Дзень ведаў у IBB

Навучальны год 2019/2020 пачаўся не з лінеек, а з сацыяльна-адукацыйнага фестывалю IBB JubiläumsFest.

 

Той факт, што Дзень ведаў прыйшоўся на нядзелю, ніяк не астудзіў запал цікаўных і дапытлівых. З самай раніцы яны выправіліся ў бок Малінаўкі, каб паўдзельнічаць у беспрэцэдэнтнай задуме ад Менскага міжнароднага адукацыйнага цэнтра ім. Ёханэса Рау (IBB Менск): на адзін дзень цэнтр узяў і падарыў годным ініцыятывам свае прасторныя пляцоўкі.

У агульнай складанасці IBB прыняў 50 адукацыйных івэнтаў, кожны з якіх знайшоў сваю аўдыторыю. Атрымалася сапраўднае свята: з камфортным нэтворкінгам, музыкай, пачастункамі і ўсім тым, што звычайна пазначаюць тэгам #свята.

Тое, што фестываль будзе топ, стала зразумела на самым старце, калі на лекцыі галоўрэда 34 Антона Кашлікава «Як прыдумляць ідэі і прадаваць іх аўдыторыі?» здарыўся аншлаг. Горад, дзе а дзясятай раніцы ў нядзелю людзі аддаюць перавагу лекцыі, а не ранішнім сырнікам у ложку, – дзіўны горад. Дзякуй, IBB, што мы ў гэтым яшчэ раз пераканаліся.