарвегія, Данія, Фінляндыя, Эстонія, Фарэрскія астравы (аўтаномны рэгіён, які ўваходзіць у склад Каралеўства Данія).

Фестываль праходзіць пад слоганам «Змяні вугал зроку». Гэта заклік глядзець на ўсё з аналітычнага пункту гледжання, ставіць сябе на месца іншых і бачыць сітуацыю вачыма маці, дзіцяці, каханых людзей, ворагаў і сяброў. Пасля многіх фільмаў праходзяць абмеркаванні з рэжысёрамі, дыскусіі і майстар-класы. Падрабязнасці шукай на сайце «Паўночнага ззяння».

 

КАМЕНТАРЫ (0)

КАМЕНТАВАЦЬ