Дзе затусіць на Хэлоўін у 2017 годзе?

 БОМЖ PARTY HARD 

 ДЗЕЦІ 

Быць можа, у цябе ёсць маленькі брацік ці сястрычка, якому таксама не церпіцца затусіць у свята? Ці ў цябе ёсць уласнае дзіця, якому карціць выразаць на гарбузу зласлівы тварык? Мы знайшлі для цябе парачку варыянтаў.

Напрыклад, прыходзь у тэматычны парк «Дыназаўрыя» 29 кастрычніка ў 13:00: песні, танцы, навуковыя майстар-класы і іншыя люботы чакаюць цябе і твайго юнага таварыша. Уваход вольны!

Калі ж душа патрабуе чагосьці больш сур'ёзнага, адпраўляйся ў музей навук «Квантум»: 29 кастрычніка ў 15:00 тут раскажуць, як зрабіць гарбуз-ліхтарык, растлумачаць пра сонечную сістэму і пакажуць, як ператварыць звычайную ваду ў зомбі-лізун. Кошт: 14 BYN за дзіцячы квіток, 16 – за дарослы. Аднак усім, хто прыйдзе ў касцюме, належыць зніжка – 50%.

6 лістапада ў 17:00 у клубе «Бруге» можна пабачыць касплэй-дэфіле, стэнд Harry Potter, таксама можна закупіцца рознай драбязой: фігуркамі, значкамі, кубкамі, налепкамі і магніцікамі. Натуральна, усе тавары будуць прытрымлівацца анімэшнай тэматыкі. Уваход – 8 рублёў.

 Дзень Усіх Святых на экране 

Шумныя тусоўкі высмакталі ўсе сілы, а ад фрыкаў у касцюмах пачынае мітусіць у вачах? Зладзь сабе татальны рэлакс ад іншых homo sapiens, пабэсці сябе дабротнымі творамі кінематографа.

Наведай Kinosmena.horror, фестываль сапраўды страшнага кіно. Восем стромкіх хорар-стужак круцяць у Менску на мове арыгіналу з рускімі субцітрамі, так што справа за малым: выбраць упадабаны фільм вось тут і купіць квіток на бліжэйшы сеанс.

Стаміўся(-лася) ад «поўнага метра»? Не бяда: 29 кастрычніка ў Менску пройдзе Corn short film festival – фестываль айчынных кароткаметражных фільмаў у жанры «трылер». Адбудзецца ўся гэтая справа ў «АртКінатэатры» ў 21:00. Дарэчы, білет, які ты зможаш купіць тут, дазволіць атрымаць асалоду не толькі ад фільмаў, але і ад сустрэчы з двума рэжысёрамі Дзмітрыем Шкардзюком і Андрэем Грынько, аўтарамі інтэрнэт-серыяла «Заклятыя скарбы» і першага беларускага хорару «Вупыр». Ну чым не падарунак на Дзень Усіх Святых.

А яшчэ мы спадзяемся, што ты знаёмы(-ая) з серыялам «Вельмі дзіўныя справы», бо сёння, 27 кастрычніка, выходзіць другі сезон гэтага шэдэўра. Як, ты нават не чуў(-ла) пра яго? Раім: выдатны варыянт для тых, хто стаміўся ад шэрага шлаку, які сустракаецца за кожным паваротам. «Вельмі дзіўныя справы» – гэта серыял, які прасякнуты настальгіяй і адсылкамі да 80-х. Гэта кактэйль з «Твін Піксу», фільмаў Карпентэра і «Гравіці Фолз», запраўлены музыкай Дэвіда Боўі і The Clash.

А калі ты фанат(-ка) сапраўднага олдскулу, узрадуйся: у пракат запушчана «Піла 8» – працяг ужо культавай сагі пра хлопца, які ўвесь час хоча «згуляць у гульню». Калі ты любіш мурашкі, якія бегаюць па скуры, і тое, як твае валасы ўстаюць дыбарам, – адпраўляйся ў кінатэатр: стужка ў кіно ўжо другі дзень.