Андрусь Горват зноў стане дворнікам у Купалаўскім

21 верасня, падчас «Тэатральнага пікніка», прысвечанага сотаму сезону Купалаўскага, пісьменнік будзе сачыць за парадкам у Аляксандраўскім скверы і вадзіць экскурсіі па закуліссі тэатра. Зарэгіцца на экскурсію можна па спасылцы (увага: не ўсе з іх будзе весці знакаміты экс-дворнік).

«Вы зможаце бачыць таго самага дворніка ў жывой прыродзе, зрабіць з ім сэлфі, падпісаць кнігу, патрымаць мятлу на ўдачу ці проста запытацца, як прайсці да Нацыянальнай бібліятэкі. Так атрымалася, што ўсе акцёры занятыя, і ў ролі дворніка Горвата буду я», – напісаў Андрусь Горват у Facebook.

 Акрамя таго, як пабачыць пісьменніка, на «Тэатральным пікніку» можна будзе: 

 паглядзець спектакль «Радзіва "Прудок"» (сервіс VOKA наладзіць у скверы прамую трансляцыю);

 паслухаць жывую музыку: «Кассиопею», Святлану Бень, Ягора Забелава і інш.;

 паўдзельнічаць у кастынгу для дарослых або дзяцей і атрымаць рэальную (!) ролю ў топавай пастаноўцы Купалаўскага;

 сфоткацца з персанажамі спектакляў і ў дэкарацыях тэатра;

 даведацца пра кухню тэатра;

 зрабіць сабе вусы, як у Янкі Купалы;

 атрымаць запрашэнні на закрытыя паказы спектакляў;

 затэсціць штрудзель з безалкагольным глінтвейнам «Ноч на Каляды» ды іншыя тэатральныя спецыялітэты.

Пікнік стартуе 21 верасня ў 12:00. Уваход бясплатны.

Падрабязнасці тут.