Міця Післяк даспеў да персанальнай выставы

З творчасцю Міці не знаёмы(-ая) толькі той(тая), хто ніколі не быў(-ла) у Менску. Гэта ён перанёс працу Міхаіла Хруцкага «Партрэт жонкі з кветкамі і садавіной» на сцяну аднаго з дамоў па вуліцы Карла Маркса. Гэта яго нацюрморт на Чыгуначнай стаў адной з самых цікавых работ фестывалю Vulica Brazil. Гэта ён зрабіў тыя самыя крутыя кубачкі з Менскам для McDonald's. Гэта ён прыдумаў «тыповага беларуса» для гадзіннікаў «Луч».

На выставе «Behind the scenes» можна будзе ўбачыць той самы «біхайнд» – усё, што папярэднічала графіці ды іншаму арту Міці Післяка. Мастак адабраў самыя цікавыя эскізы і замалёўкі, якія пазней увасобілася ў закончаны мастацкі твор. Усе працы можна будзе купіць. 10 % ад выручаных сродкаў арганізатары накіруюць на дапамогу бяздомным жывёлам.

10 красавіка ў 19:00 адбудзецца аўтарская экскурсія па выставе. Мастак раскажа, як нараджаліся яго вялікія задумы, і адкажа на твае каверзныя пытанні.

А яшчэ ў перыяд правядзення выставы Міця Післяк будзе афармляць тэрасу «Галерэі ДК», так што ты ўжывую ўбачыш, як уладкаваная яго праца.

«Калі гляджу на карціну ў галерэі, мне заўсёды хочацца даведацца, што ўяўляе сабой палатно з адваротнага боку, пракрасціся крыху глыбей у сэрца карціны. Уявіць, як на самой справе выглядаў аўтар, наколькі цяжка ці, наадварот, з лёгкасцю даўся яму вынік, які нам прадстаўлены. Я не перастаю здзіўляцца таму, як народжаная ў галаве думка станавіцца матэрыяльнай, пераходзячы спачатку на паперу ў выглядзе эскіза, а потым на чыюсьці сцяну або прамысловы аб'ект, якім будуць карыстацца дзясяткі ці сотні людзей».